وقىتۋ بارلىق نيەت بىلدىرۋشىلەر ءۇشىن قازاق جانە ورىس تىلدەرىندە قولجەتىمدى.
ەلەكتروندىق ەڭبەك بيرجاسى بازاسىندا ءبىرىڭعاي سيفرلىق ەكوجۇيە نەمەسە باسقاشا ايتقاندا، جۇمىسپەن قامتۋ سالاسىنداعى ونلاين قىزمەتتەر سۋپەرماركەتى قۇرىلاتىن بولادى. بۇل ەكوجۇيە ازاماتتاردى كاسىبي جولىندا ماماندىق تاڭداۋدان باستاپ ەڭبەك قاتىناستارىن رەسىمدەۋگە دەيىن قولداپ وتىرادى، دەپ حابارلايدى Almaty-akshamy.kz.
بۇگىنگى تاڭدا ەەب بازاسىندا جۇمىسپەن قامتۋ سالاسىنداعى بولاشاق سۋپەرماركەتتىڭ 6 نەگىزگى قۇرامداس بولىگىنىڭ 5-ەۋى ىسكە اسىرىلدى.
«ەەب نەگىزگى ەلەمەنتى – بۇل جۇمىسقا ورنالاستىرۋ بويىنشا ءبىرىڭعاي سيفرلىق الاڭ Enbek.kz. ول 205 جۇمىسپەن قامتۋ ورتالىعىنان، 44 جەكە جۇمىسپەن قامتۋ اگەنتتىگىنەن جانە 5 ونلاين جۇمىسپەن قامتۋ الاڭىنان بوس ورىنداردى شوعىرلاندىرادى. بۇل الاڭدا ازاماتتار باعىتتار، كاسىپتەر جانە داعدىلار بويىنشا لايىقتى بوس جۇمىس ورىندارىن، ال جۇمىس بەرۋشىلەر – ولاردىڭ تالاپتارىنا سايكەس كەلەتىن قىزمەتكەرلەردى ىزدەي الادى»،- دەلىنگەن ەڭبەكمينى باسپا ءسوز قىزمەتىنىڭ حابارلاماسىندا.
بۇل رەتتە ارمەنيا، بەلارۋس، قىرعىزستان مەن رەسەيدىڭ ۇلتتىق اقپاراتتىق جۇيەلەرىنە قولجەتىمدىلىگى بار «شەكاراسىز جۇمىس» ءبىرىڭعاي ىزدەۋ جۇيەسىنىڭ ارقاسىندا تەك قازاقستاندا عانا ەمەس، ەۋرازيالىق ەكونوميكالىق وداق ەلدەرىندە دە جۇمىس تابۋعا بولادى.
«ەەب ارقىلى جۇمىسپەن قامتۋ سالاسىنداعى كورسەتىلەتىن مەملەكەتتىك قىزمەتتەردى دە وڭاي الۋ مۇمكىن بولادى. وتكەن جىلى 126 مىڭ ادام ونلاين فورماتتا جۇمىسسىز رەتىندە تىركەلدى. پلاتفورما ارقىلى ازاماتتار جۇمىسىنان ايىرىلۋعا بايلانىستى الەۋمەتتىك تولەم الۋعا، سۋبسيديالانعان جۇمىس ورىندارىنا جۇمىسقا ورنالاسۋعا، جۇمىس كۇشى تاپشى ايماقتارعا قونىس اۋدارۋ ءۇشىن ءوتىنىش بەرە الادى. بيىل اتالعان كورسەتىلەتىن مەملەكەتتىك قىزمەتتەردى ەەب ارقىلى 314،2 مىڭنان استام ادام پايدالاندى»، – دەپ، اتاپ كورسەتتى «ەڭبەك رەسۋرستارىن دامىتۋ ورتالىعى» اق پرەزيدەنتى داۋلەت ارعىندىقوۆ.
سونداي-اق ەەب بازاسىندا حالىق ءۇشىن قاجەتتى داعدىلار بويىنشا Skills Enbek – ماركەتپلەيس كۋرستارىنىڭ ونلاين وقىتۋ پلاتفورماسى جۇمىس ىستەيدى. وقىتۋ بارلىق نيەت بىلدىرۋشىلەر ءۇشىن قازاق جانە ورىس تىلدەرىندە قولجەتىمدى. بۇگىنگى تاڭدا 157-دەن استام كۋرس ورنالاستىرىلعان، ولاردىڭ 103ء-ى تەگىن.
بۇل رەتتە 124 مىڭعا جۋىق ادام بەلگىلى ءبىر كۋرستان ءوتىپ، ءتيىستى داعدىلاردى يگەرۋ تۋرالى سەرتيفيكات الدى. بۇل داعدىلار ءبىرىڭعاي سيفرلىق ەكوجۇيەنىڭ ارقاسىندا ءبىلىم الۋشى-ىزدەنۋشى تاراپىنان باسى ارتىق كۇش سالۋسىز تۇيىندەمەنى ورنالاستىرۋ جانە ەڭبەك قاتىناستارىن رەسىمدەۋ سەرۆيستەرىندە اۆتوماتتى تۇردە كورسەتىلەتىن بولادى.
