2025 جىلعا قاراي وتاندىق گاز تاپشىلىعى بولۋى مۇمكىن.
گازدىڭ رەسۋرستىق بازاسىن كەڭەيتۋگە قاتىستى ىنتالاندىرۋ قادامدارى كەرەك. بۇل تۋرالى ماجىلىستەگى ۇكىمەت ساعاتىندا ق ر ەنەرگەتيكا ءمينيسترى بولات اقشولاقوۆ ءمالىم ەتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«جاقىن بولاشاقتا تاۋارلى گازدىڭ نەگىزگى وندىرۋشىلەرى رەتىندە قاشاعان، قاراشىعاناق، تەڭىزشيەۆرويل بولىپ قالادى، ولارعا تاۋارلى گاز رەسۋرستارىنىڭ جالپى كولەمىنىڭ 64 پايىزى تيەسىلى. ءوز قۇرىلىمى بويىنشا قازاقستاندا وندىرىلەتىن گاز ىلەسپە مۇناي گازى بولىپ وتىر، ول نەگىزىنەن وڭدەۋگە ينۆەستيسيالاردى تالاپ ەتەدى»، - دەدى بولات اقشولاقوۆ.
ونىڭ پايىمىنشا، جەر قويناۋىن پايدالانۋشىلاردىڭ رەسۋرستىق بازانى كەڭەيتۋگە مۇددەلىلىگىنىڭ تومەندىگىن ەسكەرە وتىرىپ، ءتيىستى ىنتالاندىرۋ شارالارى قاجەت.
«وسىعان بايلانىستى، گاز جوبالارىنا ارنالعان ىنتالاندىرۋ شارالارى ارقىلى ەلىمىزدىڭ رەسۋرستىق بازاسىن تولىقتىرۋ تۋرالى ماسەلە وزەكتى بولىپ تۇر. قازىرگى ۋاقىتتا رەسۋرستىق بازانى كەڭەيتۋ ءۇشىن قاشاعان كەن ورنىندا گاز وڭدەۋ زاۋىتىن ءۇش كەزەكپەن (1، 2 جانە 6 ملرد تەكشە مەتر) سالۋ بويىنشا جۇمىس جۇرگىزىلىپ جاتىر. ول 2030 جىلعا قاراي تاۋارلى گاز كولەمىن قوسىمشا 6 ملرد تەكشە مەتردەن اسىرۋعا مۇمكىندىك بەرەدى»، - دەدى مينيستر.
وسى ورايدا ول 2021 جىلعى ماۋسىم ايىنان باستاپ قۋاتى 1 ملرد تەكشە مەتر بولاتىن جوبانىڭ ءبىرىنشى كەزەڭى بويىنشا قۇرىلىس-مونتاجداۋ جۇمىستارى بەلسەندى تۇردە جۇرگىزىلىپ جاتقانىن ايتتى. ءبىرىنشى كەزەڭدى 2024 جىلدىڭ باسىندا ىسكە قوسۋ ەسكەرىلگەن.
«اتالعان زاۋىتتى سالۋ كاشاعان جوباسىنىڭ 2-فازاسىن ىسكە اسىرۋ اياسىندا پىسىقتالىپ جاتىر. ول مۇناي ءوندىرىسىن تاۋلىگىنە 400 مىڭ بەررەلدەن 700 مىڭ باررەلگە دەيىن وسىرۋگە مۇمكىندىك بەرەدى. بۇعان قوسا، مينيسترلىك رەسۋرستىق بازانى كەڭەيتۋدى ىنتالاندىرۋ بويىنشا جان-جاقتى جۇمىس جۇرگىزىپ جاتىر»، - دەدى ۆەدومستۆو باسشىسى.