بۇگىن قازاقستان رەسپۋبليكاسى دەنساۋلىق ساقتاۋ مينيسترلىگىنىڭ باستاماسىمەن نازاربايەۆ ۋنيۆەرسيتەتىندە ددۇ، يۋنفپا، نازاربايەۆ ۋنيۆەرسيتەتىنىڭ مەديسينا مەكتەبى جانە «University Medical Center» كورپوراتيۆتىك قورى وكىلدەرىنىڭ، شۆەسيا، اۋستراليا، لاتۆيا، ليتۆا، بەلارۋس، رەسەي جانە قىرعىزستاننان شەتەلدىك ساراپشىلاردىڭ قاتىسۋىمەن «ايالى الاقان» قازاقستان اكۋشەرلىك سپەسياليستوۆ ماماندارىنىڭ I حالىقارالىق كونگرەسى ءوتتى.
فورۋمنىڭ كۇن ءتارتىبى بۇگىنگى تاڭدا انا مەن بالا دەنساۋلىعىن ساقتاۋ سالاسىندا ساپالى اكۋشەرلىك كومەكتىڭ قولجەتىمدىلىگى، مامانداردىڭ بىلىكتىلىگىن ارتتىرۋ، كادرلارمەن قامتاماسىز ەتۋ، اۋرۋلاردىڭ پروفيلاكتيكاسى، جۇكتىلىك كەزىندە جانە بوسانعاننان كەيىن ايەلدەردى ەمدەۋ، وڭالتۋ، كلينيكالىق پراكتيكانى جەتىلدىرۋ جانە جاڭا تەحنولوگيالاردى ەنگىزۋ سياقتى وزەكتى باعىتتاردى قامتىدى، دەپ حابارلايدى Almaty-akshamy.kz.
قازاقستاندا انا مەن بالا دەنساۋلىعىن ساقتاۋ جونىندەگى مەملەكەتتىك ساياسات شارالارى باسىم مىندەتتەردىڭ ءبىرى بولىپ تابىلادى جانە ستراتەگيالىق قۇجاتتاردا، ەلدى دامىتۋدىڭ مەملەكەتتىك باعدارلامالارىندا، سونداي-اق حالىقارالىق مىندەتتەمەلەردە كورسەتىلەدى.
«قازاقستاندا جۇكتى ايەلدەردى مەديسينالىق پەرسونالدىڭ بوسانعانعا دەيىنگى باقىلاۋىمەن قامتۋ 99%-دى قۇرايدى. سوڭعى جىلدارى بالا تۋۋدىڭ ءوسۋى بايقالادى، جىل سايىن 400 مىڭنان استام بالا دۇنيە كەلەدى. 9 000-نان استام اكۋشەر جىل سايىن 500 مىڭعا جۋىق جۇكتى ايەلدەرگە بىلىكتى مەديسينالىق كومەك كورسەتەدى»، - دەدى دەنساۋلىق ساقتاۋ ءمينيسترى اقمارال ءالنازاروۆا.
ۆەدومستۆو باسشىسى انا مەن بالا ءولىمىنىڭ ۇشتەن ەكىسىنىڭ الدىن الۋعا مۇمكىندىك بەرەتىن ساپالى اكۋشەرلىك كومەكتىڭ ءرولىن ەرەكشە اتاپ ءوتتى.
«ءبىزدىڭ ەلىمىزدىڭ ءاربىر ايەلىنە بوسانۋ كەزىندە جەكە بىلىكتى اكۋشەرلىك كومەك الۋ مۇمكىندىگى بولۋى كەرەك. اكۋشەرلەر جۇمىس ىستەيتىن مەديسينالىق كومەك ۇلگىلەرى دەنساۋلىق ساقتاۋ سالاسىنداعى ناتيجەلەردى جاقسارتۋى، پاسيەنتتەردىڭ قاناعاتتانۋ دارەجەسىن ارتتىرۋى جانە شىعىستاردى قىسقارتۋعا مۇمكىندىك بەرۋى ءتيىس»، - دەپ اتاپ ءوتتى مينيستر.
فورۋمدا اتاپ وتىلگەندەي، اكۋشەرلىك كومەك جۇيەسىن ودان ءارى نىعايتۋ ءۇشىن وقىتۋ مەن دايارلىقتى، لايىقتى جالاقىنى، سونداي-اق ءقاۋىپسىز، قولداۋشى جانە قۇرمەتتى ورتادا جۇمىس ىستەۋ مۇمكىندىگىن ۇيىمداستىرۋعا ينۆەستيسيالار قاجەت.
