قازاقستاندا مەديسينالىق قاتەلىكتەردەن زارداپ شەككەن ازاماتتار دەنساۋلىعىنا كەلگەن زيان ءۇشىن ساقتاندىرۋ تولەمدەرىن الا الادى. ەندى مەديسينالىق ۇيىمدار مەن جەكە دارىگەرلەر وزدەرىنىڭ كاسىبي قىزمەتىن ساقتاندىرۋعا مىندەتتى بولادى، دەپ حابارلايدى aqshamnews.kz.
مەديسينالىق قاتەلىك سالدارىنان كەلتىرىلگەن زياندى انىقتاۋ ءۇشىن پاسيەنت نەمەسە ونىڭ جاقىن تۋىستارى دەنساۋلىق ساقتاۋ سۋبەكتىسىنە ارىز بەرۋى ءتيىس. الدىمەن تاۋەلسىز ساراپشىلار كوميسسياسى شەشىم قابىلدايدى. كوميسسيا قۇرامىنا سالا ماماندارى، كاسىبي مەديسينالىق قاۋىمداستىقتاردىڭ وكىلدەرى جانە ساقتاندىرۋ ۇيىمدارىنىڭ ساراپشىلارى كىرەدى.
ساقتاندىرۋ تولەمدەرىنىڭ ەڭ تومەنگى مولشەرلەرى كەلەسىدەي بولادى: ەگەر پاسيەنتكە ءۇشىنشى، ەكىنشى نەمەسە ءبىرىنشى توپتاعى مۇگەدەكتىك بەلگىلەنسە، تولەمدەر 500، 600 جانە 800 ايلىق ەسەپتىك كورسەتكىشكە تەڭ، بۇل شامامەن 1،8 ملن، 2،2 ملن جانە 2،9 ملن تەڭگە بولادى. ال مۇگەدەك بالاعا تولەنەتىن تولەم 500 اەك (1،8 ملن تەڭگە) قۇرايدى. ءولىم جاعدايىندا تولەم 3 000 اەك (شامامەن 11 ملن تەڭگە) دەيىن جەتەدى. مۇگەدەكتىك انىقتالماعان جاعدايدا، دەنساۋلىققا زيان كەلتىرۋگە بايلانىستى تولەم 300 اەك-كە دەيىن (1،1 ملن تەڭگە) بولادى.