قازاقستاندا ءاربىر جەتىنشى اتا-انا بالاسىنا ۋاقىت بولە المايدى - زەرتتەۋ

قازاقستاندا اتا-انالاردىڭ شامامەن 14 پايىزى جۇمىسباستىلىقتىڭ كەسىرىنەن بالالارىنا جەتكىلىكتى كوڭىل بولە المايدى.

بۇل دەرەك بالالاردىڭ ءال-اۋقاتى يندەكسى بويىنشا جۇرگىزىلگەن اۋقىمدى الەۋمەتتىك زەرتتەۋ ناتيجەسىندە بەلگىلى بولدى، - دەپ حابارلايدى Aqshamnews.kz.

زەرتتەۋگە 93 مىڭنان استام ادام قاتىسقان، ونىڭ 52 مىڭنان استامى – اتا-انالار، قالعانى – وقۋشىلار. ناتيجەسىندە اتا-انالاردىڭ 13،9 پايىزى بالاسىنا ۋاقىت تاپپاي جۇرگەنىن مويىنداعان.

ەڭ جوعارى كورسەتكىشتەر تىركەلگەن وڭىرلەر:

• سولتۇستىك قازاقستان وبلىسى – 17،9%،

• الماتى قالاسى – 17،8%،

• قوستاناي وبلىسى – 17،3%،

• اقمولا وبلىسى – 16،1%.

ال ەڭ تومەن ۇلەس شىعىس قازاقستان (9،1%)، باتىس قازاقستان (10%) جانە اتىراۋ (10،6%) وبلىستارىندا بايقالعان.

«اتا-انانىڭ تۇراقتى نازارى مەن قولداۋى – بالانىڭ ەموسيالىق تۇراقتىلىعى مەن جان تىنىشتىعىنىڭ باستى كەپىلى. ال ۇلكەندەردىڭ جۇمىسباستىلىعى سەنىمدى السىرەتىپ، وتباسىنداعى بايلانىستى ءۇزىپ جىبەرەدى»، – دەيدى بالالاردىڭ قۇقىقتارىن قورعاۋ كوميتەتىنىڭ ءتوراعاسى ناسىمجان وسپانوۆا.

ونىڭ ايتۋىنشا، «ادال ازامات» باعدارلاماسى اياسىندا اتا-انالارعا قولداۋ كورسەتۋ ورتالىقتارى جۇمىس ىستەپ جاتىر. جاڭارتىلعان باعدارلاما شەڭبەرىندە بۇل ورتالىقتار ەندى بالالاردىڭ پسيحيكالىق ساۋلىعى مەن ەموسيالىق دامۋىنا ارنالعان زاماناۋي ادىستەردى قامتيتىن بولادى.

UNICEF زەرتتەۋلەرىنە سايكەس، اتا-انانىڭ بالامەن كۇن سايىن بار بولعانى 10–15 مينۋت ەش الاڭسىز سويلەسۋى:

• مازاسىزدىقتى ازايتادى،

• ءوزارا سەنىمدى نىعايتادى،

• بالانىڭ ەموسيونالدىق تۇراقتىلىعىن ارتتىرادى.

كوميتەت ماماندارى اتا-انالارعا:

• كۇن سايىن ەڭ كەمى 5 مينۋت بالامەن سمارتفونسىز، گادجەتسىز اشىق سويلەسۋگە،

• بالانىڭ جاعدايىنا مۇقيات بولۋعا
  كەڭەس بەرەدى.

ەگەر بالادا تۇيىقتىق، اشۋشاڭدىق نەمەسە الاڭداۋشىلىق بەلگىلەرى بايقالسا، اتا-انالار:

• مەكتەپ پسيحولوگىنا،

• پسيحولوگيالىق قولداۋ ورتالىقتارىنا،

• «111» بايلانىس ورتالىعىنا
  جۇگىنۋلەرىنە بولادى.