بۇگىندە قازاقستاندا 2024 جىلعى 1 شىلدەدەن كەيىن وندىرىلگەن بارلىق دارىلىك زاتتار مىندەتتى تاڭبالاۋعا جاتادى. جاڭا قاداعالاۋ تەتىگى ءدارىنىڭ زاۋىتتان باستاپ ءدارىحانادا ساتىلۋىنا دەيىنگى بۇكىل جولىن قامتيدى.
دسم بۇل جۇيەنىڭ ءىس جۇزىندە قالاي جۇمىس ىستەيتىنىن تۇسىندىرەدى
تاڭبالاۋ قانداي اقپاراتتى قامتيدى؟
2024 جىلعى 1 شىلدەدەن كەيىن وندىرىلگەن بارلىق دارىلىك زاتتاردا بىرەگەي Data Matrix كودى بولۋى ءتيىس. ەندى ءاربىر ساتىپ الۋشى «Naqty Onim» قوسىمشاسى ارقىلى وسى بىرەگەي كودتى بىرنەشە سەكۋندتا سكانەرلەپ، ءدارىنىڭ ءتۇپنۇسقالىعى مەن زاڭدىلىعىنا كوز جەتكىزە الادى. تاڭبالاۋ دارى-دارمەك تۋرالى تولىق اقپاراتتى قامتيدى: اتاۋى، سانى، دوزاسى، ءوندىرۋشىسى جانە قوزعالىس جولى.
سيفرلىق تاڭبالاۋ دارىلىك زاتتار اينالىمىنىڭ اشىقتىعىن قامتاماسىز ەتىپ، جالعان ونىمدەرمەن كۇرەسۋگە جانە ازاماتتاردىڭ دەنساۋلىعىنا تونەتىن قاۋىپتەردى ازايتۋعا ىقپال ەتەدى.
دارىلەردى كىم تاڭبالاۋى كەرەك؟
وندىرۋشىلەر، يمپورتتاۋشىلار، ديستريبيۋتورلار، ءدارىحانالار مەن مەديسينالىق ۇيىمدار – دارىلىك زاتتار اينالىمىنا قاتىسۋشىلاردىڭ بارلىعى تanba تاۋارلاردى تاڭبالاۋ مەن قاداعالاۋ جونىندەگى ءبىرىڭعاي وپەراتور (بۇدان ءارى – ءبىرىڭعاي وپەراتور) جۇيەسىندە تىركەلۋى ءتيىس. تىركەلگەننەن كەيىن ولارعا جەكە كابينەت اشىلادى، وندا تاڭبالاۋ كودتارىمەن جۇمىس جۇرگىزىلىپ، پرەپاراتاردىڭ بارلىق كەزەڭدەگى قوزعالىسى كورسەتىلەدى.
بۇل رەتتە، «قازاقستان رەسپۋبليكاسىندا ۋاقىتشا بولاتىن شەتەلدىكتەر مەن ازاماتتىعى جوق ادامدارعا جەكە سايكەستەندىرۋ ءنومىرىن بەرۋ جانە تۇزەتۋ قاعيدالارى» تۋرالى بۇيرىققا سايكەس، شەتەلدىك وندىرۋشىلەر دە وتاندىق كومپانيالارمەن تەڭ دارەجەدە تاڭبالاۋ جۇيەسىندە ءوز بەتىنشە جۇمىس ىستەي الادى. بۇدان بولەك، شەتەلدىك كومپانيا ءۇشىن بىرەگەي كودتاردى قازاقستاندىق يمپورتتاۋشى دا تاپسىرىسپەن الا الادى.
تاڭبالاۋ جانە قاداعالاۋ جۇيەسى قالاي جۇمىس ىستەيدى؟
دارىلىك زاتتاردى اينالىمعا ەنگىزبەستەن بۇرىن ءوندىرۋشى ءبىرىڭعاي وپەراتوردان بىرەگەي Data Matrix كودتارىن تاپسىرىسپەن الىپ، ولاردى قاپتاماعا جاپسىرادى. وسىلايشا دارىلەر تۋرالى اقپارات تاڭبالاۋ جانە قاداعالاۋ اقپاراتتىق جۇيەسىنە تۇسەدى.
دارىلىك زاتتاردىڭ اينالىمىنداعى ەكىنشى بۋىن – يمپورتتاۋشىلار مەن ديستريبيۋتورلار بولىپ تابىلادى. بۇل كەزەڭدە اينالىمنىڭ قاتىسۋشىلارى الدىن الا تاڭبالانعان پرەپاراتتاردى الادى. ەگەر كود وقىلماسا نەمەسە جۇيەدە تىركەلمەسە، مۇنداي پرەپاراتتى ساتۋعا نەمەسە پايدالانۋعا رۇقسات ەتىلمەيدى.
قازاقستاندا دارىلىك زاتتاردى تاڭبالاۋ تىزبەگىنىڭ سوڭعى كەزەڭىندە ءدارىحانالار مەن مەديسينالىق ۇيىمدار تۇر. پرەپاراتتاردى سوڭعى تۇتىنۋشىعا – ساتىپ الۋشىعا نەمەسە پاسيەنتكە ءدال وسى جەردە بەرىلەدى. ءاربىر كەزەڭ ءبىرىڭعاي وپەراتور جۇيەسىندە ەسەپتىلىكپەن بىرگە جۇرەدى.
ءدارىحانالار مەن مەديسينالىق ۇيىمدار پايدالاناتىن جۇيەلەر تاۋارلاردى تاڭبالاۋ جانە قاداعالاۋ اقپاراتتىق جۇيەسىمەن بىرىكتىرىلگەن. پرەپاراتتى ساتقاننان نەمەسە پاسيەنتكە بەرگەننەن كەيىنگى اقپارات ءبىرىڭعاي وپەراتور جۇيەسىنە جىبەرىلىپ، دارىلىك زات اينالىمنان شىعارىلادى.