جاتاقحانا سالۋ ىسىنە جەكە مەردىگەر كومپانيالار تارتىلادى.
قازاقستاندىق مينيستر جاتاقحانالارداعى ورىن تاپشىلىعى ماسەلەسىن شەشۋ جولدارىن ايتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«ءبىز جاتاقحاناداعى ورىن تاپشىلىعىن شەشۋ ءۇشىن بىرنەشە شارالاردى قابىلدادىق. بىرىنشىدەن، جوعارى وقۋ ورنى بوس تۇرعان نەمەسە تولىق بولماعان حوستەل، قوناق ۇيلەرمەن كەلىسىمشارت جاسادى. ولاردان 10 ايلىق، ياعني ۇزاق مەرزىمگە تولەماقىلارى ءبىر دەڭگەيدە كەلىسىلگەن كەلىسىمشارتتار ارقىلى بىرنەشە مىڭ توسەك-ورىندى الدىق. ەكىنشىدەن، يندۋستريا جانە ينفروقۇرىلىمدىق دامۋ، دەنساۋلىق ساقتاۋ مينيسترلىگىمەن كەلىسىپ، ءقازىر ستۋدەنتتەر تۇرىپ جاتقان جاتاقحانالاردىڭ سانيتارلىق نورمالارىنا وزگەرىس ەنگىزدىك. مىسالى، جاتاقحانالارداعى قويمالار، بوس جاتقان زالداردى ستۋدەنتتەر تۇرا الاتىنداي ەتىپ جاساقتادىق. ونىڭ ارقاسىندا بىرنەشە مىڭ جاڭا ورىندى شىعارىپ الدىق»، - دەپ جاۋاپ بەردى عىلىم جانە جوعارى ءبىلىم ءمينيسترى ساياسات نۇربەك.
ساياسات نۇربەكتىڭ ايتۋىنشا، كەلەر جىلدان باستاپ جاتاقحانا سالۋ ىسىنە جەكە مەردىگەر كومپانيالار تارتىلادى. ول ءۇشىن قۇرىلىس كاسىپورىندارىمەن بىرگە جاسالاتىن شارت تالاپتارىنا وزگەرىس ەنگىزىلگەن.
«ءۇشىنشى ءارى نەگىزگى شارا - ءبىزدىڭ مينيسترلىكتىڭ جانىنداعى قارجى ورتالىعى مەردىگەر كومپانيالارمەن، قۇرىلىس كومپانيالارىمەن شارتتاردى جاڭارتتى. نەگە دەسەڭىز، باسىندا كوپ مەردىگەر جاتاقاحانا قۇرىلىسىنا كىرمەۋگە نەمەسە بۇرىنعى شارتتان باس تارتۋعا تىرىساتىن. ويتكەنى، ونىڭ مەرزىمى ۇزاق ەدى – 8 جىل. سونىمەن قاتار، تولەمدەرى دە جوعارى ەمەس. بۇل رەتتە 50-دەن استام مەردىگەر كومپانيامەن كەزدەسۋلەر وتكىزىپ، سول شارتتاردى ولاردىڭ تالاپتارىنا ىڭعايلاپ، وسى ايدىڭ باسىندا ۇكىمەتتىڭ ءتيىستى قاۋلىسى قابىلداندى. كەلەسى جىلدان باستاپ وسى ماسەلەنى تۇبەگەيلى شەشۋ ءۇشىن قۇرىلىس كومپانيالارىمەن جۇمىس ىستەيمىز. «اتامەكەن» ۇكپ دا بۇعان بەلسەندى قاتىستى، ياعني 100 پايىز بۇل ماسەلەنى شەشۋ ءۇشىن ءبىز جەكەمەنشىك سەكتورمەن جۇمىس ىستەۋىمىز كەرەك. ۇكىمەتتىڭ ءوزىنىڭ تولىق شاماسى دا كەلمەيدى. سونىمەن قاتار، دەموگرافيالىق ءوسىم جىلدان-جىلعا قارقىن الىپ كەلە جاتىر»، - دەدى ساياسات نۇربەك.