بۇگىندە ءبىر ميلليوننان استام قازاقستان ازاماتى شەتەلدە كريپتوۆاليۋتانى ساۋدالاپ، پايدا تاۋىپ وتىر.
ءماجىلىس كريپتوۆاليۋتا مەن ماينينگكە قاتىستى زاڭ جوباسىن ازىرلەدى. وسى اپتادا تومەنگى پالاتا دەپۋتاتتارى ونى ءبىرىنشى وقىلىمدا ماقۇلدادى. ەندى ەكىنشى وقىلىم بار. وعان دەيىن زاڭ جوباسىنا تاعى ءبىرقاتار تۇزەتۋ ەنگىزىلۋى مۇمكىن، دەپ حابارلايدى Almaty-akshamy.kz Almaty.tv-گە سىلتەمە جاساپ.
دەگەنمەن ءقازىردىڭ وزىندە وسى سالاداعى نەگىزگى تالاپتار بەلگىلى جانە الداعى ۋاقىتتا وزگەرىسكە ۇشىرامايتىن سياقتى.
بەيسرەسمي مالىمەتكە سايكەس، بۇگىندە ءبىر ميلليوننان استام قازاقستان ازاماتى شەتەلدە كريپتوۆاليۋتانى ساۋدالاپ، پايدا تاۋىپ وتىر.
ماينەرلەر زاڭدى تۇلعا بولىپ تىركەلەدى
جاڭا زاڭ جوباسىن دايىنداۋعا ءبىر جىل كەتكەن ەكەن. ماماندار كريپتوبيرجا مەن ماينينگ سالاسىن كولەڭكەدەن شىعارىپ، بارلىعىنا ورتاق سالىق جۇيەسىنە ەنگىزۋگە تىرىستى. وسى قۇجات قابىلدانسا، ماينەرلەر، ترەيدەرلەر مەن ينۆەستورلارعا ناقتى تالاپ قويىلادى. ولار:
ماينينگكە ليسەنزيا الۋ؛
كريپتوبيرجالاردى "استانا" حالىقارالىق قارجى ورتالىعىندا اشۋ؛
ماينينگتەن تۇسكەن تابىستىڭ 75 پروسەنتىن وتاندىق كريپتوبيرجالاردا ايىرباستاۋ؛
قوسىمشا سالىق تولەۋ.
وسىلايشا، ماينەرلەر قازاقستاندا رەسمي تۇردە تىركەلۋگە مىندەتتى بولادى.
"بۇل دەگەنىمىز، ماينەرلەر زاڭدى تۇلعا رەتىندە تىركەلىپ، سالىق سالىناتىن سۋبەكتىگە اينالادى. ماينينگ-پۋلدار دا ەكونوميكانىڭ ءبىر بولىگى بولادى"، - دەيدى دەپۋتات ەكاتەرينا سمىشليايەۆا.
رەسمي مالىمەتكە سايكەس، قازاقستاندا ماينينگپەن اينالىساتىن 150 كومپانيا بولعان.
ۆيسە-مينيستر جاندوس نۇرماعانبەتوۆتىڭ ايتۋىنشا، وسى ۋاقىتقا دەيىن ۇشتەن ءبىر بولىگى باسقا ەلگە كەتىپ قالدى نەمەسە جابىلدى. 50 كومپانيا رەسمي تۇردە تىركەلدى.
"قالعانى زاڭسىز ماينينگ بولىپ سانالادى. ولارعا قاتىستى سۇراق كوپ. قۇرال-جابدىقتاردى قالاي اكەلىپ ءجۇر؟ ەنەرگيانى قالاي تۇتىنادى؟ قاي جەردە ورنالاسقان؟"، - دەدى نۇرماعانبەتوۆا جۋرناليستەرگە بەرگەن سۇحباتىندا.
