زاڭ جوباسى ءبىرىنشى وقىلىمدا ماقۇلداندى.
بۇگىن ءماجىلىستىڭ جالپى وتىرىسىندا دەنساۋلىق ساقتاۋ ماسەلەسىنە ارنالعان زاڭ جوباسىن تالقىلاۋ كەزىندە دەنساۋلىق ساقتاۋ ءمينيسترى اجار عينيات مەديسينا نەمەسە فارماسيەۆتيكا قىزمەتكەرلەرىنە قاتىستى جازالاۋدى جەڭىلدەتۋ ۇسىنىلىپ وتىرعانىن ايتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
ايتا كەتەيىك، بۇگىن ءماجىلىستىڭ جالپى وتىرىسىندا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە دەنساۋلىق ساقتاۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى ءبىرىنشى وقىلىمدا ماقۇلداندى.
«زاڭ جوباسى اياسىندا مەديسينا نەمەسە فارماسيەۆتيكا قىزمەتكەرلەرىنىڭ كاسىبي مىندەتتەرىن تيىسىنشە ورىنداماعانى ءۇشىن قىلمىستىق قۇقىق بۇزۋشىلىقتاردى ىزگىلەندىرۋ جانە قىلمىستىق كودەكستىڭ 317-بابىنىڭ سانكسيالىق شارالارىن جەڭىلدەتۋ بويىنشا نورمالار ۇسىنىلدى. 2018-2020 جىلدارى جەكە جانە زاڭدى تۇلعالاردان 14 123 ءوتىنىش ءتۇستى. ونىڭ ىشىندە قىلمىستىق كودەكستىڭ 317-بابى بويىنشا مەديسينا قىزمەتكەرلەرىنە قاتىستى كاسىبي مىندەتتەرىن تيىسىنشە ورىنداماعانى ءۇشىن جىل سايىن 300-گە جۋىق ءىس قوزعالادى. بۇل رەتتە كوبىنەسە حيرۋرگيالىق بەيىندەگى ماماندارعا قاتىستى بولىپ تۇر»، - دەدى اجار عينيات.
ونىڭ ايتۋىنشا، زاڭ جوباسىندا دەنساۋلىعىنا ابايسىزدا ورتاشا ءارى اۋىر زيان كەلتىرگەنى ءۇشىن ايىپپۇل مولشەرىن جانە قاماۋعا الۋ مەرزىمىن ازايتۋ ەسكەرىلگەن. ناۋقاستىڭ دەنساۋلىعىنا اۋىر زيان كەلتىرگەندە نەمەسە قايتىس بولعاندا، جازانىڭ مەرزىمدەرىن قايتا قاراي وتىرىپ، «باس بوستاندىعىنان ايىرۋ» جازاسىن «باس بوستاندىعىن شەكتەۋگە» اۋىستىرۋ ۇسىنىلىپ وتىر.
«بۇدان بۇرىن دەنساۋلىق ساقتاۋ مينيسترلىگى مەديسينالىق قوعامداستىقتىڭ پىكىرىن ەسكەرە وتىرىپ، جازانى ىزگىلەندىرۋگە بىرنەشە رەت ارەكەت جاساعان بولاتىن»، - دەدى مينيستر.