قازاقستاندا بانكارالىق كوميسسيالار ازايتىلادى

بۇل ءتاسىل قولما-قول اقشاسىز تولەمدەردى ودان ءارى دامىتادى.

قازاقستان ۇلتتىق بانكى مەن Visa، Mastercard جانە UnionPay تولەم كارتالارىنىڭ حالىقارالىق جۇيەلەرى تولەم كارتالارىن (ينتەرچەيندج مولشەرلەمەلەرىن) پايدالانا وتىرىپ، قولما-قول اقشاسىز تولەمدەر بويىنشا بانكارالىق ىشكى ۇلتتىق كوميسسيا مولشەرلەمەلەرىنىڭ شەكتى مولشەرىن تومەندەتۋ بويىنشا بىرلەسكەن شارالار قابىلداۋ ماسەلەلەرى جونىندەگى كەلىسىمگە قول قويدى، دەپ حابارلايدى Almaty-akshamy.kz.

ۇلتتىق بانكتىڭ رەسمي سايتىنداعى مالىمەتى بويىنشا، قازاقستاندا جۇمىس ىستەيتىن تولەم كارتالارىنىڭ حالىقارالىق جۇيەلەرى ينتەرچەيندج مولشەرلەمەلەرىن بىردەن 2 ەسە تومەندەتۋگە مىندەتتەلەدى.

شەكتى مولشەرلەمەلەر تومەندەگەن كەزدە كەزەڭ-كەزەڭىمەن تومەندەتۋ ءتاسىلى قولدانىلادى. ءبىرىنشى كەزەڭ 2024 جىلى 1 قاڭتاردا، ال ەكىنشى كەزەڭ – 2025 جىلى 1 قاڭتاردا باستالادى:

جاپپاي سەگمەنتتە (Classic، Gold جانە باسقالارى) ءبىرىنشى كەزەڭدە شەكتى مولشەرلەمەلەر قازىرگى مولشەرلەمەدەن (1،80%-2،0%-دان) 1،50%-عا دەيىن، ەكىنشى كەزەڭدە – 1،0%-عا دەيىن تومەندەيدى؛

پرەميۋم سەگمەنتتە (Platinum، World جانە باسقالارى) ءبىرىنشى كەزەڭدە قازىرگى مولشەرلەمەلەردەن (شامامەن 2،40%-دان) 1،80%-عا دەيىن، ەكىنشى كەزەڭدە – 1،20%-عا دەيىن تومەندەتۋ كوزدەلەدى؛

سۋپەر پرەميۋم سەگمەنتتە (Infinite، World elite، Diamond جانە باسقالارى) ءبىرىنشى كەزەڭدە مولشەرلەمەلەر قازىرگى مولشەرلەمەدەن (شامامەن 2،45%-دان) 2،0%-عا دەيىن، ەكىنشى كەزەڭدە – 1،40%-عا[1] دەيىن تومەندەيدى.

قولما-قول اقشاسىز كارتالىق تولەمدەر بويىنشا بانكارالىق كوميسسيالاردىڭ تومەندەۋى تولەم يندۋسترياسىنىڭ ودان ءارى دامۋىنا وڭ ىقپال ەتەدى جانە بانك كوميسسيالارىن تولەۋگە بيزنەس سۋبەكتىلەرىنىڭ شىعىندارىن قىسقارتادى. بۇل ءتاسىل قولما-قول اقشاسىز تولەمدەردى ودان ءارى دامىتىپ، «كولەڭكەلى ەكونوميكانىڭ» ازايۋىنا وڭ اسەرىن تيگىزەدى.

انىقتاما ءۇشىن: ينتەرچەيندج دەگەنىمىز – ساۋدا-سەرۆيستىك كاسىپورىندارعا قىزمەت كورسەتەتىن ەكۆايەر-بانكتەر قولما-قول اقشاسىز تولەمدەردى قابىلداۋ كەزىندە تولەم كارتاسىنىڭ ەميتەنت-بانككە تولەنەتىن ەكۆايرينگتىك كوميسسيانىڭ ءبىر بولىگى.