بۇگىن ەلىمىزدە وسى ماسەلە داۋىسقا سالىنىپ جاتىر.
داۋىس بەرۋ بارىسىن 14 مەملەكەتتىڭ ورتالىق سايلاۋ ورگاندارىنىڭ وكىلدەرى، سونىڭ ىشىندە ءازىربايجان، بەلارۋس، تاجىكستان جانە وزبەكستان ورتالىق سايلاۋ ورگاندارىنىڭ ءتوراعالارى دا باقىلاپ وتىر، دەپ حابارلايدى aqshamnews.kz
رەفەرەندۋمعا 30 شەت مەملەكەت پەن ءتورت حالىقارالىق ۇيىمنىڭ (تاۋەلسىز مەملەكەتتەر دوستاستىعى، شانحاي ىنتىماقتاستىق ۇيىمى، تۇركى مەملەكەتتەرى ۇيىمى، ازياداعى ءوزارا ءىس-قيمىل جانە سەنىم شارالارى جونىندەگى كەڭەس) اتىنان 177 بايقاۋشى قاتىسادى.
قازاقستان رەسپۋبليكاسىنىڭ سىرتقى ىستەر مينيسترلىگى 37 ەلدەن 200 شەتەلدىك جۋرناليستەردى اككرەديتتەدى، ولار دا رەسپۋبليكالىق رەفەرەندۋمدى باقىلاپ، اقپارات تاراتادى.
ەل ءۇشىن ماڭىزدى ساياسي ناۋقانعا مەملەكەت باسشىسىنىڭ ءوزى باستاپ قاتىستى.
پرەزيدەنت وڭ شەشىم شىققان جاعدايدا قازاقستان ۇكىمەتى ارنايى ساراپتاما جۇرگىزەتىنىن ايتتى.
“بۇل كۇردەلى ماسەلە. ۇكىمەت ارنايى ساراپتاما جۇرگىزۋى كەرەك. ال مەنىڭ جەكە كوزقاراسىم بويىنشا، ەڭ وزىق تەحنولوگيالارى بار الەمدىك كومپانيالاردان تۇراتىن حالىقارالىق كونسورسيۋم جۇمىس ىستەۋى كەرەك”. قالعانىن ءارى قاراي، ءومىر كورسەتەدى"، - دەدى توقايەۆ.
ۇكىمەت باسشىسى ولجاس بەكتەنوۆ ەلىمىز ءۇشىن ماڭىزدى تاريحي ساتتە ازاماتتىق بورىشىن ورىنداپ، حالىقتىڭ پىكىرىنە قۇرمەتپەن قارايتىنىن كورسەتتى.
پرەمەر-مينيستر رەفەرەندۋم ەلىمىزدىڭ ەنەرگەتيكالىق بولاشاعىن انىقتايتىن شەشۋشى كەزەڭ ەكەندىگىن اتاپ ءوتىپ، ءاربىر قازاقستاندىقتىڭ تاڭداۋ جاساۋى ەلدىڭ كەلەشەگىنە ۇلكەن اسەر ەتەتىنىن ايتتى.
الماتى قالاسىنىڭ اكىمى ەربولات دوسايەۆ جۇبايىمەن بىرگە الماتىداعى №48 مەكتەپ-ليسەيىندە ورنالاسقان №388 سايلاۋ ۋچاسكەسىنە بارىپ، اتوم ەلەكتر ستانساسىن سالۋ تۋرالى رەسپۋبليكالىق رەفەرەندۋمدا داۋىس بەردى.
الماتى شاھارىندا تۇراتىن مادەنيەت قايراتكەرلەرى مەن ونەر مايتالماندارى دا ساياسي ناۋقاننان تىس قالعان جوق.
"حالىق وسى جاۋاپكەرشىلىكتى ءتۇسىنىپ، ءوز تاڭداۋىن جاساۋدا. بۇل تاڭداۋ — ەلىمىزدىڭ كەلەشەگىنە دەگەن سەنىمىمىزدىڭ جانە ورتاق يگىلىك ءۇشىن كۇش بىرىكتىرۋ نيەتىمىزدىڭ دالەلى"، دەدى رەفەرەندۋمعا كەلگەن حالىق ءارتىسى ءاسانالى ءاشىموۆ.
اتى اڭىزعا اينالعان قازاقستاندىق وپەرا ءانشىسى، مەملەكەتتىك سىيلىقتىڭ لاۋرەاتى بيبىگۇل تولەگەنوۆا اتوم ەلەكتر ستانسياسىن سالۋ ماسەلەسى بويىنشا رەفەرەندۋمعا داۋىسىن ۇيىندە بەردى. №559 سايلاۋ ۋچاسكەسىنىڭ وكىلدەرى بيۋللەتەندەرگە ارنالعان ۋرنانى بيبىگۇل احمەت قىزىنىڭ تۇرعىلىقتى مەكەنجايىنا اكەلدى.
قازاقستاننىڭ حالىق ءارتىسى، قازاق كسر ەڭبەك سىڭىرگەن مادەنيەت قىزمەتكەرى، كومپوزيتور جانە ءانشى التىنبەك قورازبايەۆ №202 مەكتەپ-گيمنازياسىندا ورنالاسقان № 211 ۋچاسكەسىندە داۋىس بەردى.
