مۇگەدەكتىگى بار ادامداردىڭ زاڭدى قۇقىقتارىن قامتاماسىز ەتۋ جانە ولار ءۇشىن قولجەتىمدى ورتا قالىپتاستىرۋ ماقساتىندا 2025 جىلدىڭ قورىتىندىسى بويىنشا قازاقستاندا الەۋمەتتىك ينفراقۇرىلىمنىڭ 27 307 نىسانى تولىقتاي بەيىمدەلدى، دەپ حابارلايدى aqshamnews.kz
قازىرگى ۋاقىتتا قازاقستان رەسپۋبليكاسىندا 2025–2030 جىلدارعا ارنالعان ينكليۋزيۆتى ساياسات تۇجىرىمداماسى، «امانات» پارتياسىنىڭ 2023–2027 جىلدارعا ارنالعان جول كارتاسى، سونداي-اق مەملەكەت باسشىسىنىڭ تاپسىرماسىمەن ازىرلەنگەن «حالىقپەن بىرگە» جوباسى ىسكە اسىرىلۋدا.
«امانات» پارتياسىنىڭ جول كارتاسىندا 2023–2027 جىلدار ارالىعىندا قولجەتىمدىلىكتىڭ ينتەراكتيۆتى كارتاسىنا (بۇدان ءارى – كارتا) ەنگىزىلگەن 40 مىڭنان استام نىساندى بەيىمدەۋ كوزدەلگەن. جىل سايىن نىسانداردىڭ 20%-ى بەيىمدەلىپ وتىرادى. وسىلايشا، 2023 جىلى – كارتاداعى نىسانداردىڭ 20%-ى، 2024 جىلى – 40%، 2025 جىلى – 60%، 2026 جىلى – 80%، 2027 جىلى – 100% بەيىمدەلۋى ءتيىس.
2025 جىلدىڭ سوڭىنا دەيىن ەل بويىنشا 25 740 نىساندى بەيىمدەۋ جوسپارلانعان، الايدا وڭىرلەر جوسپاردى ارتىعىمەن ورىنداپ، 27 307 نىساندا بەيىمدەۋ جۇمىستارى جۇرگىزىلدى. بۇل جالپى سانىنىڭ 64%-ىن قۇرايدى.
اتالعان 27 307 نىساننىڭ ىشىندە مۇگەدەكتىگى بار ادامداردىڭ بارلىق ساناتتارى ءۇشىن قولجەتىمدىلەرى:
دەنساۋلىق ساقتاۋ نىساندارى – 4 479؛
ءبىلىم بەرۋ نىساندارى – 9 008؛
مادەنيەت نىساندارى – 2 146؛
ساۋدا جانە قىزمەت كورسەتۋ نىساندارى – 5 213؛
مەملەكەتتىك جانە كۆازيمەملەكەتتىك ۇيىمدار – 3 994؛
وزگە دە نىساندار – 2 467.
جەرگىلىكتى اتقارۋشى ورگانداردىڭ مالىمەتىنە سايكەس، وڭىرلەر بويىنشا بەيىمدەلگەن نىساندار سانى:
استانا قالاسى – 809 نىسان؛
الماتى قالاسى – 5 546 نىسان؛
شىمكەنت قالاسى – 1 401 نىسان؛
اباي وبلىسى – 869 نىسان؛
اقمولا وبلىسى – 1 262 نىسان؛
اقتوبە وبلىسى – 896 نىسان؛
الماتى وبلىسى – 1 047 نىسان؛
اتىراۋ وبلىسى – 1 440 نىسان؛
شىعىس قازاقستان وبلىسى – 1 212 نىسان؛
جامبىل وبلىسى – 1 078 نىسان؛
جەتىسۋ وبلىسى – 950 نىسان؛
باتىس قازاقستان وبلىسى – 1 358 نىسان؛
قاراعاندى وبلىسى – 1 283 نىسان؛
قوستاناي وبلىسى – 1 367 نىسان؛
قىزىلوردا وبلىسى – 1 567 نىسان؛
ماڭعىستاۋ وبلىسى – 588 نىسان؛
پاۆلودار وبلىسى – 1 163 نىسان؛
سولتۇستىك قازاقستان وبلىسى – 1 051 نىسان؛
تۇركىستان وبلىسى – 2 285 نىسان؛
ۇلىتاۋ وبلىسى – 135 نىسان.
