ەندى قازاقستانداعى اسكەري جوعارى وقۋ ورىندارىنا eGov.kz پورتالى ارقىلى ونلاين وقۋعا تۇسۋگە بولادى، دەپ حابارلايدى aqshamnews.kz "ۇلتتىق اقپاراتتىق تەحنولوگيالار" اق-عا سىلتەمە جاساپ.
"eGov.kz پورتالى قازاقستان رەسپۋبليكاسى قورعانىس مينيسترلىگىنىڭ اسكەري وقۋ ورىندارىنا تۇسۋگە ۇمىتكەر رەتىندە ءوتىنىش بەرۋ قىزمەتىن ۇسىنادى. بۇل پروسەسس تولىعىمەن ەلەكتروندى تۇردە، ونىڭ ىشىندە ءوتىنىش بەرۋ جانە ناتيجەنى "جەكە كابينەتتە" الۋ بار. جۇيە قابىلداۋداعى شەكتەۋلەردى (مەديسينالىق دەرەكتەر، سوزىلمالى اۋرۋلار جانە وتكەن ينفەكسيالار نەگىزىندە) تەكسەرەدى، سونداي-اق سوتتىلىقتى تەكسەرۋگە سۇرانىس جىبەرەدى. ەگەر ادامنىڭ سوتتىلىعى بولماسا، جاۋاپ 10 مينۋت ىشىندە كەلەدى. ودان كەيىن قازاقستان رەسپۋبليكاسى ۇلتتىق قاۋىپسىزدىك كوميتەتىنىڭ ارنايى تەكسەرۋىنەن ءوتۋ ءۇشىن انكەتانى تولتىرۋ قاجەت"، دەدى "ۇات" اق باسپا ءسوز قىزمەتى
ۇمىتكەرلەرگە الدىن الا № 075 نىسانىن الۋ جانە قازاقستان رەسپۋبليكاسى ۇلتتىق قاۋىپسىزدىك كوميتەتىندە تەكسەرۋ ءۇشىن ءومىربايانىن دايىنداۋ ۇسىنىلادى.
كوپتەگەن دەرەكتەر (مەكەنجاي، فوتو، تۋىستارى تۋرالى اقپارات) مەملەكەتتىك جۇيەلەردەن اۆتوماتتى تۇردە جۇكتەلەدى، قالعانىن قولمەن تىركەۋگە بولادى.
ءوتىنىش بەرۋ ءۇشىن:
eGov.kz پورتالىنا كىرىپ، "ازاماتتار" – "اسكەري ەسەپكە الۋ جانە قاۋىپسىزدىك" – "اسكەري قىزمەت" بولىمىنە ءوتىڭىز.
"قازاقستان رەسپۋبليكاسى قورعانىس مينيسترلىگىنىڭ اسكەري وقۋ ورىندارىنا تۇسۋگە ۇمىتكەر رەتىندە وقۋعا قابىلداۋ" قىزمەتىن تاڭداپ، "قىزمەتكە ونلاين تاپسىرىس بەرۋ" تۇيمەسىن باسىڭىز.
قاجەتتى اقپاراتتى تولتىرىپ، وتىنىمگە قول قويىڭىز.
ناتيجە "قىزمەت كورسەتۋ تاريحى" بولىمىندەگى "جەكە كابينەتتە" قولجەتىمدى بولادى.
"ۇشۋ ماماندىقتارى بويىنشا ەمتيحان باستالعانعا دەيىن 30 كۇننەن كەشىكتىرىلمەي الىنعان مەديسينالىق قورىتىندى قاجەت. ناتيجەسى (تىركەۋ نەمەسە سەبەبى كورسەتىلە وتىرىپ، باس تارتۋ) "جەكە كابينەتكە" جىبەرىلەدى. قىزمەت كورسەتۋ مەرزىمى 200 كۇنگە دەيىن. قۇجاتتاردىڭ تولىق ءتىزىمى مەن ەگجەي-تەگجەيلى نۇسقاۋلار eGov.kz سايتىندا."، دەلىنگەن"ۇات" اق باسپا ءسوز قىزمەتى تاراتقان اقپاراتتا.