قازاقستاندا بۇعاتتاۋعا ۇسىنىلاتىن سايتتاردىڭ «قارا كاتالوگى» جاسالدى

قۇمار ويىندارى بار سايتتاردى انىقتاۋ بويىنشا مونيتورينگ جۇرگىزىلگەن.

قازاقستاندا قولايسىز مازمۇندى قامتيتىن جانە بۇعاتتاۋعا ۇسىنىلاتىن سايتتاردىڭ «قارا كاتالوگى» ازىرلەندى. بۇل تۋرالى اقپارات جانە قوعامدىق دامۋ مينيسترلىگىنىڭ جاستار جانە وتباسى ىستەرى كوميتەتىنىڭ ءتوراعاسى قايرات بايمۋلدينوۆ ورتالىق كوممۋنيكاسيالار قىزمەتىندە وتكەن بريفينگتە حابارلادى، دەپ حابارلايدى Almaty-akshamy.kz inbusiness.kz cىلتەمە جاساپ.

سپيكەردىڭ ايتۋىنشا، گرانتتىق قارجىلاندىرۋ شەڭبەرىندە "جاستار مەن بالالار اراسىندا ينتەرنەتكە تاۋەلدىلىك پەن قۇمار ويىنداردىڭ الدىن الۋ" الەۋمەتتىك جوباسى قولعا الىندى.

«ونىڭ اياسىندا ءبىرقاتار جۇمىس اتقارىلدى. سونىڭ ىشىندە جاستار مەن بالالار اراسىندا فوكۋس-توپتاردىڭ ساۋالناماسىن ۇيىمداستىرۋ جانە وتكىزۋ، ينتەرنەتكە تاۋەلدىلىك، قۇمار ويىندار مەن كيبەربۋللينگ دەڭگەيى جوعارى وڭىرلەردى انىقتاۋ بويىنشا وڭىرلەردە ۇيلەستىرۋشىلەر تاعايىندالدى. اقپاراتتىق كۋرستار مەن جوبالاردى ىسكە اسىرۋ، جاستاردى ينتەرنەت-كەڭىستىكتە ءقاۋىپسىز ءجۇرىس-تۇرىس قاعيدالارىنا وقىتۋ، كيبەربۋللينگتىڭ، ينتەرنەت-تاۋەلدىلىكتىڭ جانە قۇمار ويىندارعا تاۋەلدىلىكتىڭ الدىن الۋ بويىنشا ءاقپاراتتىق-تۇسىندىرۋ ماتەريالدارىن ازىرلەۋ ماقساتىندا بەينە نۇسقاۋلىقتار ازىرلەندى»، - دەدى ول.

ۆەدومستۆو وكىلىنىڭ سوزىنشە، بۇدان بولەك جەلىدە قۇمار ويىندارى بار سايتتاردى انىقتاۋ بويىنشا مونيتورينگ جۇرگىزىلگەن كورىنەدى.

«ناتيجەسىندە «اتا-انا باقىلاۋى» پايدالانۋشىسىنىڭ جەكە كابينەتتەرىندە بۇعاتتاۋعا ۇسىنىلعان 16 سايت انىقتالدى. قولايسىز مازمۇندى قامتيتىن جانە بۇعاتتاۋعا ۇسىنىلاتىن سايتتاردىڭ «قارا كاتالوگى» جاسالدى»، - دەدى قايرات بايمۋلدينوۆ.