«اكۋشەرلەر دەنساۋلىقتى نىعايتۋدا، اۋرۋدىڭ پروفيلاكتيكاسىندا، انا مەن بالانى ەمدەۋدە جانە كۇتىم جاساۋدا ماڭىزدى ءرول اتقارادى. دۇنيەجۇزىلىك دەنساۋلىق ساقتاۋ ۇيىمىنىڭ باعالاۋى بويىنشا، مەيىرگەرلەر مەن اكۋشەرلەر بۇكىل الەم بويىنشا دەنساۋلىق ساقتاۋ قىزمەتكەرلەرىنىڭ جارتىسىنا جۋىعىن قۇرايدى. ولاردىڭ كوشباسشىلىق قاسيەتتەرىن ىلگەرىلەتۋ جانە كاسىبي دايارلىق باعدارلامالارى ارقىلى تەڭ جانە لايىقتى ەڭبەك جاعدايلارىنا قول جەتكىزۋ ءۇشىن ولاردىڭ مۇمكىندىكتەرىن كەڭەيتۋ وتە ماڭىزدى»، - دەپ اتاپ ءوتتى ددۇ-نىڭ قازاقستانداعى ەلدىك ءوفيسىنىڭ وكىلى سكەندەر سىلا.
فورۋمعا قاتىسۋشىلار مساك دەڭگەيىندەگى اكۋشەرلەردىڭ ەرەكشە ءرولىن اتاپ ءوتتى، ويتكەنى بۇل جۇكتىلىكتىڭ العاشقى كۇندەرىنەن باستاپ ايەلدى باقىلاپ، قاداعالايتىن، مەديسينالىق كومەكتىڭ بارلىق باعىتىن پىسىقتايتىن العاشقى ماماندار، سوندىقتان جۇكتىلىكتى ساپالى باقىلاۋ ءۇشىن سەنىمدى قارىم-قاتىناس ورناتۋ ماڭىزدى.
نازاربايەۆ ۋنيۆەرسيتەتىنىڭ مەديسينا مەكتەبىنىڭ ۆيسە-پرەزيدەنتى جانە دەكانى، دوكتور ماسسيمو پيناتەللي بىلاي دەپ قوستى: «حالىقارالىق اكۋشەرلەر كونگرەسى جەرگىلىكتى قاجەتتىلىكتەرمەن ۇزدىك الەمدىك پراكتيكتەردى بىرىكتىرۋ جولىنداعى ماڭىزدى قادام بولىپ تابىلادى. نازاربايەۆ ۋنيۆەرسيتەتىنىڭ مەديسينا مەكتەبى اكۋشەرلىك سالاسىنداعى ماماندار تابىستى دامي الاتىن ورتانى قۇرۋدا ىنتىماقتاسۋ مۇمكىندىگىن ماقتان تۇتادى. ءبىزدىڭ پراكتيكامىزدا حالىقارالىق ستاندارتتار مەن زەرتتەۋلەردى قوسا العاندا، ءبىز ءاربىر انا مەن بالاعا كورسەتىلەتىن مەديسينالىق كومەكتىڭ ساپاسىن ارتتىرۋعا تىرىسامىز. بۇل كونگرەسس ءبىزدىڭ دەنساۋلىق ساقتاۋ سالاسىنداعى ءبىلىم بەرۋدى ىلگەرىلەتۋگە دەگەن ۇمتىلىسىمىزدى كورسەتەدى جانە بارلىق مۇددەلى تاراپتارعا پايدا اكەلەتىن مۋلتيديسيپلينالىق ءتاسىلدى قولدانۋعا ىقپال ەتەدى».
فورۋم ساراپشىلارى اكۋشەرلىك پراكتيكادا جۇكتى ايەلدەرگە پاتروناجدىق قىزمەت كورسەتۋدىڭ امبەباپ پروگرەسسيۆتى مودەلىنىڭ تاسىلدەرى، وتباسىن جوسپارلاۋدى دامىتۋ پەرسپەكتيۆالارى، ۇرىقتى دياگنوستيكالاۋ ادىستەرى جانە ەمشەك سۇتىمەن قورەكتەندىرۋگە ۇيرەتۋ تاقىرىپتارىندا ءتۇرلى باياندامالار جاسادى.
فورۋم الاڭىندا دەنساۋلىق ساقتاۋ ءمينيسترى اۋىلدىق جانە اۋداندىق اۋرۋحانالاردا 30 جىلدان استام جۇمىس ءوتىلى بار سالانىڭ ۇزدىك ون مامانىنا قۇرمەت گراموتالارىن جانە كوتەرمەلەۋ رەتىندە ساناتورييلىك-كۋرورتتىق ەمدەلۋگە سەرتيفيكاتتار تابىس ەتتى.
قورىتىندىسى بويىنشا اكۋشەرلىك ءىس ماماندارىنىڭ ءبىرىنشى كونگرەسىنىڭ قارارى قابىلداندى.