1 ساۋىردەن باستاپ قوسىمشا 4% - عا ءوستى.
قازاقستان ۇكىمەتى مەملەكەتتەگى الەۋمەتتىك تولەمدەر وسكەنىن ايتىپ وتىر، دەپ حابارلايدى Almaty-akshamy.kz.
«2022 جىلعى 1 قاڭتاردان باستاپ مەملەكەتتىك الەۋمەتتىك ساقتاندىرۋ قورىنان ەڭبەك ەتۋ قابىلەتىنەن ايىرىلۋ جانە اسىراۋشىسىنان ايىرىلۋ بويىنشا الەۋمەتتىك تولەمدەر مولشەرى 5% - عا، 2022 جىلعى 1 ساۋىردەن باستاپ قوسىمشا 4% - عا ءوستى. تولەمدەردىڭ جيىنتىق مولشەرى وتكەن جىلدىڭ دەڭگەيىمەن سالىستىرعاندا 9% - عا ارتتى»، - دەلىنگەن ەڭبەك جانە حالىقتى الەۋمەتتىك قورعاۋ مينيسترلىگىنىڭ باسپا ءسوز قىزمەتىنىڭ حابارلاماسىندا.
ءماسق-نان تولەنەتىن تولەمدەردى الەۋمەتتىك ساقتاندىرۋ جۇيەسىنىڭ جۇمىس ىستەيتىن قاتىسۋشىلارى بازالىق مەملەكەتتىك الەۋمەتتىك جاردەماقىلارعا قوسىمشا الادى.
ماسەلەن، ءماسق-نان ەڭبەك ەتۋ قابىلەتىنەن ايىرىلۋ بويىنشا الەۋمەتتىك تولەمدەردى 81،6 مىڭ ادام الادى. ەگەر مۇگەدەكتىگى بويىنشا بيۋدجەتتەن تولەنەتىن جاردەماقىلاردىڭ ورتاشا مولشەرى 54 608 تەڭگە بولسا، وندا ءماسق تولەمدەرىن ەسكەرە وتىرىپ، ازاماتتار بارلىعى 84 353 تەڭگە الادى.
ءماسق-نان اسىراۋشىسىنان ايىرىلۋ بويىنشا الەۋمەتتىك تولەمدەردى 54،2 مىڭ ادام الادى. ەگەر اسىراۋشىسىنان ايىرىلۋ بويىنشا بيۋدجەتتەن تولەنەتىن جاردەماقىلاردىڭ ورتاشا مولشەرى 45 627 تەڭگە بولسا، وندا ءماسق تولەمدەرىن ەسكەرە وتىرىپ، ازاماتتار بارلىعى 76 443 تەڭگە الادى.
وسىلايشا، جۇمىس ىستەيتىن ازاماتتارعا تولەنەتىن تولەمدەردىڭ ورتاشا مولشەرى الەۋمەتتىك ساقتاندىرۋ جۇيەسىنە قاتىسپايتىن الۋشىلارعا تولەنەتىن تولەمدەرگە قاراعاندا شامامەن 30 مىڭ تەڭگە جوعارى.
ءماسق-نان جوعارى مولشەردەگى الەۋمەتتىك تولەمدەر ءساۋىر جانە مامىر ايلارىنداعى قوسىمشا اقىنى ەسكەرە وتىرىپ، وسى جىلدىڭ ماۋسىم ايىندا اۋدارىلادى.