ارنايى حقكو-لارعا جۇرگىزىلگەن جەمقورلىققا قارسى مونيتورينگ ناتيجەلەرى بويىنشا بيۋدجەتكە تۇسەتىن تۇسىمدەر 10،6 ملرد تەڭگەدەن 91،3 ملرد تەڭگەگە دەيىن ۇلعايدى.
سىبايلاس جەمقورلىققا قارسى مونيتورينگ ناتيجەلەرى بويىنشا اۆتوموبيلدەردى تىركەۋ جانە جۇرگىزۋشى كۋالىكتەرىن بەرۋ كەزىندە جەمقورلىق تاۋەكەلدەرى انىقتالدى.
"2011 جىلدان بەرى قولدانىلىپ كەلە جاتقان اۆتوكولىكتى تىركەۋ جۇيەسىندە ادىلەتسىز قىزمەتكەرلەر جالعان دەرەكتەر ەنگىزىپ، جالعان قۇجاتتار بەرۋگە جاعداي تۋعىزىپ، جەمقورلىققا جول بەرگەن. اگەنتتىك 3 جىل ىشىندە 23 قىلمىستىق ءىستى تەرگەدى. 3 مىڭنان استام زاڭسىز كولىك ەسەپكە قويىلىپ، 60 مىڭ جۇرگىزۋشى كۋالىگى زاڭسىز بەرىلدى. ۋاكىلەتتى ورگاندارعا ءتيىستى ۇسىنىمدار ەنگىزىلىپ، ولاردىڭ ءبىر بولىگى ىسكە اسىرىلدى"، - دەپ جازدى انتيكوردان.
ونداعى اقپاراتقا قاراعاندا، ارنايى حقكو مەن ىىم-دە اۆتوكولىكتى تىركەۋ بويىنشا جاڭا اقپاراتتىق جۇيەلەر ىسكە قوسىلدى. وتىنىمدەردى رەسىمدەۋ جانە قاراۋ كەزىندە دەرەكتەردى تۇزەتۋ مۇمكىندىكتەرى الىنىپ تاستالدى. ەندى تەك اكىمشىلىك پوليسيا كوميتەتى وزگەرىستەر ەنگىزە الادى. وتىنىمدەردى تىركەۋ ءراسىمى جەڭىلدەتىلدى. ەندى بۇل ءۇشىن تەك جسن ەنگىزۋ قاجەت، ال قالعان دەرەكتەر باسقا اقپاراتتىق جۇيەلەردەن اۆتوماتتى تۇردە تولتىرىلادى. بۇل رەتتە جۇيەنىڭ ءوزى ەكىنشى دەڭگەيدەگى بانكتەردىڭ تۇبىرتەكتەرىن، مىندەتتى تولەمدەرىن جانە ايىپپۇلدارىن تولەۋدى تەكسەرەدى.
"2022 جىلى 9،4 مىڭ اۆتوكولىكتى تىركەگەنى ءۇشىن 10،6 ملرد تەڭگە جينالدى، 2023 جىلى زاڭداستىرۋدى ەسكەرە وتىرىپ، 10،2 مىڭ اۆتوكولىكتى تىركەگەن كەزدە 91،3 ملرد تەڭگە ءتۇستى. اتالعان تاۋەكەلدەردى جويۋ ناتيجەسىندە وتكەن جىلى بيۋدجەتكە تۇسكەن ءتۇسىم 9 ەسەگە ۇلعايدى. كومپيۋتەرلەرگە قاشىقتان قول جەتكىزۋ ارقىلى تۇلعالاردى اۋىستىرۋ جانە ەمتيحان ناتيجەلەرى ارقىلى جۇرگىزۋشى كۋالىكتەرىن بەرۋ پروسەسىندە ەلەۋلى جەمقورلىق تاۋەكەلدەرى انىقتالدى. اگەنتتىكتىڭ ۇسىنىمدارى بويىنشا مىندەتتى بيومەتريا جانە قوعامدىق باقىلاۋ ءۇشىن تىكەلەي ەفيردە بەينەتىركەۋ سىندى باقىلاۋ شارالارى ەنگىزىلدى"، - دەلىنگەن اقپاراتتا.
ەمتيحانداردى قايتا تاپسىرۋ راسىمدەرى رەتتەلدى. قايتا تاپسىرۋ سانى ەكى رەتكە شەكتەلىپ، ال وتە الماعان جاعدايدا 3 ايدان كەيىن نەمەسە تىيىم سالىنعان زاتتاردى پايدالانعان جاعدايدا 6 ايدان كەيىن تاپسىرادى.
جاڭا اقپاراتتىق جۇيەلەردى ەنگىزۋدىڭ ارقاسىندا ەمتيحانداردى تاپسىرعان سىڭاي تانىتۋ تاۋەكەلدەرىن ەداۋىر ازايتۋعا مۇمكىندىك تۋدى. جالپى، جاڭا اقپاراتتىق جۇيەلەردى ەنگىزۋ وسى سالاداعى بارلىق قىزمەتكە وڭ اسەرىن تيگىزدى. بۇگىنگى تاڭدا اگەنتتىك جۇرگىزۋشى كۋالىكتەرىن الۋ جانە كولىكتى تىركەۋ راسىمدەرىنە قوعامدىق مونيتورينگ جۇرگىزۋدى ۇيىمداستىرۋدا. بۇل جۇمىسقا جەمقورلىققا قارسى ەرىكتىلەر تارتىلدى. سونداي-اق، 2023 جىلعى جەلتوقساندا حقكو قىزمەتكەرلەرىن جەمقورلىق سۋبەكتىلەرىنە جاتقىزۋعا قاتىستى زاڭناماعا ماڭىزدى تۇزەتۋلەر ەنگىزىلگەنىن ەسكە سالامىز. بۇل وزگەرىستەر 2025 جىلعى قاڭتاردان باستاپ كۇشىنە ەنەدى.
تۇزەتۋلەر قىزمەتكەرلەر تاراپىنان تەرىس قىلىقتار مەن قۇقىق بۇزۋشىلىقتاردىڭ الدىن الۋعا جانە ازاماتتاردىڭ قۇقىقتارىن قورعاۋعا باعىتتالعان.