«جىل سايىن كەدەرگىسىز ورتا كەڭەيىپ كەلەدى، بۇل ءبىزدىڭ ءومىر ءسۇرۋ جاعدايىمىزعا تىكەلەي اسەر ەتەدى. اسىرەسە، قوعامنىڭ كوزقاراسىنىڭ وزگەرۋى ءبىزدى قۋانتادى: كاسىپكەرلەر مەن نىسان يەلەرى ينكليۋزيانىڭ شىنايى ماڭىزىن تۇسىنە باستادى. قولجەتىمدى ورتا – بۇل، ەڭ الدىمەن، ءبىزدىڭ دەربەستىگىمىز. بۇرىن كوپتەگەن ورىندار ءبىز ءۇشىن فيزيكالىق تۇرعىدا قولجەتىمسىز بولسا، بۇگىندە بۇل كەدەرگىلەر جويىلىپ جاتىر. تەك پاندۋستار ورناتۋمەن عانا شەكتەلمەي، عيمارات ىشىندەگى كەشەندى جايلىلىققا دا كوڭىل ءبولىنۋى – ءبىز ءۇشىن وتە ماڭىزدى. مەملەكەت پەن بيزنەستىڭ وسىنداي جۇمىسى بىزگە بارلىعىمەن تەڭ دارەجەدە ەركىن قوزعالىپ، ەڭبەك ەتىپ، دەمالۋعا مۇمكىندىك بەرەدى»، – دەدى ءبىرىنشى توپتاعى مۇگەدەكتىگى بار داستان راۋشانبەكوۆ.
سونىمەن قاتار، 2025 جىلى مەملەكەتتىك باقىلاۋ اياسىندا حالىقتى الەۋمەتتىك قورعاۋ سالاسىنداعى رەتتەۋ جانە باقىلاۋ كوميتەتىنىڭ وڭىرلىك دەپارتامەنتتەرى مەملەكەتتىك باسقارۋ، دەنساۋلىق ساقتاۋ، الەۋمەتتىك قورعاۋ، مادەنيەت، جەكە كاسىپكەرلىك، ساۋدا جانە وزگە دە سالالارداعى 1 176 الەۋمەتتىك ينفراقۇرىلىم نىسانىنا تەكسەرۋ جۇرگىزدى.
ولاردىڭ ىشىندە: پروفيلاكتيكالىق باقىلاۋ اياسىندا – 322؛ جوسپاردان تىس – 476؛ پروكۋراتۋرا ورگاندارىنىڭ تالاپتارى بويىنشا – 369.
تەكسەرۋ ناتيجەسىندە انىقتالعان بۇزۋشىلىقتاردى جويۋ تۋرالى 597 نۇسقاما بەرىلىپ، جالپى سوماسى 96 ملن تەڭگەدەن اساتىن 414 اكىمشىلىك ايىپپۇل سالىندى.
ايتا كەتۋ قاجەت، پروفيلاكتيكالىق باقىلاۋ بارىسىندا نىسان يەلەرىنە بۇزۋشىلىقتار العاش رەت انىقتالعان جاعدايدا، ولاردى جويۋ تۋرالى اكىمشىلىك جاۋاپكەرشىلىككە تارتۋسىز تەك نۇسقاما عانا بەرىلەدى. بەلگىلەنگەن مەرزىمدە نۇسقاما ورىندالماعان جاعدايدا، ايىپپۇل سالىنادى.