قازاقستاندا جاڭا اۋەجاي سالىنادى

اۋەجاي «قورعاس – شىعىس قاقپاسى» ارنايى ەكونوميكالىق ايماعىندا سالىنادى.

قۇجاتتى قازاقستانعا گەرمانيا كانسلەرىنىڭ رەسمي ساپارى بارىسىندا ق ر كولىك ۆيسە-مينيسترى تالعات لاستايەۆ پەن SKYHANSA باسقارۋشى سەرىكتەسى يۋرگەن گرەسباح قول قويدى.

قازاقستان-نەمىس بىرلەسكەن جوباسى ءۇش كەزەڭدە جۇزەگە اسىرىلادى دەپ كۇتىلۋدە. جالپى، جوباعا 500 ميلليون دوللاردان استام جەكەمەنشىك ينۆەستيسيا سالىنىپ، 300-دەن استام تۇراقتى جۇمىس ورنى قۇرىلماق.

«جوبا اۋەجاي ينفراقۇرىلىمىن ءۇش كەزەڭدە سالۋدى، ساعاتىنا 500 ادامعا دەيىن قابىلداي الاتىن جولاۋشىلار تەرمينالىن، جىلىنا 550 000 توننا وتىن ساقتاۋعا ارنالعان قويمانى، جىلىنا 250 000 تونناعا دەيىن جۇك وڭدەۋگە ارنالعان جۇك تەرمينالىن سالۋدى كوزدەيدى»، – دەپ حابارلادى ازاماتتىق اۆياسيا كوميتەتى.

حالىقارالىق اۋەجاي سالۋمەن قاتار، جوبا اۋە كەمەلەرىن جوندەۋگە ارنالعان اۆياسيالىق-تەحنيكالىق ورتالىقتى قۇرۋدى، سونداي-اق تۋريستىك جانە ساۋدا-ويىن-ساۋىق قىزمەتتەرىن دامىتۋدى قامتيدى.

قازىرگى ۋاقىتتا جەتىسۋ وبلىسىنىڭ اكىمدىگى اۋەجاي قۇرىلىسىنا جەر ءبولىپ قويعان. ينۆەستيسيالىق كەلىسىم جاسالعاننان كەيىن، ينۆەستور جوباعا كىرىسەدى.