112 جۇك ولشەۋ ستانسياسىن ورناتۋ جوسپارلانىپ وتىر.
قازاقستاندا كولىك قۇرالدارىنىڭ سالماعى جانە گاباريتتىك پارامەترلەرىن ولشەيتىن اۆتوماتتاندىرىلعان ستانسيالار ورناتىلادى. بۇل تۋرالى ق ر پارلامەنتى ءماجىلىسىنىڭ پلەنارلىق وتىرىسىندا يندۋستريا جانە ينفراقۇرىلىمدىق دامۋ ءمينيسترى قايىربەك وسكەنبايەۆ مالىمدەدى، دەپ حابارلايدى Almaty-akshamy.kz.
بۇل قادام ۇزدىكسىز جۇك تاسىمالى اسەرىنەن جول توسەمىنىڭ مەرزىمىنەن بۇرىن بۇزىلۋى سياقتى ماسەلەنى وڭتايلى شەشۋگە مۇمكىندىك بەرمەك. وسى ماقساتتا 2025 جىلدىڭ سوڭىنا دەيىن 112 جۇك ولشەۋ ستانسياسىن ورناتۋ جوسپارلانىپ وتىر.
«اۆتوماتتاندىرىلعان ستانسيالار ادامنىڭ قاتىسۋىنسىز «سەرگەك» جۇيەسىنىڭ قاعيداتى بويىنشا جۇمىس ىستەيدى. ۇسىنىلىپ وتىرعان شارالار ەلىمىزدەگى كولىك جولدارىنىڭ ۇزاق مەرزىمدە ساقتالۋىن قامتاماسىز ەتىپ، كولىكتىك باقىلاۋ جۇرگىزۋ كەزىندە ادامي فاكتوردى بولدىرماۋعا ىقپالىن تيگىزبەك»، – دەپ اتاپ ءوتتى ق ر ييدم باسشىسى قايىربەك وسكەنبايەۆ.
ايتا كەتەرلىگى، يندۋستريا جانە ينفراقۇرىلىمدىق دامۋ مينيسترلىگى پارلامەنتى ءماجىلىسى دەپۋتاتتارىنىڭ قاراۋىنا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە كولىك ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىن ۇسىندى. اتالعان قۇجات قازاقستان رەسپۋبليكاسىنىڭ 4 كودەكسى مەن 16 زاڭىنا وزگەرتۋلەر مەن تولىقتىرۋلار ەنگىزۋدى كوزدەيدى.
زاڭ جوباسى جولداردا كولىكتىك باقىلاۋدى اۆتوماتتاندىرۋ، تەمىرجول جانە سۋ كولىكتەرىندە ورىن العان وقىس وقيعالار مەن اۆاريالىق جاعدايلاردى تەرگەۋ ءتارتىبىن جەتىلدىرۋدى قاراستىرادى.
سونىمەن قاتار زاڭ جوباسىنا حالىقتىڭ الەۋمەتتىك جاعىنان ءالجۋاز توپتارىنىڭ قوعامدىق كولىكتە جۇرۋىنە جەڭىلدىك بەرەتىن نورمالار دا ەنگىزىلگەن. ال ءبىرقاتار تۇزەتۋ تەمىرجول جانە سۋ كولىكتەرىندەگى قوزعالىس قاۋىپسىزدىگىن ارتتىرۋعا باعىتتالىپ وتىر.
«بۇگىندە تەمىرجول كولىگىندەگى اپاتتار مەن اۆاريالاردى تەرگەۋ امالدارىن كولىك سالاسىنداعى ۋاكىلەتتى ورگان، ال وقيعالار مەن وقىس جايتتاردى - تاسىمالداۋ پروسەسىنە قاتىسۋشىلاردىڭ وزدەرى جۇرگىزەدى. ازاماتتاردىڭ ءومىرى مەن دەنساۋلىعىنىڭ قۇندىلىعىن ەسكەرە وتىرىپ، زاڭ جوباسى شەڭبەرىندە جولاۋشىلار پويىزدارىنىڭ جولدان شىعۋىن نەمەسە سوقتىعىسۋىن تۋدىرعان وقيعالاردى تەكسەرۋ ۋاكىلەتتى ورگاننىڭ قۇزىرەتىنە بەرۋ ۇسىنىلادى»،– دەدى ۆەدومستۆو باسشىسى.
حالىق قالاۋلىلارىنىڭ قاراۋىنا ۇسىنىلعان زاڭ جوباسى ازاماتتىق اۆياسيا سالاسىندا دا ءبىرقاتار وزگەرىستەر ەنگىزۋدى كوزدەيدى. اتاپ ايتقاندا، پيلوتسىز ۇشۋ اپپاراتتارىن پايدالانۋ پروسەسىن رەتتەۋ جونىندەگى نورما بار.
بۇدان وزگە زاڭ جوباسىندا حالىقارالىق ستاندارتتارعا سايكەس كەزەكتى اۋديتتەن ءساتتى وتۋگە دايىندالۋعا باعىتتالعان ءبىرقاتار ماڭىزدى تۇزەتۋلەر قاراستىرىلعان.
ءوز كەزەگىندە ءماجىلىس دەپۋتاتتارى كولىك ماسەلەلەرى بويىنشا وزگەرىستەر مەن تولىقتىرۋلار ەنگىزۋدى كوزدەيتىن زاڭ جوباسىن ءبىرىنشى وقىلىمدا ماقۇلدادى.