ەلىمىز بويىنشا، 149 جىلجىمالى مەديسينالىق كەشەن جۇمىس ىستەپ جاتىر.
بيىل ەلىمىزدىڭ 10 وڭىرىندە 64 مىڭ تۇرعىنعا مەديسينالىق كومەك كورسەتكەن ەكى مەديسينالىق پويىزدىڭ جۇمىسى قايتا جانداندى. بۇل تۋرالى پارلامەنت ماجىلىسىندەگى ۇكىمەت ساعاتىندا ق ر دەنساۋلىق ساقتاۋ ءمينيسترى اجار عينيات ايتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«بيىل پراكتيكالىق دەنساۋلىق ساقتاۋ قاجەتتىلىگىنە سايكەس، وڭىرلەرگە 2981 جاس مامان، ونىڭ ىشىندە اۋىلعا 797 ادام باعىتتالدى. مينيسترلىك اكىمدىكتەرمەن بىرلەسىپ تۇراقتى نەگىزدە مامانداردىڭ كەلۋ مونيتورينگىن جۇزەگە اسىرادى. ال جەرگىلىكتى ورگاندار كەلگەن جاس مامانداردى تۇراقتاندىرۋ باعىتىندا ءتيىستى قادامداردى ىسكە اسىرۋى قاجەت»، - دەدى ا. عينيات اۋىلداعى دەنساۋلىق ساقتاۋ ماسەلەسىن تالقالۋعا ارنالعان ۇكىمەت ساعاتىندا.
ونىڭ ايتۋىنشا، شالعاي اۋىلداردىڭ تۇرعىندارىنا مەديسينالىق قىزمەتتەردى جەتكىزۋ ماقساتىندا كولىك مەديسيناسى دامىعان. مەديسينالىق كومەك جانە كونسۋلتاسيالىق-دياگنوستيكالىق قىزمەتتەر كورسەتەتىن 149 جىلجىمالى مەديسينالىق كەشەن جۇمىس ىستەپ جاتىر.
«بيىل ەلىمىزدىڭ 10 وڭىرىندە (اتىراۋ، اقتوبە، الماتى، اباي، جەتىسۋ، باتىس قازاقستان، شىعىس قازاقستان، قىزىلوردا، پاۆلودار، ماڭعىستاۋ وبلىستارى) 64 مىڭ تۇرعىنعا مەديسينالىق كومەك كورسەتكەن ەكى «جاردەم» جانە «سالاماتتى قازاقستان» مەديسينالىق پويىزىنىڭ جۇمىسى قايتا جانداندى. مەديسينالىق اۆياسيانى اۋىل تۇرعىندارىن تاسىمالدايتىن جانە شۇعىل كومەك كورسەتەتىن 33 اۋە كەمەسى (20 ۇشاق جانە 13 تىكۇشاق) جۇزەگە اسىرادى. اۋىلدا جەدەل مەديسينالىق كومەك كورسەتۋ ءۇشىن 595 بريگادا جۇمىس ىستەيدى، وسى باعىتتا 1،5 ملن شاقىرتۋعا قىزمەت كورسەتىلدى»، - دەدى مينيستر.
بۇدان بۇرىن حابارلانعانداي، اۋىلداعى كادرلىق قامتاماسىز ەتۋگە تالداۋ جۇرگىزىلىپ، 1 700-دەن استام مەديسينا قىزمەتكەرىنىڭ، ونىڭ ىشىندە 1000-نان استام دارىگەردىڭ تاپشىلىعى انىقتالدى.