بارلىق فارماسيەۆتيكالىق ساناتتار اراسىندا ەڭ جوعارى ءوسۋ قارقىنى پاراسەتامول (30%-دان استام) مەن انتيبيوتيكتەردە (21،6%-عا دەيىن) بايقالعان. قازاقستان رەسپۋبليكاسى ستراتەگيالىق جوسپارلاۋ جانە رەفورمالار اگەنتتىگى ۇلتتىق ستاتيستيكا بيۋروسىنىڭ مالىمەتتەرى بويىنشا، 2023 جىلدىڭ اياعىنان 2024 جىلدىڭ باسىنا دەيىن ازيتروميسين مەن «Flemoxin Solutab» باعاسى كۇرت كوتەرىلگەن، دەپ حابارلايدى aqshamnews.kz.
ازيتروميسين باعاسى قاڭتار ايىندا بىردەن 17،9%-عا قىمباتتاعان. اقپان ايىندا پەنيسيلليندىك پرەپارات ساناتىنداعى «Flemoxin Solutab» باعاسى 21،2%-عا شارىقتاپتى. ءتىپتى، سوڭعى سەگىز ايدا بۇل دارى-دارمەك باعاسىنىڭ قىمباتتاۋ قارقىنى بايقالعان. جازدىڭ سوڭىنا قاراي ازيتروميسين باعاسى ءبىرشاما تۇراقتالعانداي بولدى. دەگەنمەن، پرەپارات قۇنىنىڭ ءوسۋ ديناميكاسى ءقازىردىڭ وزىندە 13،6% قۇراعان.
جالپى، قازاقستانداعى دارىلىك زاتتاردىڭ بولشەك ساۋدا نارىعى اعىمداعى جىلدىڭ ءبىرىنشى جارتىجىلدىعىندا كولەمدىك ماندە 8،1%-عا جانە اقشالاي تۇردە 21،6%-عا وسكەن. 2023 جىلدىڭ قاڭتار-ماۋسىم ايلارىمەن سالىستىرعاندا ءوسۋ قارقىنى جوعارى بولادى. Proxima Research International اناليتيكالىق كومپانياسىنىڭ دەرەكتەرىنە سۇيەنسەك، قازاقستاندىقتار ءدارىحانالاردان جالپى سوماسى 326،5 ميلليارد تەڭگەگە ساۋدا جاساپ، 253 ميلليون پاكەت ءتۇرلى دارى-دارمەك ساتىپ العان.
كومپانيا ماماندارى 2024 جىلى اقشالاي تۇردە فارماسيەۆتيكالىق نارىقتىڭ دامۋى «ەڭ الدىمەن فيزيكالىق تۇتىنۋدىڭ وسۋىمەن انىقتالاتىنىن» اتاپ ءوتتى. 2023 جىلى نارىق نەگىزىنەن ينفلياسيا ەسەبىنەن ءوستى. ساراپشىلاردىڭ پىكىرىنشە، بولشەك ساۋدا وسى جىلدىڭ ەكىنشى جارتىسىندا باسەڭدەيدى، ءتىپتى تومەندەۋى مۇمكىن.