كەلەسى ايدان باستاپ مۇگەدەكتىگى بار ادامدار مەن ولاردىڭ وتباسىلارى جاڭا جاردەماقى الا باستايدى. بۇل تۋرالى ق ر ەڭبەك جانە حالىقتى الەۋمەتتىك قورعاۋ ءبىرىنشى ۆيسە-مينيسترى ءاقمادي سارباسوۆ تمد-عا قاتىسۋشى مەملەكەتتەردىڭ كونسۋلتاتيۆتىك كەڭەسىنىڭ وتىرىسىنا ايتتى، دەپ حابارلايدى almaty-akshamy.kz قازاقپاراتقا سىلتەمە جاساپ.
«بيىلعى 12 قازاندا پرەزيدەنت «قازاقستان رەسپۋبليكاسىنىڭ كەيبىر زاڭنامالىق اكتىلەرىنە ازاماتتاردىڭ جەكەلەگەن ساناتتارىن الەۋمەتتىك قورعاۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭعا قول قويدى. پارلامەنت سەناتى مەن ءماجىلىسىنىڭ جۇمىس توبى مۇشەلەرىنىڭ، ۇكىمەت جانىنداعى مۇگەدەكتىگى بار ادامداردىڭ ماسەلەلەرى جونىندەگى ۇيلەستىرۋ كەڭەسىنىڭ، سونداي-اق جۇرتشىلىق پەن ساراپتاما قوعامداستىعىنىڭ ۇسىنىستارى زاڭنىڭ نەگىزىنە الىندى. زاڭ 19 تۇجىرىمدامالىق تۇزەتۋدەن تۇرادى جانە 16 زاڭنامالىق اكتىگە وزگەرىستەر ەنگىزۋدى كوزدەيدى. كەلەسى ايدان باستاپ مۇگەدەكتىگى بار ادامدار مەن ولاردىڭ وتباسىلارى جاڭا جاردەماقى الا باستايدى»، – دەدى ءاقمادي سارباسوۆ.
اتالعان زاڭدا كوزدەلگەن نورمالار تۋرالى ايتا كەلە، ءبىرىنشى ۆيسە-مينيستر «الەۋمەتتىك كاسىپكەرلىك تۋرالى» جانە «ينكليۋزيۆتى ءبىلىم بەرۋ تۋرالى» تاعى ەكى زاڭنىڭ قابىلدانعانىن حابارلادى.
«ولاردىڭ ءبىرىنشىسى الەۋمەتتىك كاسىپكەرلىك ۇعىمىن، الەۋمەتتىك كاسىپكەرلىك سۋبەكتىلەرىنىڭ نەگىزگى مىندەتتەرى مەن ساناتتارىن، الەۋمەتتىك كاسىپكەر مارتەبەسىن بەرۋ تەتىگىن ايقىندايدى، سونداي-اق مەملەكەتتىك قولداۋدىڭ اۋقىمدى شارالارىن كوزدەيدى. تۇتاستاي العاندا، زاڭ مۇگەدەكتىگى بار ادامداردىڭ ىسكەرلىك بەلسەندىلىگىن دە، جۇمىسپەن قامتىلۋىن دا ىنتالاندىرۋعا باعىتتالعان. ءبىلىم مينيسترلىگىنىڭ باستاماسى بويىنشا قابىلدانعان ەكىنشى زاڭ وقىتۋدىڭ بارلىق دەڭگەيلەرىندە ەرەكشە ءبىلىم بەرۋگە قاجەتتىلىگى بار ادامداردىڭ قۇقىقتارىن ىسكە اسىرۋعا باعىتتالعان. وزگەرىستەر مەن تولىقتىرۋلار ءبىلىم تۋرالى، بالا قۇقىقتارى تۋرالى، مۇگەدەكتىگى بار ادامداردى الەۋمەتتىك قورعاۋ تۋرالى زاڭدارعا ەنگىزىلدى»، – دەدى ول.
ءاقمادي سارباسوۆ مەملەكەت باسشىسىنىڭ تاپسىرماسىن ورىنداۋ ماقساتىندا بۇۇ-نىڭ مۇگەدەكتەردىڭ قۇقىقتارى تۋرالى كونۆەنسياسىنا فاكۋلتاتيۆتىك حاتتامانى راتيفيكاسيالاۋ بويىنشا جۇمىس جۇرگىزىلىپ جاتقانىن اتاپ ءوتتى. ءتيىستى زاڭ جوباسى ق ر پارلامەنتى ءماجىلىسىنىڭ قاراۋىندا جاتىر.