بيولوگيا پانىنەن الەمدەگى ەڭ بەدەلدى حالىقارالىق وليمپيادا بيىل العاش رەت قازاقستاندا وتەدى. ۇكىمەتتە «IBO-2024» اتتى ءبىلىم دوداسىن ۇيىمداستىرۋ ماسەلەلەرى پىسىقتالدى. ق ر پرەمەر-مينيسترىنىڭ ورىنباسارى تامارا دۇيسەنوۆانىڭ توراعالىعىمەن وتكەن كەڭەسكە ورتالىق جانە جەرگىلىكتى مەملەكەتتىك ورگانداردىڭ وكىلدەرى قاتىستى، دەپ حابارلايدى اlmaty-akshamy.kz
«Internetional biology وlympiad» الەمدەگى توپ-7 پاندىك جارىستاردىڭ قاتارىنا كىرەدى. قازاقستاندىق وقۋشىلار بۇل سايىسقا 28 جىل بويى تۇراقتى قاتىسىپ كەلەدى. وسى ۋاقىت ىشىندە ولار 70-تەن استام ءتۇرلى ناگرادالارعا يە بولدى: 2 التىن، 20 كۇمىس، 54 قولا مەدال. وسىنداي جەتىستىكتەردى ەسكەرگەن حالىقارالىق ۇيىمداستىرۋ كوميتەتى وليمپيادانى استانادا وتكىزۋدى ۇيعاردى. وقۋ-اعارتۋ ۆيسە-مينيسترى ەدىل وسپاننىڭ ايتۋىنشا، بيىلعى دودادا ەل نامىسىن 4 دارىندى وقۋشىمىز قورعايتىن بولادى.
«ەلوردادا وتەتىن حالىقارالىق وليمپياداعا 81 ەلدەن 305 وقۋشى مەن ولاردىڭ 275 جەتەكشىسى كەلمەك. جارىس تالاپتارىنا ساي، ۇيىمداستىرۋ جانە عىلىمي كوميتەتتەر قۇرىلىپ، ارنايى www.ibo2024.kz سايتى ازىرلەنگەن. دەمەۋشىلەر ەسەبىنەن تەوريالىق جانە تاجىريبەلىك كەزەڭدەرگە قاجەتتى قۇرىلعىلار ساتىپ الىندى. وليمپيادا كەزىندە 80-نەن اسا ۆولونتەر قولداۋ كورسەتپەك»، - دەدى ەدىل وسپان.
نەگىزگى زياتكەرلىك تۋرنيردەن بولەك، قاتىسۋشىلار ءۇشىن ەلوردا مەن اقمولا وبلىسىنىڭ كورىكتى جەرلەرى بويىنشا تۋر قاراستىرىلعان. سونداي-اق قازاقستاننىڭ تاريحىمەن جانە ۇلتتىق ونەرىمەن تانىسۋ بويىنشا ءىس-شارالار ۇيىمداستىرىلادى.
تامارا دۇيسەنوۆا حالىقارالىق وليمپيادانىڭ ماڭىزدىلىعىنا توقتالىپ ءوتىپ، ونى ۇيىمداستىرۋعا جاۋاپتى مەملەكەتتىك ورگاندارعا تاپسىرمالار جۇكتەدى.
«وليمپيادانىڭ قازاقستاندا وتكىزۋ وقۋشىلارىمىزدىڭ ءبىلىم دەڭگەيى جوعارى ەكەنىن كورسەتەدى. سايىس بەلگىلەنگەن تالاپقا ساي ءوتۋى ءۇشىن بارلىق جاعداي جاسالۋى ءتيىس. باسقا ەلدەردەن كەلگەن وقۋشىلاردى قابىلداي وتىرىپ، ءبىز ۇلكەن جاۋاپكەرشىلىكتى ءوز موينىمىزعا الامىز. ءبىلىم دوداسىنا قاتىساتىن بالالاردىڭ ورنالاسقان جەرىندەگى، وليمپيادا وتەتىن ورىنداعى سانيتارلىق تالاپتاردىڭ ساقتالۋىنا، تاسىمالداۋ كەزىندەگى جول قاۋىپسىزدىگىن قامتاماسىز ەتۋگە ەرەكشە نازار اۋدارۋدى تاپسىرامىن»، - دەدى تامارا دۇيسەنوۆا.