قازاقستاندا ءبىلىم بەرۋ سالاسىن دامىتۋ ماقساتىندا 217 جايلى مەكتەپ پەن 200 تىرەك مەكتەپتەن تۇراتىن جاڭا ءبىلىم بەرۋ جەلىسى قۇرىلادى. بۇل تۋرالى پرەمەر-مينيستر ولجاس بەكتەنوۆ ۇكىمەتتىڭ كەڭەيتىلگەن وتىرىسىندا مالىمدەدى، دەپ حابارلايدى aqshamnews.kz
جوبانىڭ باستى ماقساتى – ۇزدىك تاجىريبەلەردى تاراتۋ ارقىلى بارلىق جالپى ءبىلىم بەرۋ مەكەمەلەرىندە ءبىلىم ساپاسىن تەڭەستىرۋ.
سونداي-اق، 2025 جىلعا قاراي كاسىپتىك-تەحنيكالىق ءبىلىم بەرۋ سالاسىندا 10 تەحنولوگيالىق كوشباسشى كوللەدج قۇرىلىپ، ولار رەسۋرستىق ورتالىقتارعا اينالادى. بۇدان بولەك، شەتەلدىك جوعارى وقۋ ورىندارىنىڭ 23 فيليالى جۇمىس ىستەپ جاتقان ەلدە بيىل تاعى 11 فيليال اشىلاتىنى بەلگىلى بولدى.
عىلىمداعى جاڭا جەتىستىكتەر:
ساتبايەۆ ۋنيۆەرسيتەتى Kazakhmys كورپوراسياسىنىڭ تاپسىرىسى بويىنشا تازا سەلەن الۋ تەحنولوگياسىن ازىرلەدى. بۇل ءونىم مەديسينا، ەلەكترونيكا جانە باسقا دا جوعارى تەحنولوگيالىق سالالاردا قولدانىلماق.
نازاربايەۆ ۋنيۆەرسيتەتىنىڭ بازاسىندا تىرەك-قيمىل جۇيەسى زاقىمدانعان ادامدارعا ارنالعان ەكزوسكەلەت ءوندىرىسى دامۋدا. سەرتيفيكاتتاۋدان كەيىن ەكزوسكەلەتتەر دەنساۋلىق ساقتاۋ مينيسترلىگىنىڭ تاپسىرىسى بويىنشا شىعارىلاتىن بولادى.
قازاقستاندىق عالىمدار ونكولوگيالىق اۋرۋلاردى ەمدەۋگە ارنالعان جاڭا پرەپارات جاساپ شىعاردى. پرەپاراتتىڭ كلينيكالىق سىناقتارى جالعاسۋدا، ال ونى جىل سوڭىنا دەيىن تىركەۋ جوسپارلانىپ وتىر.
مەديسينا سالاسىنداعى جەتىستىكتەر:
پرەمەر-مينيستردىڭ ايتۋىنشا، انا مەن بالا دەنساۋلىعىن جاقسارتۋ باعىتىندا ايتارلىقتاي جەتىستىكتەرگە قول جەتكىزىلگەن:
بالا شەتىنەۋ كورسەتكىشى 6،7%-عا، انا ءولىمى 11،4%-عا ازايدى.
اۋرۋلاردى ەرتە دياگنوستيكالاۋ ءۇشىن سكرينينگتىك تەكسەرۋلەر 38%-عا كەڭەيتىلدى، بۇل رەتتە 2،8 ملن ادام ونكولوگيالىق سكرينينگتەن ءوتتى.
قاتەرلى ىسىكتەن بولاتىن ءولىم-جىتىم كورسەتكىشى 3،5%-عا تومەندەدى.
بۇل جوبالار مەن جەتىستىكتەر ەلىمىزدىڭ ءبىلىم بەرۋ، عىلىم جانە دەنساۋلىق ساقتاۋ سالالارىن جاڭا دەڭگەيگە كوتەرىپ، حالىقتىڭ ءومىر ساپاسىن جاقسارتۋعا باعىتتالعان.