2025 جىلعى 30 ساۋىردە ق ر وقۋ-اعارتۋ مينيسترلىگى جەتىم بالالار مەن اتا-اناسىنىڭ قامقورلىعىنسىز قالعان بالالارعا تالىمگەر بولعىسى كەلەتىن ازاماتتار ءۇشىن مىندەتتى وقىتۋدى ەنگىزەتىن بۇيرىق شىعاردى. وقۋ كۋرسىن اياقتاعاننان كەيىن، تالىمگەرگە بىلىكتىلىگىن راستايتىن سەرتيفيكات بەرىلەدى، دەپ حابارلايدى aqshamnews.kz
وقىتۋدى تالىمگەرلىكپەن اينالىساتىن ۇيىمدار جۇرگىزەدى. كانديداتتار جازباشا ءوتىنىش بەرىپ، قاجەتتى قۇجاتتاردى تاپسىرادى. وقۋ ۇزاقتىعى ەكى اپتادان اسپايدى. كۋرستى اياقتاعان سوڭ تەستىلەۋ وتكىزىلەدى، ونى ءساتتى تاپسىرعان ازاماتتارعا سەرتيفيكات بەرىلەدى.
«تالىمگەرلەردى مىندەتتى سەرتيفيكاتتاۋ — اتا-اناسىنىڭ قامقورلىعىنسىز قالعان بالالارعا ساپالى قولداۋ كورسەتۋدى قامتاماسىز ەتۋدىڭ ماڭىزدى قادامى. دايىندىقتان وتكەن تالىمگەرلەر بالالاردىڭ الەۋمەتتەنۋىنە جانە ەرەسەك ومىرگە دايىندىعىنا ءتيىمدى كومەكتەسە الادى دەپ سەنەمىز»، — دەپ اتاپ ءوتتى ق ر وقۋ-اعارتۋ مينيسترلىگى بالالاردىڭ قۇقىقتارىن قورعاۋ كوميتەتىنىڭ ءتوراعاسى ناسىمجان وسپانوۆا.
تالىمگەر بولۋعا ۇمىتكەر — ق ر كامەلەتكە تولعان ازاماتى، قورعانشىلار مەن قامقورشىلارعا قويىلاتىن تالاپتارعا سايكەس كەلۋى ءتيىس. تالىمگەرلىك قىزمەت اقىسىز تۇردە جۇزەگە اسىرىلادى جانە 10 جاستان اسقان، جەتىم بالالار مەن اتا-اناسىنىڭ قامقورلىعىنسىز قالعان بالالارعا ارنالعان ءبىلىم بەرۋ ۇيىمدارىندا تاربيەلەنىپ جاتقان بالالارعا قولداۋ كورسەتۋگە باعىتتالعان.
ەسكە سالساق، قازاقستاندا تالىمگەرلىك ينستيتۋتى 2024 جىلى ەنگىزىلگەن بولاتىن. ونىڭ ماقساتى — جەتىم جانە اتا-اناسىنىڭ قامقورلىعىنسىز قالعان بالالارعا جەكە قولداۋ كورسەتۋ. بۇل مەحانيزم تاربيەلەنۋشىلەردى ءوز بەتىنشە ءومىر سۇرۋگە دايىنداۋعا ىقپال ەتەدى.