قازاقستاننىڭ ەڭبەك سىڭىرگەن ءارتىسى باحتيار تايلاقبايەۆتىڭ پىكىرىنشە، مۇنداي سەنىمدى ءارى ءتيىمدى ەنەرگيا كوزىنىڭ بولۋى تەك قازىرگى ماسەلەلەردى شەشىپ قانا قويماي، بولاشاق وسىپ-وركەندەۋگە دە جاعداي جاسايدى.
ق ر ەڭبەك سىڭىرگەن قايراتكەرى، قۇرمەت وردەنىنىڭ يەگەرى قۇدايبەرگەن بەكىش الماتىداعى №168 مەكتەپتە ورنالاسقان № 416 ۋچاسكەگە بارىپ، رەفەرەندۋمدا داۋىس بەرۋگە قاتىستى.
الماتى مۋزىكالىق كوللەدجىندە ورنالاسقان №64 سايلاۋ ۋچاسكەسىنە العاش بولىپ داۋىس بەرگەن قوعام قايراتكەرى اسىلى وسمان بولدى.
ەلدىڭ ەكونوميكاسى ءۇشىن ماڭىزدى سانالعان ساياسي دودادان قاريالار دا قالىس قالىپ جاتقان جوق. 
قىزىلوردا وبلىسىنىڭ سىرداريا اۋدانىندا تۇراتىن ەكىنشى دۇنيەجۇزىلىك سوعىس ارداگەرى ياحيا تاسىروۆ رەفەرەندۋم كۇنى بەلسەندىلىك تانىتىپ، ءوز ۋچاسكەسىندە داۋىس بەردى.
تىل ەڭبەككەرى، الماتىداعى ناۋرىزباي اۋدانىنىڭ 99 جاستاعى تۇرعىنى كاميلا قاسىموۆا قازاقستاندا اتوم ەلەكتر ستانسياسىن سالۋ ماسەلەسى بويىنشا رەسپۋبليكالىق رەفەرەندۋمعا قاتىستى.
بۇگىنگى رەفەرەندۋمعا ەلىمىزدە تۇراتىن وزگە ۇلت وكىلدەرى، قوعامداستىق مۇشەلەرى دە بەلسەنە اتسالىستى.
اتامان ۆلاديمير شيحوتوۆتىڭ ايتۋىنشا، قازاقستاندىقتاردىڭ رەفەرەندۋمعا بەلسەندى قاتىسۋى تىكەلەي قازاقستاننىڭ بولاشاعىنا اسەر ەتەدى.
الماتىداعى قازاقستاندىق ورىس مادەني ورتالىعىنىڭ ءتوراعاسى ۆسيەۆولود لۋكاشيەۆ رەفەرەندۋمعا قاتىسىپ داۋىس بەردى.
رەفەرەندۋم ساياسي شارا بولۋىمەن قاتار حالىقتىڭ رۋحىن كوتەرەتىن پاتريوتتىق ءمانى بار ناۋقان.
مەگاپوليستىڭ №173 مەكتەپ-ليسەيىندە ورنالاسقان №585 سايلاۋ ۋچاسكەسىندە الماتىلىقتاردى الىپ باتىرلار قارسى الدى. وسى بەينەسىمەن ولار داۋىس بەرۋشىلەرگە كوشپەندىلەر الەمىنىڭ اتموسفەراسىن سەزدىردى.
باتىرلار لەگىن مەملەكەتتىك قۋىرشاق تەاترىندا ورنالاسقان №361 سايلاۋ ۋچاسكەسىنە كەلىپ، ءوز تاڭداۋىن جاساعان وليمپيادا چەمپيونى ەرماحان يبرايموۆ جالعادى.
اعا بۋىننىڭ ساياسي بەلسەندىلىگىن جاستار دا جالعاستىرىپ اكەتتى.
رەفەرەندۋمدا «ميسس الماتى» اتاعىنىڭ يەگەرى ەلدانا ساۋرانبايەۆا دا داۋىس بەردى.
“Miss Universe Kazakhstan 2023”، “Miss Almaty 2023” اتانعان الماتىلىق ارۋ مادينا المۋحانوۆا الماتىداعى №243 رەفەرەندۋم ۋچاسكەسىندە داۋىس بەردى.
ايەلدەر بوكسى بويىنشا پاريجدەگى XXXIII جازعى وليمپيادا ويىندارىنىڭ قولا جۇلدەگەرى نازىم قىزايباي الماتىداعى سايلاۋ ۋچاسكەلەرىنىڭ بىرىندە داۋىس بەرىپ، اەس قۇرىلىسى بويىنشا رەفەرەندۋمعا قاتىستى.
№101 سايلاۋ ۋچاسكەسىنە رەفەرەندۋمعا داۋىس بەرۋگە ءانشى، كومپوزيتور ديدار كادەن كەلدى.
بۇگىنگى رەفەرەندۋمنىڭ بيۋللەتەنى.
10 مىڭنان استام رەفەرەندۋم ۋچاسكەسىنە بارعان حالىق "قازاقستاندا اتوم ەلەكتر ستانسياسىن سالۋعا كەلىسەسىز بە؟" دەگەن سۇراققا جاۋاپ بەرەدى. "ءيا" نەمەسە "جوق" دەگەن ەكى جاۋاپ نۇسقاسى قاراستىرىلعان.
سايلاۋشىلار تىزىمىندە 12 ملن 233 مىڭنان استام ازاماتتىڭ ءاتى-جونى بار. رەفەرەندۋم سايلاۋشىلاردىڭ 50 پايىزدان استامى قاتىسقان كەزدە ءوتتى دەپ سانالادى.