قازاقستاندا اۋىل اكىمدەرىن سايلاۋ ناۋقانى اياقتالدى

قازاقستان بويىنشا 730 ەلدى مەكەننىڭ اكىمىن انىقتايتىن سايلاۋ مارەسىنە جەتتى.

زاڭ بويىنشا سايلاۋ وتكىزىلگەننەن كەيىن ءۇش كۇن ىشىندە قورىتىندى شىعارىلادى، جەتى كۇن ىشىندە سايلانعان اكىمدى تىركەۋ جۇزەگە اسىرىلادى.

جەرگىلىكتى سايلاۋ كوميسسيالارىنىڭ دەرەگى بويىنشا، نۇر-سۇلتان ۋاقىتىمەن ساعات 20.00-دە ەلىمىزدىڭ 9 وڭىرىندە سايلاۋ ۋچاسكەلەرى جابىلدى. ال ساعات 21.00 كەزىندە بۇكىل رەسپۋبليكا بويىنشا داۋىس بەرۋ اياقتالدى.

وسىلايشا، كەزەكتى سايلاۋ ناۋقانىنا وراي اشىلعان 14 وڭىردەگى 1847 سايلاۋ ۋچاسكەسى جۇمىسىن قورىتىندىلاپ جاتىر. ەلدەگى 730 سايلاۋ وكرۋگىندە 2582 كانديدات ۇسىنىلعان. سونىڭ 2297ء-ى تىركەۋدەن وتكەن. كانديداتتاردىڭ باسىم بولىگى – ءوزىن-وزى ۇسىنۋشىلار. ياعني، سايلاۋ زاڭناماسىنداعى جاڭا مۇمكىندىكتى 1419 ادام پايدالانىپ وتىر.

سونداي-اق 878 ۇمىتكەردى ادىلەت مينيسترلىگىنىڭ تىركەۋىندە بار 6 ساياسي پارتيا ۇسىنعان. حالىقتىڭ داۋىس بەرۋى ارقىلى اكىم بولعىسى كەلەتىندەردىڭ گەندەرلىك قۇرامىنا كەلسەك، ەر ۇمىتكەرلەردىڭ سانى –1839. سولارمەن بىرگە 458 ايەل ۇمىتكەر باعىن سىنادى.

«پارتيالىق ەمەس بايقاۋ ورتالىعى» رەسپۋبليكالىق قوعامدىق بىرلەستىگىنىڭ ءتوراعاسى تولەگەن كۇنادىلوۆتىڭ ايتۋىنشا، بىرلەستىكتىڭ 2 مىڭنان استام وكىلى 1847 سايلاۋ ۋچاسكەسىندە بەيتاراپ باقىلاۋ جۇرگىزگەن.