ولار الىس-جاقىن شەتەلدەردەن كەلگەن.
قازاقستاندا ەكى مىڭعا جۋىق شەتەل جۇمىس كۇشىن پايدالاناتىن جۇمىس بەرۋشى بار. بۇگىنگى تاڭدا ەلىمىزدە 16 مىڭنان استام شەتەل ازاماتى جۇمىس ىستەيدى، دەپ حابارلايدى Almaty-akshamy.kz.
«2022 جىلعى 1 ماۋسىمداعى جاعداي بويىنشا، جەرگىلىكتى اتقارۋشى ورگانداردىڭ رۇقساتىمەن قازاقستان اۋماعىندا 16 424 شەتەل ازاماتى ەڭبەك ەتەدى»، - دەلىنگەن ەڭبەكمينى باسپا ءسوز قىزمەتىنىڭ حابارلاماسىندا.
شەتەلدەن جۇمىس كۇشىن تارتۋعا رۇقساتتاردىڭ اراسىندا مىناداي ساناتتار بار: باسشىلار مەن ولاردىڭ ورىنباسارلارى ءۇشىن 617 رۇقسات (ءبىرىنشى سانات)، قۇرىلىمدىق بولىمشەلەردىڭ باسشىلارى ءۇشىن 3 224 رۇقسات (ەكىنشى سانات). تارتىلعان شجك نەگىزگى بولىگى ءۇشىنشى (ماماندار) جانە ءتورتىنشى (بىلىكتى جۇمىسشىلار) ساناتتارعا جاتادى – تيىسىنشە ولار 8 020 جانە 926 ادام. سونداي-اق ماۋسىمدىق جۇمىستارعا 1 506 ادام، ال كورپوراتيۆتىك اۋىستىرۋ اياسىندا 2 131 ادام تارتىلدى.
قازىرگى ۋاقىتتا قازاقستاندا شجك پايدالاناتىن 1 762 جۇمىس بەرۋشى بار. ولاردا 398 مىڭنان استام قازاقستان ازاماتى جۇمىس ىستەيدى، بۇل قىزمەتكەرلەردىڭ جالپى سانىنىڭ 96%-ى.
ەڭبەك ميگرانتتارى كەلەتىن نەگىزگى ەلدەر: جۇڭگو – 3 651 ادام، تۇركيا – 1 853 ادام، وزبەكستان – 1 605 ادام، ءۇندىستان – 1 577 ادام، ۇلىبريتانيا – 1 113 ادام.
ىشكى ەڭبەك نارىعىن قورعاۋ ماقساتىندا ق ر ەڭبەك جانە حالىقتى الەۋمەتتىك قورعاۋ مينيسترلىگى جىل سايىن رەسپۋبليكاعا شەتەل ماماندارىن تارتۋعا كۆوتا بەلگىلەيدى جانە بولەدى. وسى جىلعى قاڭتاردا ءىرى وتاندىق بيزنەس وكىلدەرىمەن كەزدەسۋ قورىتىندىسى بويىنشا مەملەكەت باسشىسىنىڭ بەرگەن تاپسىرماسىن ورىنداۋ ءۇشىن مينيسترلىك شەتەل جۇمىس كۇشىن تارتۋعا ارنالعان كۆوتانى بۇرىن جوسپارلانعان 28 352 بىرلىكتەن 23 560 بىرلىككە دەيىن، ياعني 4 792 ادامعا (16%) قىسقارتتى.