جىل سايىن ەلىمىزدە 36-37 مىڭ ادامنان قاتەرلى ىسىك انىقتالادى.
قازاقستاندا العاش رەت قاتەرلى ىسىككە شالدىققان بالالاردىڭ سۇيەك كەمىگىن ترانسپلانتاسيالاۋ ءۇشىن دەنەنىڭ تولىق ساۋلەلەنۋىنىڭ سوڭعى تەحنيكاسى قولدانىلا باستادى، دەپ حابارلايدى Almaty-akshamy.kz.
استانادا «UMIT» حالىقارالىق ونكولوگيالىق توموتەراپيا ورتالىعى مەن ۇلتتىق انا مەن بالا ورتالىعىنىڭ ونكولوگتارى شەتەلدىك ماماندارمەن بىرلەسىپ، ونكولوگيالىق اۋرۋلاردى ەمدەۋدەگى سوڭعى ادىستەمەنى – «Total Body Irradiation»(TBI) قولدانۋ بويىنشا وقىتۋ شەبەرلىك ساباعىن وتكىزگەن بولاتىن. سۇيەك كەمىگىن ترانسپلانتاسيالاۋدى قاجەت ەتەتىن ناۋقاس قىزدى مىسالعا الا وتىرىپ، UMIT حالىقارالىق ونكولوگيالىق ورتالىق ماماندارى رەسەيلىك ونكولوگتار جانە انا مەن بالا ۇلتتىق ورتالىعىنىڭ دارىگەرلەرىمەن بىرلەسىپ، دەنەنى جالپى ساۋلەلەندىرۋدىڭ بىرەگەي ءادىسىن قولداندى.
«12 جاستاعى كاۋسارعا قاتەرلى ىسىك اۋرۋىن ەمدەۋ ءۇشىن سۇيەك كەمىگىن اۋىستىرۋ كەرەك. ول بۇعان دەيىن تۇركيادا ەم قابىلداعان. ءبىراق، دونور تابىلماي ەلگە كەلگەن. ەندى ەلورداداعى ورتالىقتا ناۋقاستىڭ بۇكىل دەنەسىن تولىق ساۋلەلەندىرۋ ارقىلى ەمدەۋ جۇرگىزىلدى. بۇل ونكولوگيالىق ناۋقاستى سۇيەك كەمىگىن ترانسپلانتاسيالاۋعا دايىنداۋداعى قاجەتتى قادام. بۇرىن بۇل پروسەدۋرا قازاقستاندا ەشقاشان قولدانىلماعان»، - دەلىنگەن باسپا ءسوز بايانىندا.
جالپى TBI تەحنولوگياسى ساۋلەلەندىرۋدى ناقتى ايماقتارداعى ىسىكتى جويۋ ءۇشىن قولدانىلمايدى، بۇكىل دەنەنى سۇيەك كەمىگىن ترانسپلانتاسياعا دايىنداۋعا ارنالعان. ترانسپلانتاسيالانعان سۇيەك كەمىگىنىڭ نەگىزىندە ادام اعزاسى اۋرۋ-سىرقاۋسىز ءوزىنىڭ ءارى قاراي ءومىر ءسۇرۋىن جانە قالپىنا كەلۋىن جالعاستىرادى.
«بۇل قازاقستاننىڭ بۇكىل دەنساۋلىق ساقتاۋ سالاسىنىڭ جەتىستىگى ەكەنى ءسوزسىز. ويتكەنى، بۇگىنگى كۇنگە دەيىن بىردە-بىر ونكولوگيالىق ديسپانسەردە لەيكوزدىڭ ميەلويدتى لەيكوز، ليمفوبلاستيكالىق لەيكوز سياقتى تۇرلەرىمەن اۋىراتىن ناۋقاستارعا سۇيەك كەمىگىن ترانسپلانتاسيالاۋ ارقىلى ەمدەۋ كەزىندە دەنەنى تولىق ساۋلەلەندىرۋ جۇرگىزىلمەگەن»، - دەيدى «UMIT» حالىقارالىق ونكولوگيالىق توموتەراپيا ورتالىعىنىڭ ديرەكتورى ەرجان شاياحمەتوۆ.
جىل سايىن ەلىمىزدە 36-37 مىڭ قاتەرلى ىسىككە شالدىققان ناۋقاس انىقتالاتىنىن ەسكەرسەك، بولاشاقتا بۇل جاڭا ءتاسىلدىڭ ۇلت ساۋلىعىن ساقتاۋدا بەرەر كومەگى زور دەيدى سالا ماماندارى.
رەسمي مالىمەت بويىنشا، قازاقستاندا قان ءتۇزۋ جانە ليمفا جۇيەسىنىڭ ونكولوگيالىق اۋرۋلارىمەن اۋىراتىن 9 مىڭنان استام ناۋقاس بار. ءارى جىل سايىن 1500-گە دەيىن جاڭا ناۋقاستار تىركەلەدى، ونىڭ ىشىندە 232 جاعداي (2021 جىلدىڭ دەرەكتەرى بويىنشا) جەدەل لەيكوزبەن اۋىراتىن بالالار. جەدەل ليمفوبلاستيكالىق لەيكوزبەن اۋىراتىن بالالاردىڭ 5 جىلدىق جالپى ءومىر ءسۇرۋ دەڭگەيى بىلتىر (2021 جىلدىڭ كورسەتكىشى) شامامەن 72% قۇراعان.