ەلىمىزدە شجك پايدالاناتىن 1 733 جۇمىس بەرۋشى بار.
ەڭبەك جانە حالىقتى الەۋمەتتىك قورعاۋ مينيسترلىگىنىڭ ماماندارى قازاقستانعا كەلىپ جۇمىس ىستەيتىن شەتەل ازاماتتار تۋرالى ايتتى، دەپ حابارلايدى Almaty-akshamy.kz.
رەسمي مالىمەتتەر بويىنشا، 2022 جىلعى 1 مامىرداعى جاعداي بويىنشا جەرگىلىكتى اتقارۋشى ورگانداردىڭ رۇقساتىمەن قازاقستان اۋماعىندا 15 932 شەتەل ازاماتى ەڭبەك ەتەدى.
«شەتەل جۇمىس كۇشىن تارتۋعا رۇقساتتاردىڭ اراسىندا مىناداي ساناتتار بار: باسشىلار مەن ولاردىڭ ورىنباسارلارى ءۇشىن 630 رۇقسات (ءبىرىنشى سانات)، قۇرىلىمدىق بولىمشەلەردىڭ باسشىلارى ءۇشىن 3 154 رۇقسات (ەكىنشى سانات). تارتىلعان شجك نەگىزگى بولىگى ءۇشىنشى (ماماندار) جانە ءتورتىنشى (بىلىكتى جۇمىسشىلار) ساناتتارعا جاتادى – تيىسىنشە ولار 7 643 جانە 837 ادام. سونداي-اق ماۋسىمدىق جۇمىستارعا 1 343 ادام، ال كورپوراتيۆتىك اۋىستىرۋ اياسىندا 2 325 ادام تارتىلدى»، - دەلىنگەن مينيسترلىكتىڭ باسپا ءسوز قىزمەتىنىڭ حابارلاماسىندا.
قازىرگى ۋاقىتتا قازاقستاندا شجك پايدالاناتىن 1 733 جۇمىس بەرۋشى بار. ولاردا 391 مىڭنان استام قازاقستان ازاماتى جۇمىس ىستەيدى، بۇل قىزمەتكەرلەردىڭ جالپى سانىنىڭ 96% - ى.
ەڭبەك ميگرانتتارى كەلەتىن نەگىزگى ەلدەر: جۇڭگو – 3 613 ادام، تۇركيا – 1 838 ادام، ءۇندىستان – 1 293 ادام، وزبەكستان – 1 385 ادام، ۇلىبريتانيا – 1 083 ادام.
ىشكى ەڭبەك نارىعىن قورعاۋ ماقساتىندا ق ر ەڭبەك جانە حالىقتى الەۋمەتتىك قورعاۋ مينيسترلىگى جىل سايىن رەسپۋبليكاعا شەتەل ماماندارىن تارتۋعا كۆوتا بەلگىلەيدى جانە بولەدى. وسى جىلعى قاڭتاردا ءىرى وتاندىق بيزنەس وكىلدەرىمەن كەزدەسۋ قورىتىندىسى بويىنشا مەملەكەت باسشىسىنىڭ بەرگەن تاپسىرماسىن ورىنداۋ ءۇشىن مينيسترلىك شەتەل جۇمىس كۇشىن تارتۋعا ارنالعان كۆوتانى بۇرىن جوسپارلانعان 28 352 بىرلىكتەن 23 560 بىرلىككە دەيىن، ياعني 4 792 ادامعا (16%) قىسقارتتى.