بولاشاق زاۋىتتاردا جول-قۇرىلىس تەحنيكاسى مەن تۇرمىستىق اس ءۇي پليتالارى شىعارىلادى.
ق ر يندۋستريا جانە ينفراقۇرىلىمدىق دامۋ ءمينيسترى بەيبىت اتامقۇلوۆ ەلىمىزدە مامانداندىرىلعان ارنايى تەحنيكالار قۇراستىرۋ جونىندەگى جوبالاردى ىسكە اسىراتىن شەتەلدىك جانە وتاندىق كومپانيالاردىڭ باسشىلارىمەن كەزدەستى، دەپ حابارلايدى Almaty-akshamy.kz
ءمينيستردىڭ JCB كومپانياسىنىڭ رەسەي مەن تمد-داعى جەتەكشىسى جانە Orbis Kazakhstan كومپانياسىنىڭ باس ديرەكتورى نيكولاس گريلسپەن كەزدەسۋى بارىسىندا تاراپتار JCB برەندىنىڭ مامانداندىرىلعان جول-قۇرىلىس تەحنيكاسىن قۇراستىراتىن ءوندىرىس اشۋ تۋرالى جوباسىن تالقىلادى. نيكولاس گريلس ق ر ۇكىمەتى تاراپىنان وتاندىق وندىرۋشىلەرگە ۇلكەن قولداۋ كورسەتىلەتىنىن اتاپ ءوتىپ، JCB كومپانياسىنىڭ قازاقستان نارىعىنا ۇزاق مەرزىمگە كەلەتىنى تۋرالى نيەتىن ءبىلدىردى.
Orbis Kazakhstan كومپانياسى وزبەكستاننىڭ Artel Electronics كومپانياسىمەن بىرلەسە وتىرىپ، تۇركىستان وبلىسىندا تۇرمىستىق اس ءۇي پليتالارىن شىعاراتىن زاۋىت سالۋ جوسپارىن جاريالادى. زاۋىتتىڭ وندىرىستىك قۋاتى جىلىنا 1 ملن. تۇرمىستىق تەحنيكانى قۇرايدى. بۇل جوبا قازاقستاننىڭ ەكسپورتتىق الەۋەتىن ارتتىرىپ، نارىقتى وتاندىق ءوندىرىستىڭ ساپالى ءارى قولجەتىمدى تۇرمىستىق تەحنيكاسىمەن قامتاماسىز ەتەدى.
مينيستر وتاندىق ءوندىرىستى دامىتۋعا باعىتتالعان مەملەكەتتىك ساياسات شەڭبەرىندە بۇل باستامالاردى قولداۋعا دايىن ەكەنىن ءبىلدىرىپ، قازاقستان رەسپۋبليكاسىنىڭ كولىك قۇرالدارى مەن ءتۇرلى تەحنيكانى قۇراستىرۋ جونىندەگى ءىرى ورتالىق رەتىندە الەمدىك تىزبەككە ەنۋى قاجەتتىگى تۋرالى ايتتى.