ورتالىقتى ماتەريالدىق-تەحنيكالىق جابدىقتاۋ بويىنشا جۇمىستار باستالىپ كەتتى.
قازاقستاندا سەلەكسيونەرلەر قاۋىمداستىعى جانە داقىلداردىڭ ۇلتتىق گەنەتيكالىق بانكى قۇرىلدى، دەپ حابارلايدى Almaty-akshamy.kz Eldala.kz سىلتەمە جاساپ.
«ءبىز قازاقستاندا جۇمىس ىستەيتىن سەلەكسيونەرلەر قاۋىمداستىعىن قۇرىپ جاتىرمىز. وعان نەگىزىنەن ءبىزدىڭ ەنشىلەس ۇيىمداردىڭ قىزمەتكەرلەرى، عالىمدارى كىرەدى. ءبىراق بۇل سەلەكسيونەرلەر قاۋىمداستىعى اشىق، ءبىز بارلىعىن ىنتىماقتاستىققا شاقىرامىز. مۇنداي قوعامدىق ۇيىمدار قاجەتتى زاڭنامالىق اكتىلەردى، مەملەكەتتىك قولداۋ شارالارىن دۇرىس دايىنداۋعا مۇمكىندىك بەرەدى دەپ سانايمىز، ويتكەنى قوعامدىق قاۋىمداستىقتار عالىمداردىڭ، بيزنەستىڭ بارلىق سۇرانىستارىن جيناقتايتىن بولادى»، - دەدى «تۇقىم-2022» تۇقىم كۇنى» كەلىسىمشارت كونفەرەنسياسىندا ۇاعبو باسقارما ءتورايىمى گۇلميرا يسايەۆا.
سونىمەن قاتار، قازاق ەگىنشىلىك جانە وسىمدىك شارۋاشىلىعى عزي بازاسىندا بيىل ۇلتتىق گەنەتيكالىق بانك ىسكە قوسىلادى. ونى قۇرۋ ءۇشىن عالىمدار ۇلكەن جۇمىس اتقاردى.
«ەكسپەديسيالار جۇرگىزىلدى، ءبىزدىڭ ەنشىلەس ۇيىمدارىمىزداعى بارلىق گەنەتيكالىق رەسۋرستاردىڭ بار-جوعى تىزىمدەلدى. بۇل اۋىل شارۋاشىلىعى وسىمدىكتەرىنىڭ 64 مىڭنان استام ۇلگىسى. وسى ورتالىقتى ماتەريالدىق-تەحنيكالىق جابدىقتاۋ بويىنشا جۇمىستار باستالىپ كەتتى. مەنىڭ ويىمشا، بيىل، ارىپتەستەر، ءبىز سىزدەردى وسى ۇلتتىق گەنەتيكالىق بانكتى اشۋعا شاقىرامىز»، - دەپ اتاپ ءوتتى ۇاعبو باسشىسى.
گۇلميرا يسايەۆانىڭ باعالاۋى بويىنشا، حالىقارالىق تالاپتارعا ساي كەلەتىن گەنەتيكالىق بانكتىڭ ءوزىن قۇرۋ پروسەسى بىرنەشە جىلعا سوزىلادى. ءبىراق بۇل باعىتتاعى العاشقى قادامدار جاسالدى.
تاعى ءبىر ماڭىزدى مىندەت تۇقىم سالاسىن ماتەريالدىق-تەحنيكالىق جابدىقتاۋ بولىپ تابىلادى. سەلەكسيامەن اينالىساتىن مەملەكەتتىك جانە جەكە ۇيىمدارعا قازىرگى تەحنيكا تۇرلەرىنە، جابدىقتار مەن زەرتحانالارعا قولجەتىمدىلىكتى قامتاماسىز ەتۋ قاجەت. بۇل قازاقستانداعى تۇقىم شارۋاشىلىعى سەلەكسياسىنىڭ دەڭگەيىن ەداۋىر ارتتىرۋعا مۇمكىندىك بەرەدى.