ارنايى الەۋمەتتىك جوبا ىسكە اسىرىلا باستادى.
قازاقستان ۇكىمەتى جۇمىسسىز، ەش جەردى وقىمايتىن جاستاردى قولداۋ ماقساتىندا ارنايى الەۋمەتتىك جوبانى ىسكە اسىرا باستادى، دەپ حابارلايدى Almaty-akshamy.kz.
«ق ر اقدم قولداۋىمەن باتىس قازاقستان وبلىسى بويىنشا «بولاشاق» كورپوراتيۆتىك قورى NEET ساناتىنداعى جاستاردى قولداۋعا باعىتتالعان الەۋمەتتىك جوبانى ىسكە اسىردى»، - دەلىنگەن اقپارات جانە قوعامدىق دامۋ مينيسترلىگىنىڭ باسپا ءسوز قىزمەتىنىڭ حابارلاماسىندا.
باتىس قازاقستان وبلىسى بويىنشا «بولاشاق» كورپوراتيۆتىك قورىنىڭ ديرەكتورى سالتانات تۇمانبايەۆا NEET ساناتىنا كىمدەر جاتاتىنىن جانە ولاردىڭ پروبلەمالارى قالاي شەشىلىپ جاتقانىن ايتىپ بەردى.
«جوبا NEET ساناتىنداعى جاستارعا قولداۋ كورسەتۋدى كوزدەيدى. ءبىز جاستارعا بەلسەندى ءومىر سالتىن جۇرگىزۋگە كومەكتەسۋگە تىرىستىق. NEET – بۇل ءارتۇرلى ەكونوميكالىق نەمەسە الەۋمەتتىك فاكتورلارعا بايلانىستى جۇمىسپەن قامتىلماعان نەمەسە ەش جەردە وقىمايتىن جاستار»، - دەپ اتاپ ءوتتى سالتانات تۇمانبايەۆا.
جوبا اياسىندا رەسپۋبليكالىق جوبالىق كەڭسە قۇرىلعان بولاتىن. مۇندا جاس قازاقستاندىقتار تۇرعىن ۇيگە، جۇمىسقا ورنالاسۋعا، جاستارعا ارنالعان مەملەكەتتىك گرانتتارعا قاتىستى وزدەرىن قىزىقتىرعان سۇراقتارعا جاۋاپ الدى.
«جالپى، 10 مىڭنان استام جاس كەڭەس الدى. سونداي-اق، جوبانى رەسپۋبليكانىڭ 17 وڭىرىندە ساپالى ىسكە اسىرۋ ءۇشىن «جاس وتان» جاستار قاناتىمەن ىنتىماقتاستىق تۋرالى مەموراندۋمعا قول قويىلدى. ءبىز NEET ساناتىنداعى جاستاردى كاسىبي جەتىلدىرۋگە، ولاردى جۇمىسقا ورنالاستىرۋعا، سپورتقا تارتۋعا باعىتتالعان ءتۇرلى ءىس - شارالاردى وتكىزدىك»، - دەپ اتاپ ءوتتى سالتانات تۇمانبايەۆا.
جوبا اياسىندا NEET ساناتىنداعى جاستاردى الەۋمەتتەندىرۋ، ولارمەن اتاۋلى جۇمىس جونىندەگى پراكتيكالىق ۇسىنىستار جيناقتالعان نۇسقاۋلىق تا ازىرلەندى. بۇل – مەملەكەتتىك ورگاندارعا، ۇكىمەتتىك ەمەس ۇيىمدارعا، جاستاردىڭ رەسۋرستىق ورتالىقتارىنا جانە بارلىق مۇددەلى تۇلعالارعا ارنالعان انىقتامالىق قۇرال.
سونىمەن قاتار، 21 كۇندىك مارافون فورماتىندا NEET ساناتىنداعى جاستاردىڭ كاسىبي جانە ومىرلىك داعدىلارىن دامىتۋدىڭ اۆتورلىق باعدارلاماسى ازىرلەندى. باعدارلامانىڭ ەرەكشەلىگى زاماناۋي ترەندتەردىڭ پايدالانىلۋىندا بولسا كەرەك.
«جاس قازاقستاندىقتاردىڭ كوبىسى وقىعىسى نەمەسە جۇمىس ىستەگىسى كەلمەيتىندىگىن مويىنداعان ءجون. ەشكىم ادامنىڭ ءومىرىن وزگەرتۋگە ماجبۇرلەي المايدى. ءبىزدىڭ سەمينارلارعا بەلسەندى ومىرلىك ۇستانىمى بار ادامدار دا قاتىستى. ولار ءوزىن تابا الماي جۇرگەن جاستارعا باعدار بەرە الادى دەپ سەنەمىز»، - دەيدى سالتانات تۇمانبايەۆا.
ونىڭ ايتۋىنشا، جاستار ءۇشىن TEDx كەزدەسۋلەر، شەبەرلىك سىنىپتارى، داعدىلار مەن قۇزىرەتتىلىكتى ارتتىرۋعا باعىتتالعان وقىتۋ كۋرستارى سياقتى ءتۇرلى فورماتتاعى ءىس-شارالار وتكىزىلدى.
ەستەرىڭىزگە سالا كەتەيىك، كاسىبي جانە ومىرلىك داعدىلاردى وقىتۋ باعدارلاماسى ق ر اقپارات جانە قوعامدىق دامۋ مينيسترلىگىنىڭ قولداۋىمەن «ءبىلىم بەرۋ پروسەسىنە جانە ەڭبەككە تارتىلماعان جاستاردى الەۋمەتتەندىرۋ شارالارىن ازىرلەۋ جانە ىسكە اسىرۋ» جوباسى اياسىندا ازىرلەندى.