ازىرگە ماماندار ستاندارت ازىرلەپ جاتىر.
قازاقستاندا ەلەكتروساموكات پايدالانۋدىڭ ءبىرىڭعاي ەرەجەلەرى ازىرلەنبەك. بۇل تۋرالى ورتالىق كوممۋنيكاسيالار قىزمەتىندە وتكەن بريفينگتە ق ر ىشكى ىستەر مينيسترلىگى جول قاۋىپسىزدىگى باسقارماسى باستىعىنىڭ ورىنباسارى ارمان التىنبەكوۆ ءمالىم ەتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«قازىرگى تاڭدا نورماتيۆتىك اكتىلەردە ەلەكتر ساموكاتتار كولىك قۇرالىنىڭ قانداي دا ءبىر تيپىنە جىكتەلمەگەن. ياعني، قولدانۋ ەرەكشەلىگى مەن تەحنيكالىق ايىرماشىلىقتارىنا قاراي موپەدكە جاتا ما، الدە سكۋتەرگە جاتا ما، ناقتى جىكتەۋ جوق. ونىڭ ۇستىنە زاڭنامادا بۇل كولىك قۇرالدارىنا قويىلاتىن تالاپتاردىڭ بولماۋى ولاردىڭ نارىقتا ساتىلۋ جانە قولدانۋ ەرەجەلەرىن، قاۋىپسىزدىك بويىنشا قويىلاتىن تالاپتارى مەن سول تالاپقا سايكەستىگىن باعالاۋ تەتىكتەرىن، ماركىلەۋدىڭ ءبىرىڭعاي تالاپتارىن تەحنيكالىق رەتتەۋگە مۇمكىندىك بەرمەيدى»، - دەدى ارمان ايتىبەكوۆ.
ونىڭ سوزىنە قاراعاندا، قازىرگى تاڭدا ەلەكتر ساموكاتتارعا قولدانىلاتىن ستاندارتتار ازىرلەنىپ جاتىر.
«بۇگىندە ۇكىمەتتىڭ تاپسىرماسى بويىنشا مۇددەلى مەملەكەتتىك ورگاندارمەن بىرگە وسى جۇمىستى جۇرگىزىپ جاتىرمىز. ساۋدا جانە ينتەگراسيا مينيسترلىگى كولىكتىڭ وسى تيپىنە ستاندارتتار ازىرلەپ جاتىر. بۇل كولىك قۇرالى ما الدە قۇرىلعىسى ما؟ وسىنى ءتۇسىنىپ الۋىمىز كەرەك. ءبىرقاتار سەبەپكە بايلانىستى ولاردى كولىك قۇرالىنا جاتقىزا المايمىز. ويتكەنى تەجەگىش جۇيەسى، بۇرىلىس شامدارى مەن جارىق شامدارى جوق دەگەن سياقتى. ستاندارت دايىن بولعان سوڭ، تيپتىك ەرەجەلەر جاسايمىز. وسىلايشا ولارعا ءبىرىڭعاي ەرەجەلەر قولدانا الامىز»، - دەدى ءىىم وكىلى.
ءىىم دەرەگى بويىنشا، بىلتىر موپەدتەر مەن ساموكات تەپكەن 68 ادام جاراقات العان.