قازاقستاندا جىل باسىنان وندىرىستە 13 اۆاريا مەن 103 وقيعا بولدى. بۇل تۋرالى ق ر توتەنشە جاعدايلار مينيسترلىگىنىڭ مالىمەتىندە ايتىلدى، دەپ حابارلايدى Almaty-akshamy.kz Inform.kz-كە سىلتەمە جاساپ.
توتەنشە جاعدايلار مينيسترلىگىنىڭ باسپا ءسوز قىزمەتىنەن ءمالىم ەتكەندەي، ۆەدومستۆو باسشىسى يۋريي يلين قاراعاندى وبلىسىنا جۇمىس ساپارى كەزىندە «ارسەلور ميتتال تەمىرتاۋ» اق باسشىلىعىن ونەركاسىپتىك قاۋىپسىزدىك دەپارتامەنتىنە شاقىرتقان. كەزدەسۋدە وندىرىستەگى قاۋىپسىزدىك، جۇمىسشىلاردىڭ ەڭبەك جاعدايلارىن جاقسارتۋ جانە ولارعا الەۋمەتتىك قولداۋ كورسەتۋ ماسەلەلەرىن تالقىلاندى. ارسەلور ميتتال تەمىرتاۋ باسشىلىعى ءوندىرىستىڭ بارلىق كەزەڭدەرىندە قاۋىپسىزدىكتى جەتىلدىرۋ بويىنشا قابىلدانىپ جاتقان شارالار تۋرالى بايانداعان.
«يۋريي يلين ونەكاسىپتىك قاۋىپسىزدىك دەپارتامەنتىنە بيزنەس قاۋىمداستىققا اۆاريالار مەن وقيعالاردىڭ سانىن ازايتۋ ءۇشىن قاجەتتى ادىستەمەلىك كومەك كورسەتۋدى تاپسىردى. قاۋىپسىزدىك شارالارى ساقتالماعان جاعدايدا، زاڭ اياسىندا قاتاڭ شارالار قابىلداناتىنىن، ءتىپتى ءوندىرىستىڭ جۇمىسى توقتاتىلاتىن ەسكەرتتى. سەبەبى 2022 جىلدىڭ باسىنان بەرى وندىرىستە 13 اۆاريا مەن 103 وقيعا تىركەلدى»، - دەلىنگەن مينيسترلىكتىڭ باسپا ءسوز بايانىندا.
سونىمەن قاتار ساپار بارىسىندا مينيستر «كااقق» ج ش س رەسپۋبليكالىق ورتالىق شتابىندا بولدى، وندا رەسپۋبليكالىق ورتالىق شتابىنىڭ جانە «امت» اق كومىر دەپارتامەنتىنىڭ باسشىلىعىمەن بىرگە تاۋ-كەن قۇتقارۋشىلارىن الەۋمەتتىك قولداۋ جانە اۆاريالىق-قۇتقارۋ قىزمەتتەرىنىڭ زاماناۋي قۇرالدارمەن، قۇرال-جابدىقتارمەن جانە تەحنيكامەن جاراقتاندىرۋ جۇمىستارىمەن تانىستى. بۇدان بولەك، يۋريي يلين وبلىس تۇرعىندارىمەن كەزدەستى.
تۇرعىندار نەگىزىنەن دالا ورتتەرى مەن سۋ تاسقىنىنا بايلانىستى توتەنشە جاعدايلاردىڭ الدىن الۋ، قاراعاندى وبلىسىنداعى تەگىن جاعاجايلار سالۋ ماسەلەلەرىن كوتەردى. جۇزدەسۋگە بەينەكونفەرەنسيا ارقىلى ءوڭىردىڭ قالالارى مەن اۋداندارىنىڭ تۇرعىندارى قاتىستى.