الايدا بۇگىندە ماينينگتى ۇيدە جاسايتىن ازاماتتار دا جوق ەمەس. الداعى ۋاقىتتا ولار رەسمي تۇردە تىركەلۋگە مىندەتتى بولادى. ال ليسەنزيانى سيفرلىق دامۋ مينيسترلىگى بەرەدى دەگەن جوسپار بار.
كريپتوبيرجالار قالاي جۇمىس ىستەيدى
قازاقستاندا كريتوۆاليۋتامەن تولەم جاساۋعا تىيىم سالىنعان. دەپۋتات سمىشليايەۆانىڭ سوزىنە قاراعاندا، ۇىمەت پەن ۇلتتىق بانكتىڭ وسى ماسەلەگە قاتىستى ۇستانىمى ازىرشە وزگەرمەيدى. ولار كريپتوۆاليۋتاعا سەنبەيدى. سوندىقتان كريپتوبيرجالاردى "استانا" حالىقارالىق قارجى ورتالىعىندا اشۋعا شەشىم قابىلداندى، ءبىراق ساۋدا-ساتتىق ورتالىق ايماعىناندا عانا جاسالادى. وسىلايشا، كريپتوۆاليۋتامەن تابىس تاۋىپ جۇرگەن ادام بيرجادا تىركەلۋگە مىندەتتى بولادى.
دەپۋتات عازيز قۇلاحمەتوۆتىڭ ايتۋىنشا، بيۋدجەتكە دە قىرۋار قارجى ءتۇسۋى كەرەك.
"بەيرەسمي دەرەكتەردە وسى كريپتومەن اينالىساتىن ادامداردىڭ قارجى اينالىمى مولشەرى الدىڭعى جىلدارى 5 ميلليارد دوللار بولدى دەيدى. ەگەر راسىندا سولاي بولسا، وندا قازىناعا ءبىراز سالىق ءتۇسۋى كەرەك ەدى، ءبىراق ونداي اقشانىڭ تۇسكەنى سەزىلگەن جوق"، - دەيدى قۇلاحمەتوۆ.
سول بەيرەسمي مالىمەت بويىنشا بۇگىندە حالىقارالىق كريپتوبيرجالاردا ءبىر ميلليوننان استام قازاقستان ازاماتى تىركەلگەن. بارلىعى كريپتوۆاليۋتانى ساۋدالايدى. ونى سۇر سحەمالار ارقىلى ايىرباستاۋ فاكتىلەرى دە جوق ەمەس. وسىلايشا، كريپتوۆاليۋتامەن جاسالاتىن وپەراسيالاردىڭ بارلىعى دەرلىك كولەڭكەدە قالىپ وتىر. سونىڭ ءبارىن قازاقستاندىق بيرجالارعا اۋىستىرۋدىڭ ناتيجەسىندە ايىرباستاۋ وپەراسيالارىنىڭ اشىقتىعىن قامتاماسىز ەتۋ جوسپارلانعان.
ال ماينەرلەر 2024 جىلدان باستاپ تابىستىڭ 75 پروسەنتىن وتاندىق كريپتوبيرجالاردا ايىرباستاۋعا مىندەتتەلەدى. ولاردان قولدانىستاعى سالىقتان بولەك سىياقىسىنا قوسارلانعان قۇن سالىعى، ماينينگ پۋلدىڭ تابىس سالىعى، سونداي-اق، كريپتوبيرجاداعى وپەراسيالار ءۇشىن تولەم الىنادى.
قازىرگى جوسپار بويىنشا كريپتوبيرجالار مەملەكەتتىك كىرىستەر كوميتەتىنىڭ اقپاراتتىق جۇيەلەرىمەن ينتەگراسيالانادى. ماينينگكە قاجەتتى قۇرال-جابدىقتاردىڭ رەەسترى دە ەنگىزىلەدى. سونىڭ ارقاسىندا قازاقستاندا جەتكىزىلەتىن قۇرال-جابدىقتار باقىلاۋعا الىنادى.