ۇكىمەت پەن دۇنيەجۇزىلىك جانۋارلار دەنساۋلىعى ۇيىمى اراسىنداعى كەلىسىمدى جۇزەگە اسىرۋ اياسىندا، اشم ۆبجقك 2025 جىلعا ۆەتەريناريالىق قىزمەتتىڭ سيمۋلياسيالىق وقۋ-جاتتىعۋلارىنىڭ جوسپارىن ازىرلەدى.
وسى جوسپارعا سايكەس، 18 اسا ءقاۋىپتى اۋىرۋلار وشاقتارىنا قارسى ءىس-قيمىل بويىنشا وقۋ-جاتتىعۋلار جىل بويى جۇرگىزىلەدى، دەپ حابارلايدى aqshamnews.kz اشم-گە سىلتەمە جاساپ.
سونداي-اق، قازاقستاننىڭ 16 وبلىسىنداعى ۆەتەرينارلىق باقىلاۋ بەكەتتەرىندە يمپورت، ەكسپورت جانە ترانزيت راسىمدەرىن جۇرگىزۋ كەزىندە ۆەتەرينارلىق باقىلاۋ بويىنشا سيمۋلياسيالىق وقۋ-جاتتىعۋلار جوسپارلانعان.
وسىعان بايلانىستى تۇركىستان وبلىسىندا ءسىبىر جاراسى بويىنشا وقۋ-جاتتىعۋلارى وتكىزىلدى، وعان 70 ۆەتەريناريالىق قىزمەتكەر قاتىسىپ، 14-تەن استام ارنايى كولىك بىرلىگى پايدالانىلدى. وقۋ-جاتتىعۋلار بارىسىندا قىزمەتتەردىڭ ۆەدومستۆوارالىق ءوزارا ءىس-قيمىل، دياگنوستيكا، اقپاراتتاندىرۋ، لوكاليزاسيالاۋ، جويۋ جانە ينفەكسيالىق اۋرۋدىڭ الدىن الۋ ماسەلەلەرى پىسىقتالدى. سونداي-اق، وبلىستىق جانە اۋداندىق ۆەتەريناريالىق قىزمەت بولىمشەلەرىنىڭ توتەنشە جاعدايدىڭ سالدارىن جويۋعا دايىندىعى تەكسەرىلدى.
وقۋ-جاتتىعۋلارعا قاتىسۋشىلار قولايسىز پۋنكتتىڭ شەكاراسىن بەلگىلەۋدى، اۋرۋ وشاعىندا جويۋ ءىس-شارالارىن جۇرگىزۋدى، تاۋەكەل ايماعىندا الدىن الۋ ءىس-شارالارىن ىسكە اسىرۋدى قوسا العاندا، دالا جۇمىسىنىڭ داعدىلارىن كورسەتتى.
دۇنيەجۇزىلىك جانۋارلار دەنساۋلىعى ۇيىمىنىڭ ۇسىنىستارىنا سايكەس ءسىبىر جاراسى وشاعى پايدا بولعان جاعدايدا ۆەتەرينارلىق قىزمەتتىڭ جەدەل ارەكەت ەتۋگە دايىندىعى راستالدى.
وسىنداي وقۋ-جاتتىعۋلار قازاقستاننىڭ بارلىق وڭىرىندە وتكىزىلەتىن بولادى.