تۇركىستان وبلىسىندا «جاسىل» ءتۋريزمدى دامىتۋ ءۇشىن دەمالىس ايماقتارىنا جۇكتەمەنى تەڭدەي ءبولۋ كوزدەلگەن، دەپ حابارلايدى Almaty-akshamy.kz. سونىمەن قاتار ساياحاتشىلار كوپ باراتىن اۋماقتاردا ەكولوگيالىق اعارتۋ جۇمىستارى كۇشەيتىلەدى.
تۋريستەر ءجيى كەلەتىن جەردىڭ ءبىرى – سايرام-وگەم ۇلتتىق مەملەكەتتىك تابيعي پاركى. ءقازىر مۇندا جاڭا تۋريستىك باعىتتار اشىلىپ جاتىر. تازا اۋا، قايتالانباس سۇلۋ تابيعات. سيرەك كەزدەسەتىن اڭ مەن قۇستار. سوڭعى ۋاقىتتا ەلىمىزدىڭ وڭتۇستىك تاۋلى ايماقتارىنا ساياحاتتاۋشىلار قاتارى ارتقان. وسىعان وراي جاڭا تۋريستىك باعىتتار اشىلا باستادى، -دەپ جازدى «حابار 24». تۋريستەرگە باعىت-باعداردى وتباسىلىق جۇپ ەلەنا مەن نايل كورسەتەدى. ولاردىڭ قازاقستاننىڭ عاجايىپ تابيعاتىن تانىستىرىپ كەلە جاتقانىنا 15 جىل ءوتىپتى. ايتۋلارىنشا، ساياحاتشىلار تىلسىم تابيعات اياسىندا دەمالعاندى ۇناتادى. اسىرەسە وركەنيەتتەن تىس، ادام اياعى باسپاعان جەرلەردى تاڭدايدى. دەمەك جابايى تابيعات پەن مۇلگىگەن تىنىشتىقتى قالايدى.
- ەكوتۋريزم قاتتى دامىپ جاتىر. مەنىڭ ويىمشا، قىزىعۋشىلىق پاندەميا كەزىنەن باستالدى. دەمالۋشىلار قاتارى كۇننەن كۇنگە ارتىپ كەلەدى. ادامدار سۇلۋ تابيعاتتى ءوز كوزىمەن كورۋ ءۇشىن كەلەدى. قيىندىقتارعا قارامايدى. كۇردەلى، سوقپاقتى جولداردى ءجۇرىپ وتەدى،-دەيدى ەكسكۋرسيا جەتەكشىسى ەلەنا بەلوۆا.
تۇركىستان وبلىسىندا سايرام–وگەم ۇلتتىق تابيعي پاركى جوعارى قىزىعۋشىلىققا يە. ول باتىس تيان-شان تاۋىنىڭ سولتۇستىك–شىعىسىندا ورنالاسقان. بىلتىر وسى جەرگە 69 مىڭ ادام ساياحات قۇرعان. ال بيىل تاۋ بوكتەرىندەگى ادەمى جەردى كورۋگە اسىققاندار سانى بۇدان دا كوپ. تومەنگى سايرام كولى – ۇلتتىق تابيعي ساياباقتىڭ ەڭ تانىمال ورىننىڭ ءبىرى. ءبىراق بۇل جەرگە جەتۋ ءۇشىن تۋريستەر 11 شاقىرىمدىق بۇرالمالى تاۋ سوقپاقتارىن جاياۋ ءوتۋى كەرەك. بيىل تۋريستىك باعىتتاردى اباتتاندىرۋ جۇمىستارى قولعا الىندى. ادام اياعى كوبەيگەن سايىن باسقا دا ماسەلەلەر تۋىندايتىنى – اقيقات.
- تۇرمىستىق قالدىقتار بار. ءورت ءقاۋپى تۋىندايدى. وسىعان بايلانىستى قولدانىستاعى زاڭناماعا كوپتەگەن وزگەرىستەر ەنگىزىلدى. وت جاعۋعا قاتاڭ تىيىم سالىنعان. باقىلاۋ-وتكىزۋ قوسىندا قاۋىپسىزدىك شارالارى تۋرالى ءار ادامعا جەكە تۇسىندىرىلەدى، -دەيدى سايرام-وگەم ۇلتتىق مەملەكەتتىك تابيعي پاركى باس ديرەكتورىنىڭ م.ا. شىڭعىس شۇمەنوۆ.
- ءبىز كوپتەگەن جىلدار بويى ەرەكشە قورعالاتىن تابيعي اۋماقتاردى جان-جاقتى قولداۋ جۇمىستارىن جۇرگىزىپ كەلەمىز. سول جۇمىستاردىڭ ءبىرى – وسى ەرەكشە قورعالاتىن تابيعي اۋماقتاردا تۇراقتى ەكوتۋريزم جۇمىسىنا قولداۋ كورسەتۋ. باسقارۋ جوسپارلارىن دايىنداپ، سول باسقارۋ جوسپارلارىنىڭ اياسىندا ەكولوگيالىق تۋريزم بويىنشا ماقساتتار، ينديكاتورلار جوسپارلاۋدى كورسەتىپ جانە پيلوتتىق ەرەكشە قورعالاتىن تابيعي اۋماقتارعا ەكوتۋريزمدى دامىتۋ ستراتەگياسىن جاساۋعا وتكەن جىلدارى كومەكتەستىك،-دەيدى قازاقستانداعى بۇۇ بيوالۋانتۇرلىلىك سالاسىنداعى جوبالار مەنەدجەرى مەرۋەرت سارسەمبايەۆا.
سونىمەن كاتار تۋريستىك باعدارلار كاتونقاراعاي ۇلتتىق پاركى مەن «كولساي كولدەرىندە» دە جاڭارتىلدى. قازاقستاندا ورمان-تاۋلاردىڭ، ءشول دالا مەن كولدەردىڭ بيولوگيالىق الۋان تۇرلىلىگىن قامتيتىن 14 ۇلتتىق پارك بار. ەكولوگيا جانە تابيعي رەسۋرستار مينيسترلىگىنىڭ مالىمەتىنە ساي بىلتىر ولاردى تاماشالاۋعا 2 ميلليونعا جۋىق تۋريست كەلگەن. «جاسىل» ءتۋريزمدى دامىتۋعا كەشەندى–بىركەلكى جۇكتەمە بولىنەدى. سونداي-اق ەكولوگيالىق اعارتۋ جۇمىستارىن كۇشەيتۋ كوزدەلىپ وتىر. ەكسكۋرسيالار مەن جورىقتار كەزىندە تابيعاتتى قورعاۋدىڭ ماڭىزدىلىعى تۋرالى اقپاراتتار بەرىلەدى.