ۇلتتىق بيوتەحنولوگيا ورتالىعىنىڭ عالىمدارى ەلىمىزدە CAR-T تەراپيالىق تەحنولوگياسىن ەندىرۋگە نيەتتى.
گەنەتيكالىق ينجەنەريا زەرتحاناسىنىڭ قىزمەتكەرلەرى ول ءۇشىن قاراشا ايىندا انگلياعا بارىپ، شەتەلدىك مامانداردىڭ وزىق تاجىريبەسىن مەڭگەرەتىن بولادى، دەپ حابارلايدى Almaty-akshamy.kz Qazaqtv.com-عا سىلتەمە جاساپ.
بۇگىنگى تاڭدا قاننىڭ قاتەرلى ىسىگى ەڭ كوپ تارالعان ونكولوگيالىق اۋرۋلاردىڭ وندىعىنا كىرەدى. مۇنداي گەماتولوگيالىق اۋرۋلارىن ەمدەۋدىڭ نەگىزگى ءادىسى حيميوتەراپيا. كەيبىر جاعدايلاردا ناۋقاستارعا جاسۋشا ترانسپلانتاسياسى جاسالادى. الايدا، ەمنىڭ بۇل ءتۇرى بارىنە بىردەي شيپا بولمايتىنى انىق. دەرت اسقىنعان سايىن ءداستۇرلى ەمدەۋ ادىستەرىنە بوي بەرمەيدى. دارىگەرلەر وندايدا ناۋقاستى ەمدەۋدىڭ ءتيىمدى امالى رەتىندە CAR-T يممۋنوتەراپياسىن قولدانادى.
«بۇل گەندىك-ينجەنەرلىك تەحنولوگيا مەن جاسۋشالىق ينجەنەريانىڭ گيبريدى، ياعني قوسىندىسى. ءبىز پاسيەنتتەن يممۋندىق جاسۋشالاردى الامىز. كەيىن ولاردى ارنايى وڭدەۋدەن وتكىزىپ، ىسىك جاسۋشالارىمەن كۇرەسىپ، ولاردى جويۋ ءۇشىن بەلسەندىلىگىن ارتتىرامىز»، - دەدى گەنەتيكالىق ينجەنەريا زەرتحاناسىنىڭ مەڭگەرۋشىسى الەكساندر شۋستوۆ.
بۇعان دەيىن ەلدەگى ۇلتتىق بيوتەحنولوگيا ورتالىعىنىڭ زەرتحاناسىندا ۇزاق مەرزىمدى كلينيكالىق زەرتتەۋ جۇمىستارى جۇرگىزىلەدى. جاڭا تەراپيا الدىمەن «ينۆيتورا» جاسۋشالارىندا، كەيىن جانۋارلاردا، ەڭ سوڭىندا عانا بارىپ ناۋقاستاردا سىنالادى.
قازاقستاندا بۇگىندە قان ءتۇزۋشى جانە ليمفا تىندەرىنىڭ دەرتىنە شالدىققان جەتى مىڭعا جۋىق ناۋقاس ەسەپتە تۇر. ياعني، قاتەرلى قان ىسىگى بار ادامدار. جىل سايىن مىڭنان استام جاڭا جاعداي انىقتالادى. ناۋقاستاردىڭ دەنى اۋرۋىنان ايىعىپ شىعادى. دەيتۇرعانمەن ولاردىڭ بەستەن ءبىر بولىگى CAR-t تەحنولوگياسى بويىنشا ەمدەۋدى قاجەت ەتەدى.
ساراپشىلاردىڭ پايىمىنشا، بولاشاقتا بۇل جوعارى تەحنولوگيالىق تەراپيا قاتەرلى ىسىك گەماتولوگيالىق اۋرۋلارىمەن قاتار سوزىلمالى، اۋتويممۋندى جانە جۇقپالى دەرتتەردى ەمدەۋ ءۇشىن دە قولدانىلادى. ياعني، ونىڭ ەمدىك اياسى الدەقايدا كەڭ.