قازاقستاندا جىلۋ جانە سۋ جەلىلەرىنىڭ جارتىسىنان استامى توزىپ تۇر

ەلىمىزدەگى جىلۋ، سۋمەن جابدىقتاۋ جانە سۋ بۇرۋ جەلىلەرىنىڭ توزۋ دەڭگەيىنىڭ ورتاشا كورسەتكىشى 53 %-دى قۇرايدى.

يندۋستريا جانە ينفراقۇرىلىمدىق دامۋ مينيسترلىگىنىڭ مالىمەتىنشە، سوڭعى 7 جىلدا توزۋ دەڭگەيىنىڭ جالپى كورسەتكىشى 13 پايىزعا تومەندەگەن، دەپ حابارلايدى Almaty-akshamy.kz.

تجم رەسپۋبليكالىق داعدارىس ورتالىعى جانە جەرگىلىكتى اتقارۋشى ورگانداردىڭ مالىمەتتەرى بويىنشا، 2022-2023 جىلدارداعى جىلىتۋ ماۋسىمى باستالعاننان بەرى ەلىمىز بويىنشا 26 تەحنولوگيالىق اقاۋ ورىن العان، ونىڭ ىشىندە:

– اۆتونومدى قازاندىقتاردا – 2 (اقمولا جانە الماتى وبلىستارىندا)؛

– جىلۋمەن جابدىقتاۋ جەلىلەرىندە – 11 (جەتىسۋ – 1، قاراعاندى – 7، پاۆلودار – 1، استانا-1، الماتى-1)؛

– سۋمەن جابدىقتاۋ جەلىلەرىندە – 13 (اباي – 1، اقمولا – 2، الماتى – 1، شقو – 1، بقو – 1، قاراعاندى – 1، پاۆلودار – 1، سقو – 2، ۇلىتاۋ – 1، استانا-2).

«2015-2022 جىلدار ارالىعىندا ءارتۇرلى قارجىلاندىرۋ كوزدەرىنەن جىلۋ جۇيەلەرىنىڭ قۇرىلىسى، رەكونسترۋكسيالاۋ جانە جاڭعىرتۋ جۇمىستارىنا 344 ملرد تەڭگە بولىنگەن. ناتيجەسىندە 3 667 كم ينجەنەرلىك جەلى سالىنىپ، قايتا جاڭارتىلعان. وسىلايشا، جالپى توزۋ دەڭگەيى 65%-دان 53 پايىزعا دەيىن تومەندەدى. 2022 جىلدىڭ سوڭىنا دەيىن بۇل كورسەتكىشتى 51%-عا دەيىن تومەندەتۋ جوسپارلانۋدا»، - دەپ جازدى ۆەدومستۆودان.

تۇرعىن ۇي-كوممۋنالدىق ينفراقۇرىلىمدى دامىتۋ تۇجىرىمداماسى شەڭبەرىندە 2026 جىلعا قاراي جىلۋ، سۋمەن جابدىقتاۋ جانە سۋ بۇرۋ جەلىلەرىنىڭ توزۋىنىڭ جالپى كورسەتكىشىن 45%-عا دەيىن ازايتۋ كوزدەلىپ وتىر.