قازاقستان تاريحىندا العاش رەت حالىقتىڭ 90 پايىزدان استامى مىندەتتى الەۋمەتتىك مەديسينالىق ساقتاندىرۋ (ءمامس) جۇيەسىمەن قامتىلدى، دەپ حابارلايدى Aqshamnews.kz ءتىلشىسى دەنساۋلىق ساقتاۋ مينيسترلىگىنە سىلتەمە جاساپ.
بۇل كورسەتكىش ميلليونداعان ازاماتتىڭ كەپىلدەندىرىلگەن ءارى ساپالى مەديسينالىق كومەك پاكەتىنە قول جەتكىزگەنىن بىلدىرەدى. ناتيجە مەملەكەت باسشىسىنىڭ تاپسىرماسىمەن جۇرگىزىلگەن جۇيەلى وزگەرىستەر اياسىندا ىسكە اسقان.
ايتا كەتەيىك، 2025 جىلدىڭ شىلدە ايىندا ءمامس جۇيەسىنە ءبىرقاتار جاڭالىق ەنگىزگەن ارنايى زاڭ قابىلدانعان. زاڭنىڭ نەگىزگى ماقساتى – مەديسينالىق كومەكتىڭ قولجەتىمدىلىگىن ارتتىرۋ جانە الەۋمەتتىك جاعدايى تومەن ازاماتتاردىڭ ساقتاندىرۋدان تىس قالماۋىن قامتاماسىز ەتۋ.
جاڭا نورماعا سايكەس، 2026 جىلدىڭ قاڭتارىنان باستاپ جەرگىلىكتى بيۋدجەت ەسەبىنەن ءمامس جۇيەسىنە قوسىمشا 1 ميلليونعا جۋىق ادام قوسىلدى. ولار الەۋمەتتىك ءال-اۋقاتى «داعدارىستى» (D ساناتى) جانە «شۇعىل» (E ساناتى) دەڭگەيدەگى ازاماتتار.
مينيسترلىك مالىمەتىنشە، تومەن تابىسى بار حالىقتىڭ تاعى 5 پايىزى جوسپارلى مەديسينالىق كومەككە قول جەتكىزسە، تاجىريبەدە العاش رەت اكىمدىكتەر جۇمىسسىز جانە الەۋمەتتىك جاعدايى قيىن ازاماتتار ءۇشىن ساقتاندىرۋ جارنالارىن وزدەرى تولەۋ تەتىگى ىسكە قوسىلعان.
ۆەدومستۆو بۇل قادام مەديسينالىق قىزمەتتىڭ قولجەتىمدىلىگىن كەڭەيتىپ قانا قويماي، الەۋمەتتىك تەڭسىزدىكتى ازايتۋعا باعىتتالعان ماڭىزدى رەفورما ەكەنىن اتاپ ءوتتى.