15 ساۋىردەن باستاپ قازاقستاندىق مەكتەپتەردە وقۋشىلاردىڭ ءبىلىم جەتىستىكتەرىنىڭ مونيتورينگى باستالادى.
وعان 2462 مەكتەپ بويىنشا 4ء-شى جانە 9-سىنىپتارىندا وقيتىن 150 مىڭعا جۋىق وقۋشى قاتىسادى، دەپ حابارلايدى Almaty-akshamy.kz. ق ر وقۋ-اعارتۋ مينيسترلىگىنىڭ باسپا ءسوز قىزمەتىنە سىلتەمە جاساپ.
ببجم ارقىلى وقۋ باعدارلامالارىنىڭ تيىمدىلىگىن باعالاۋعا، سونداي-اق، وقۋ پروسەسىنىڭ وسال تۇستارىن انىقتاۋعا قول جەتكىزىلەدى. وقۋشىلاردىڭ ءبىلىم ساپاسىن زەردەلەۋگە باعىتتالعان بۇل جۇيە قازاقستاندىق ۇلتتىق زەرتتەۋ قۇرالى. ونىڭ قورىتىندىسىندا ءبىلىم بەرۋ ساپاسىن ارتتىرۋ ءۇشىن ءار ايماق پەن ناقتى ءبىلىم بەرۋ ۇيىمى بويىنشا كەشەندى تالداۋ جانە ادىستەمەلىك ۇسىنىمدار ازىرلەنەدى.
«مونيتورينگ ساۋاتتىلىقتىڭ ءۇش باعىتى بويىنشا جۇرگىزىلەدى: وقۋ ساۋاتتىلىعى، ماتەماتيكا جانە جاراتىلىستانۋ. وقۋشىلار تەستىلەۋدى كومپيۋتەرمەن تاپسىرادى. حالىقارالىق زەرتتەۋلەرگە سايكەس، ءبىلىم بەرۋ جەتىستىكتەرىنىڭ ءارتۇرلى ماندىك فاكتورلارىن انىقتاۋ ءۇشىن ببجم شەڭبەرىندە ساۋالناما جۇرگىزىلەدى. ساۋالناما وقۋشىلارعا، پەداگوگتەرگە، مەكتەپ باسشىلارىنا جانە ءتورتىنشى سىنىپ وقۋشىلارىنىڭ اتا-انالارىنا ارنالعان»، - دەيدى «ا.بايتۇرسىن ۇلى اتىنداعى «تالداۋ» ۇلتتىق زەرتتەۋلەر جانە ءبىلىمدى باعالاۋ ورتالىعى» اق-نىڭ ءتوراعاسى ماعجان امانعازى.
ايتا كەتۋ كەرەك، ببجم 26 ساۋىرگە دەيىن جالعاسادى. بيىل تەست تاپسىرمالارى PISA، PIRLS، TIMSS حالىقارالىق باعالاۋ ۇلگىلەرىن ەسكەرە وتىرىپ جاڭارتىلدى. ءقازىر قازاقستاندىق ببجم جۇيەسى حالىقارالىق اككرەديتتەۋدەن وتۋدە.