«جۇمىسپەن قامتۋدىڭ سيفرلىق ينفراقۇرىلىمىنداعى تاعى ءبىر جاڭالىق HR Enbek پلاتفورماسى – جالدامالى جۇمىسشىلاردىڭ ەڭبەك جولىن سيفرلىق ەسەپكە الۋ الاڭى بولدى. بۇگىندە پلاتفورمانى 272 مىڭعا جۋىق جۇمىس بەرۋشى پايدالانادى، بۇل ەلدەگى بارلىق جالدامالى قىزمەتكەرلەردىڭ 63%-ىن قامتيدى»، – دەپ تولىقتىردى ءسوزىن داۋلەت ارعىندىقوۆ.
پورتالدىڭ كومەگىمەن ەلەكتروندى ەڭبەك شارتتارىن جاساۋ مۇمكىندىگى بار، وسىلايشا قىزمەتكەرلەر اۆتوماتتى تۇردە ەلەكتروندى ەڭبەك كىتاپشاسىن دا تولتىرا الادى. مەملەكەتتىك ورگانداردىڭ اقپاراتتىق جۇيەلەرىمەن ينتەگراسيانىڭ ارقاسىندا باسى ارتىق قۇجاتتار مەن انىقتامالاردى جيناماستان جۇمىسكەرلەردىڭ جەكە ىستەرىن اۆتوماتتى تۇردە قالىپتاستىرۋعا بولادى.
پلاتفورما بيزنەسكە ەلەكتروندى كادرلىق ءىس جۇرگىزۋدى ءتيىمدى جۇرگىزۋگە، قىزمەتكەرلەردى جالداۋ كەزىندە شىعىندار مەن دەرەكتەردى بۇرمالاۋ تاۋەكەلدەرىن ازايتۋعا مۇمكىندىك بەرەدى.
سونىمەن قاتار جۇمىس بەرۋشىلەر ءۇشىن ەڭبەك زاڭناماسىنىڭ تالاپتارىن ساقتاۋعا ءانونيمدى ءوزىن-وزى دياگنوستيكالاۋ سەرۆيسى ىسكە قوسىلدى.
سونداي-اق، جۇمىسپەن قامتۋدىڭ سيفرلىق ەكوجۇيەسىنىڭ ماڭىزدى ەلەمەنتى Business Enbek پلاتفورماسى بولىپ تابىلادى، ول بيزنەس-يدەيالاردى ىسكە اسىرۋعا مەملەكەتتىك گرانتتار الۋدىڭ: ءوتىنىش بەرۋدەن باستاپ گرانتتىڭ ءوزىن الۋعا دەيىنگى بارلىق پروسەستەرىن تولىق اۆتوماتتاندىرۋ ءۇشىن ىسكە اسىرىلعان. بارلىق قۇجاتتاما ەلەكتروندىق فورماتتا رەسىمدەلەدى. قازىرگى ۋاقىتتا 12 مىڭنان استام ءوتىنىم ماقۇلداندى. جىل سوڭىنا دەيىن بارلىعى 20 مىڭ گرانت بەرۋ جوسپارلانىپ وتىر.
«سونىمەن قاتار ءبىز سيفرلىق جۇمىسپەن قامتۋ ورتالىقتارىنا كوشۋدى جۇزەگە اسىرىپ جاتىرمىز، ياعني جۇمىسپەن قامتۋ سالاسىندا بۇرىن وفلاين فورماتتا كورسەتىلەتىن بارلىق قىزمەتتەر سيفرلاندىرىلاتىن بولادى. ىزدەنۋشىلەر كەيس-مەنەدجمەنتتى قولدانا وتىرىپ، كوممۋنيكاسيانىڭ بارلىق قولجەتىمدى تاسىلدەرىمەن جەكە كەڭەس جانە قولداۋ شارالارىن الا الادى. بۇل حالىق ءۇشىن مەملەكەتتىك قىزمەتتەردىڭ بارلىق سپەكترىنىڭ قولجەتىمدىلىگى مەن ساپاسىن ارتتىرۋعا مۇمكىندىك بەرەدى»، – دەپ اتاپ ءوتتى داۋلەت ارعىندىقوۆ.
كەلەسى جىلى تاعى ءبىر ماڭىزدى ەلەمەنت – ماماندىقتار بويىنشا سيفرلىق جول سىلتەگىشتى ىسكە قوسۋ جوسپارلانۋدا. ول ەڭبەك نارىعىنداعى بارلىق ماماندىقتار تۋرالى اقپارات جيىنتىعىنىڭ ءبىر ءتۇرى بولادى، ودان ءاربىر ىزدەنۋشى بەلگىلى ءبىر ماماننىڭ نە ىستەيتىنىن، ول ءۇشىن قانداي ءبىلىم قاجەت ەكەنىن، ورتاشا جالاقى مولشەرىن، ەڭبەك نارىعىنداعى وسىنداي كادرلارعا دەگەن قاجەتتىلىك تۋرالى بىلە الادى. بۇل ماماندىق پەن ودان ءارى مانساپ تاڭداۋ الدىندا تۇرعاندارعا كومەكتەسەدى.