قازاقستاندا جيھاز ءوندىرىسى بويىنشا ءتورت ءىرى جوبا ىسكە قوسىلادى

جيھاز ءوندىرىسى قارقىندى دامىپ كەلەدى.

كەلەر جىلى قازاقستاندا جيھاز ءوندىرىسى بويىنشا 4 ءىرى جوبا ىسكە قوسىلادى. بۇگىندە كاسىپورىندار قۇرىلىس-مونتاج جۇمىستارىن جۇرگىزىپ، ءوندىرىس وشاعىنا قاجەتتى جابدىقتاردى ساتىپ الۋدا، دەپ حابارلايدى Almaty-akshamy.kz.

يندۋستريا جانە ينفراقۇرىلىمدىق دامۋ مينيسترلىگىنىڭ باسپا ءسوز قىزمەتىنىڭ مالىمەتى بويىنشا، جالپى، 2025 جىلعا دەيىن جيھاز جانە اعاش وڭدەۋ ونەركاسىبىندە 12 جوبانى ىسكە اسىرۋ جوسپارلانعان. 

2022 جىلدىڭ ءبىرىنشى توقسانىنىڭ قورىتىندىسى بويىنشا جيھاز ونىمدەرىنىڭ ءوندىرىس كولەمى 16،4 ملرد تەڭگەنى قۇراعان. اتاپ ايتقاندا، قاڭقاسى مەتالدان جاسالعان وتىرۋعا ارنالعان جيھاز ءوندىرىسى 6%-عا، كەڭسەگە ارنالعان اعاشتان جاسالعان جيھاز 30،4%-عا، اس ءۇي جيھازى 33،5%-عا، سونداي-اق جاتىن بولمەگە ارنالعان اعاشتان جاسالعان جيھازدار ءوندىرىسى 2،2%-عا ارتقان.

«بۇگىندە قازاقستاندا جيھاز ءوندىرىسى قارقىندى دامىپ كەلەدى. سالادا جاڭا كاسىپورىندار اشىلىپ، ءوندىرىس وشاقتارىنىڭ وتاندىق نارىقتاعى باسەكەگە قابىلەتتىلىگى ارتۋدا. جالپى، ەلىمىزدە تۇرعىن ءۇي قۇرىلىسى جىلدان جىلعا بەلسەندى جۇرگىزىلۋىنە بايلانىستى جيھاز ونىمدەرىنە دەگەن سۇرانىس تا جوعارى بولىپ وتىر»، – دەيدى سالا ماماندارى.

ايتا كەتەرلىگى، وتاندىق جيھاز ونەركاسىبىنىڭ ونىمدەرى كورشى ەلدەردە دە ۇلكەن سۇرانىسقا يە. جىل باسىنان بەرى جيھاز ونىمدەرى ەكسپورتىنىڭ نەگىزگى كولەمى قىرعىزستان، وزبەكستان، گەرمانياعا جونەلتىلگەن. سۇرانىسقا يە تاۋارلاردىڭ قاتارىندا پلاستماسسا مەن مەتالدان جاسالعان جانە جاتىن بولمەگە ارنالعان اعاشتان دايىندالعان جيھاز سىندى تاۋارلار بار.