قازاقستاندا سيرەك كەزدەسەتىن جانە جويىلىپ كەتۋ ءقاۋپى تونگەن وسىمدىكتەر مەن جانۋارلار ءتۇرى دە بار
قازاقستاندا 140-180-گە جۋىق قار بارىسى مەكەندەيدى. بۇل تۋرالى اتالمىش جىرتقىش ءتۇرىن ساقتاپ قالۋعا ارنالعان بىشكەكتەگى شارا بارىسىندا ق ر ەكولوگيا ۆيسە-مينيسترى ءاليا شالابەكوۆا ءمالىم ەتتى، دەپ حابارلايدى Almaty-akshamy.kz.
ەكولوگيا مينيسترلىگىنىڭ اقپاراتىنا سۇيەنسەك، 20-21 قازاندا قىرعىزستان استاناسى بىشكەك قالاسىندا قار بارىسى مەن ونىڭ ەكوجۇيەلەرىن ساقتاۋ جونىندەگى جاھاندىق باعدارلامانىڭ (GSLEP) باسقارۋشى كوميتەتىنىڭ جەتىنشى وتىرىسى ءوتىپ جاتىر.
«قار بارىسى – قازاقستاننىڭ سيرەك كەزدەسەتىن ءىرى جىرتقىشتارىنىڭ ءبىرى. ول 1978 جىلى ەلىمىزدىڭ قىزىل كىتابىنا ەنگىزىلدى. سونىمەن قاتار قار بارىسى قازاقستان رەسپۋبليكاسىنىڭ مەملەكەتتىك سيمۆولى بولىپ تابىلادى جانە قازاق حالقىنىڭ باعا جەتپەس تابيعي جانە مادەني مۇراسىن بەينەلەيتىن ۇلكەن قوعامدىق ماڭىزى بار»، - دەدى ءا.شالابەكوۆا.
قازاقستان اۋماعىندا ەلىمىز ءۇشىن عانا ەمەس، جالپى الەمدىك ەكولوگيا ءۇشىن ماڭىزدى ءرول اتقاراتىن بيوالۋانتۇرلىلىكتىڭ ۇلكەن شوعىرى بار. دەگەنمەن، ايتا كەتۋ كەرەك، قازاقستاندا سيرەك كەزدەسەتىن جانە جويىلىپ كەتۋ ءقاۋپى تونگەن وسىمدىكتەر مەن جانۋارلار ءتۇرى دە بار. قار بارىسى سولاردىڭ قاتارىندا. سوڭعى مالىمەتتەرگە سايكەس، ەلىمىزدە 140-180-گە جۋىق قار بارىسى مەكەندەيدى.
ەلىمىزدە حالىقارالىق اگەنتتىكتەرمەن، ۇكىمەتتىك ەمەس سەكتورمەن جانە ازاماتتىق قوعامداستىقپەن بىرلەسە كليماتتىق وزگەرىستەرگە بەيىمدەلۋ شارالارىن ەنگىزۋ، بيوالۋانتۇرلىلىكتى ساقتاۋ جانە ەكوجۇيەلەردى ورنىقتى باسقارۋ بويىنشا جۇمىستار جۇرگىزىلىپ جاتىر. وسىلايشا، ورنىقتى دامۋدىڭ 17 ماقساتىنا قول جەتكىزۋدە قازاقستان ۇلتتىق ستراتەگيالىق جانە باعدارلامالىق قۇجاتتارعا 80-گە جۋىق نىسانالى كورسەتكىشتى ەنگىزدى.
سونىمەن قاتار 2021 جىلى بۇۇدب جەق جوباسىنىڭ قولداۋىمەن قازاقستاندا العاش رەت سپۋتنيكتىك تەلەمەتريانى قولدانۋ قولعا الىندى.
«جۇرگىزىلىپ جاتقان جۇمىستاردىڭ ارقاسىندا قار بارىسىن ساقتاۋ بويىنشا كوپتەگەن ماسەلەلەر شەشىلۋدە. الايدا ولاردىڭ ءبىرازى ءالى دە وزەكتى بولىپ قالا بەرەدى. قازاقستاندا 1990-شى جانە 2000-شى جىلداردىڭ باسىندا بايقالعان براكونەرلىك جانە قار بارىسى دەريۆاتتارىنىڭ زاڭسىز ساۋداسى سوڭعى جىلدارى وتە سيرەك كەزدەسەدى»، - دەدى ۆيسە-مينيستر وتىرىس بارىسىندا.
ايتا كەتەيىك، قار بارىسى مەن ونىڭ ەكوجۇيەلەرىن ساقتاۋ جونىندەگى جاھاندىق باعدارلامانىڭ (GSLEP) باسقارۋشى كوميتەتىنە 12 ەل مۇشە.