قۇزىرەت-فۋنكسيالارى ەسەپ كوميتەتىنە ۇقساس.
قازاقستاندا ەسەپ كوميتەتى جويىلىپ، ورنىنا جاڭا ۇيىم قۇرىلعالى جاتىر. ول تۋرالى ەرەجەنى بەكىتەتىن پرەزيدەنت جارلىعىنىڭ جوباسى جاريالاندى، دەپ حابارلايدى Almaty-akshamy.kz Baq.kz سىلتەمە جاساپ.
رەفەرەندۋمدا قابىلدانعان اتا زاڭعا سايكەس، ەسەپ كوميتەتى تاريح قويناۋىنا كەتىپ، مەملەكەتتە جوعارى اۋديتورلىق پالاتا (جاپ) قۇرىلۋعا ءتيىس. ونىڭ ءتوراعاسىن – جوعارى اۋديتوردى پرەزيدەنت تاعايىندايدى. پالاتا ءتوراعاسى بۇل لاۋازىمىن 5 جىل اتقارادى، مەملەكەت باسشىسىنا ۇناسا، ورىنتاعىن تاعى 5 جىل ساقتاي الادى.
ءماجىلىس جوعارى اۋديتوردىڭ ەسەبىن جىلىنا ەكى رەت تىڭدايدى. ءبىراق ەسەبى ۇناماسا، قىزمەتىنە كوڭىلى تولماسا، ونى جۇمىسىنان قۋا المايدى. پارلامەنتتە ونداي قۇزىر جوق. پارلامەنتشىلەردىڭ قولىنان كەلەتىنى – ءماجىلىس پەن سەناتتىڭ ءارقايسىسى جاپ-تىڭ ءۇش مۇشەسىن 5 جىل مەرزىمگە قىزمەتكە تاعايىندايدى.
بيىل جاڭارعان كونستيتۋسيانىڭ 99-بابىندا: "كونستيتۋسيالىق سوت جانە جوعارى اۋديتورلىق پالاتا قۇرىلعانعا دەيىن كونستيتۋسيالىق كەڭەستىڭ جانە رەسپۋبليكالىق بيۋدجەتتىڭ اتقارىلۋىن باقىلاۋ جونىندەگى ەسەپ كوميتەتىنىڭ ءتوراعالارى مەن مۇشەلەرى ءوز وكىلەتتىكتەرىن ساقتايدى" دەلىنگەن.
بۇل پالاتانىڭ مىندەتتەرى رەتىندە "حالىقتىڭ تۇرمىس جاعدايلارى ساپاسىنىڭ قارقىندى ءوسۋىن جانە ەلدىڭ ۇلتتىق قاۋىپسىزدىگىن قامتاماسىز ەتۋ ءۇشىن ۇلتتىق رەسۋرستاردىڭ (قارجىلىق، تابيعي، وندىرىستىك، كادرلىق، اقپاراتتىق) ءتيىمدى جانە زاڭدى باسقارىلۋىن تالداۋ، باعالاۋ جانە تەكسەرۋ" بەلگىلەنگەن. قۇزىرەت-فۋنكسيالارى ەسەپ كوميتەتىنە ۇقساس.