جۇمىسشى ماماندىقتار جىلى اياسىندا تۇركىستان قالاسىندا قازاقستان رەسپۋبليكاسىنىڭ وقۋ-اعارتۋ مينيسترلىگى مەن وبلىس اكىمدىگىنىڭ بىرلەسىپ ۇيىمداستىرۋىمەن كوللەدج ستۋدەنتتەرىنىڭ «ەڭبەك كۋبوگى – 2025» رەسپۋبليكالىق سپارتاكياداسى باستالدى.
ايتا كەتۋ كەرەك، كوللەدج ستۋدەنتتەرى اراسىندا مۇنداي سپورتتىق شارا كەڭ كولەمدە العاش رەت وتكىزىلۋدە، دەپ حابارلايدى aqshamnews.kz.
سپارتاكيادانىڭ رەسمي اشىلۋىنا قاتىسقان وقۋ-اعارتۋ ءمينيسترى عاني بەيسەمبايەۆ ەل ەكونوميكاسىنىڭ دامۋىنىڭ نەگىزگى تەتىكتەرىنىڭ بىرىنە اينالعان تەحنيكالىق جانە كاسىپتىك ءبىلىمدى ترانسفورماسيالاۋ - ساپالى كادرلىق الەۋەتتى دامىتۋ، كوللەدجدەردى بيزنەسپەن، حالىقارالىق ءبىلىم كەڭىستىگىمەن ينتەگراسيالاۋ، جۇمىسشى ماماندىقتارىن تاڭداعان جاستار ءۇشىن پەرسپەكتيۆالى كەلەشەك قالىپتاستىرۋ باعىتتارى بويىنشا جۇزەگە اسىرىلاتىنىن اتاپ ءوتتى.
«مەملەكەت باسشىسىنىڭ باستاماسىمەن سوڭعى ەكى جىلدا كوللەدج ستۋدەنتتەرىنىڭ شاكىرتاقىسى ەكى ەسەگە ارتتى. ستۋدەنتتەر كوللەدج قابىرعاسىندا ستارتاپ جوبالارعا قاتىسىپ، كاسىپكەرلىك داعدىلارىن مەڭگەرۋدە. مەملەكەت سىزدەرگە زور ءۇمىت ارتادى. «ەڭبەك كۋبوگى» سپارتاكياداسى سىزدەردىڭ ەل ەرتەڭىنىڭ تىرەگى بولاتىن ازامات رەتىندە قالىپتاسۋلارىڭىزعا جول اشاتىن ماڭىزدى باستاما بولادى دەپ سەنەمىن. ادال ەڭبەك پەن ساپالى ءبىلىم عانا جارقىن بولاشاقتىڭ كەپىلى بولماق»، – دەدى مينيستر.
سپارتاكياداعا ەلىمىزدىڭ بارلىق وڭىرىنەن 2000-عا جۋىق ستۋدەنت قاتىسىپ، فۋتزال، توعىزقۇمالاق، شاحمات، ۇستەل تەننيسى جانە ۆولەيبول سىندى بەس سپورت تۇرىنەن ب ا ق سىناۋدا.
ايتا كەتۋ كەرەك، سپارتاكيادا بەس كۇنگە جالعاسادى. ونىڭ قورىتىندىسى بويىنشا ۇزدىك ويىن كورسەتكەن ستۋدەنتتەردىڭ قوجا احمەت ياساۋي اتىنداعى حالىقارالىق قازاق-تۇرىك ۋنيۆەرسيتەتىنە ءبىلىم گرانتىن ۇتىپ الۋ جانە ەلىمىزدىڭ جەتەكشى كاسىپورىندارىنان شاقىرتۋ الۋ مۇمكىندىگى بار