قازاقستان رەسپۋبليكاسىنىڭ «مەليوراسيا تۋرالى» جەكە زاڭىن ازىرلەۋ ورىنسىز.
بۇل تۋرالى سەنات دەپۋتاتتارىنىڭ ساۋالىنا پرەمەر-مينيستر ءاليحان سمايىلوۆتىڭ جاۋابىندا ايتىلعان، دەپ حابارلايدى Almaty-akshamy.kz قازاقپاراتقا سىلتەمە جاساپ.
ق ر «اگروونەركاسىپتىك كەشەندى جانە اۋىلدىق اۋماقتاردى دامىتۋدى مەملەكەتتىك رەتتەۋ تۋرالى» زاڭىنا سايكەس، مەليوراسيا فۋنكسيالارى سۋارمالى جەرلەردىڭ مەليوراسيالىق جاي-كۇيىنە مونيتورينگ جۇرگىزۋ جانە باعالاۋ بولىگىندە قازاقستان رەسپۋبليكاسىنىڭ اۋىل شارۋاشىلىعى مينيسترلىگىنە بەكىتىلگەن. بۇل رەتتە قۋاڭ جەرلەردىڭ، تۇزدى، باتپاقتى، شامادان تىس ىلعالدانعان جەرلەردىڭ، ولاردىڭ جاعدايى سۋدىڭ اسەرىنە بايلانىستى جاي-كۇيىن جاقسارتۋ ماقساتىندا جۇرگىزىلەتىن جەردى گيدرومەليوراسيالاۋ بولىگىندە قازاقستان رەسپۋبليكاسى ەكولوگيا، گەولوگيا جانە تابيعي رەسۋرستار مينيسترلىگىنە جۇكتەلگەن»، - دەپ اتاپ وتەدى ۇكىمەت باسشىسى جاۋابىندا.
پرەمەر-مينيستردىڭ اتاپ وتۋىنشە، بۇدان باسقا جەكە نەمەسە زاڭدى تۇلعالاردىڭ جەردى پايدالانۋى مەن قورعاۋىن مەملەكەتتىك باقىلاۋ، سونداي-اق جەردى ۇتىمدى پايدالانۋ نورمالارى قازاقستان رەسپۋبليكاسىنىڭ جەر زاڭناماسىمەن رەتتەلگەن. سونداي-اق جەر زاڭناماسىندا جەر ۋچاسكەلەرىنىڭ مەنشىك يەلەرى مەن جەر پايدالانۋشىلاردىڭ داقىلداردى كەزەكتەستىرۋدىڭ بەلگىلەنگەن سحەمالارىن ساقتاۋ، قاجەتتى مەليوراسيالىق جانە قالپىنا كەلتىرۋ جۇمىستارىن جۇرگىزۋ، ونىڭ ىشىندە ۋچاسكەدە بار سۋارۋ جانە كوللەكتورلىق-درەناجدىق جۇيەلەردى ءتيىستى تارتىپپەن ۇستاۋ جونىندەگى مىندەتتەرى كوزدەلگەن.
«بۇل رەتتە اكىمشىلىك قۇقىقبۇزۋ كودەكسىنىڭ 338-بابىنا سايكەس، اۋىل شارۋاشىلىعى ماقساتىنداعى جەرلەردى ۇتىمسىز پايدالانعانى نەمەسە پايدالانباعانى ءۇشىن اكىمشىلىك جاۋاپكەرشىلىك كوزدەلگەنىن اتاپ وتەمىز. باياندالعاننىڭ نەگىزىندە مەليوراسيا تۋرالى جەكە زاڭ ازىرلەۋدى ورىنسىز جانە قولدانىستاعى زاڭنامالىق اكتىلەردى باسشىلىققا الۋ قاجەت دەپ پايىمدايمىز»، - دەدى ءاليحان سمايىلوۆ.