ءبىر جىلدىڭ ىشىندە تىيىم ورناتۋعا بولادى.
«تەمەكى تۇتىنىنەن ازات قازاقستان ءۇشىن» ۇلتتىق كواليسياسىنىڭ كوشباسشىسى ءجاميلا سادىقوۆا ەلەكتروندى شىلىمنىڭ اكسيزىن قىمباتتاتۋدى ۇسىندى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«قىزدىرىلاتىن تەمەكىنىڭ ءار داناسىنا اكسيز ەنگىزۋدەن بولەك ساۋد ارابياسى مەن بىرىككەن اراب امىرلىكتەرىنىڭ جاقسى تاجىريبەسى بار – ەلەكتروندى شىلىم قۇرىلعىسىنىڭ قۇنىنان 50 پايىز الىم تولەنەدى. مىسالى، ءبىر رەت قولدانۋعا ارنالعان ەلەكتروندى شىلىمنىڭ باعاسى 2 مىڭ تەڭگە بولسا، اكسيزى مىڭ تەڭگە بولادى. سونىڭ ەسەبىنەن قۇنى 3-3،5 مىڭ تەڭگەگە قىمباتتايدى»، - دەدى ءجاميلا سادىقوۆا ورتالىق كوممۋنيكاسيالار قىزمەتىندە وتكەن بريفينگىدە.
ساراپشىنىڭ سوزىنە قاراعاندا، وسىنىڭ ارقاسىندا ەلەكتروندى شىلىمعا بالالاردىڭ قول جەتكىزۋى قيىنداماق.
«ءبىز دە وسىنداي اكسيز ەنگىزسەك، ەلەكتروندى شىلىمنىڭ قولدانىسىن شەكتەپ، سول شەكتەۋلى ساۋدانىڭ وزىنەن جاقسى تابىس كورۋگە مۇمكىندىك الامىز. ياعني ونداي ساياساتتان مەملەكەت ۇتادى. ۋكراينادا ەلەكتروندى شىلىم اكسيزىنەن جىل سايىن 200 ملرد تەڭگەدەي كىرىس ءتۇسىپ وتىرعان. ءبىز جىل سايىن 80 ملرد تەڭگە كىرىس كىرگىزە الامىز. بۇدان تەك تاباك يندۋسترياسى عانا زارداپ شەگەدى»، - دەدى قوعامدىق ۇيىم باسشىسى.
ۇلتتىق كواليسيا جەتەكشىسى قازاقستان اۋماعىندا ەلەكتروندى شىلىمنىڭ اينالىمىن شەكتەۋدى ۇسىنىپ وتىر.
«ازىرگە ۆەيپتەردىڭ (ەلەكتروندى شىلىم – رەد.) اينالىمىنا تىيىم سالىنباعاندىقتان، تەك دەپۋتاتتاردىڭ ۇسىنىسى كۇيىندە قالىپ كەلە جاتقاندىقتان، بۇل نارىقتان سالىق ءوندىرۋ كەرەك. ياعني، نارىقتا بار كەزىندە جاقسى سالىق ءوندىرىپ قالۋ قاجەت. ول بيۋدجەتتىڭ كىرىسىنە تۇسەدى. «ءتۇتىنسىز» شىلىمعا تىيىم 2020 جىلى سالىندى. ەكى ايدىڭ ىشىندە تىيىم كۇشىنە ەندى دە، نارىق ودان اۋىر زارداپ شەككەن جوق. ءقازىر سول كەزدە ەلگە كىرگىزىلىپ ۇلگەرگەن قالدىعى ساتىلىپ جاتىر. كەيىن مۇلدە نارىقتان جوعالادى. دەنساۋلىق ساقتاۋ مينيسترلىگى قولداسا، ۆەيپتەردىڭ ساتىلىمىنا دا ءبىر جىلدىڭ ىشىندە تىيىم ورناتۋعا بولادى»، - دەدى ءجاميلا سادىقوۆا.
بۇعان دەيىن ەلىمىزدە جالپى تەمەكىنىڭ اكسيزى وسەتىنى حابارلانعان ەدى.