ق ر پرەمەر-مينيسترىنىڭ ورىنباسارى تامارا دۇيسەنوۆانىڭ توراعالىعىمەن وتكەن كەڭەستە بالالاردىڭ جازعى دەمالىسىن ۇيىمداستىرۋ ماسەلەلەرى قارالدى. وعان مۇددەلى مەملەكەتتىك ورگانداردىڭ وكىلدەرى مەن وبلىس اكىمدەرىنىڭ ورىنباسارلارى قاتىستى.
جازعى لاگەرلەردىڭ جۇمىسى تۋرالى وقۋ-اعارتۋ ۆيسە-مينيسترى ەدىل وسپان باياندادى. دەمالىس ماۋسىمى باستالعالى بەرى ەلىمىزدە ءتۇرلى فورماداعى 10 208 لاگەردە 1،7 ملن-نان اسا بالا قامتىلىپ وتىر، دەپ حابارلايدى Almaty-akshamy.kz.
بەلسەندى جازعى دەمالىس ۇيىمداستىرۋدا بالالاردىڭ قاۋىپسىزدىگىنە ەرەكشە ءمان بەرىلىپ وتىر. وقۋشىلاردى ساۋىقتىرۋ نىساندارىنا جىبەرمەس بۇرىن سانيتارلىق-ەپيدەميولوگيالىق قىزمەت ماماندارى ءجىتى تەكسەرۋ جۇرگىزگەن. دەنساۋلىق ساقتاۋ ۆيسە-مينيسترى ايجان ەسماعامبەتوۆا لاگەرلەردىڭ سانيتارلىق جاعدايى تۇراقتى باقىلاۋدا ەكەنىن جەتكىزدى.
ايتا كەتەيىك، بالالاردىڭ جازعى دەمالىسىن ۇيىمداستىرۋ بويىنشا وڭىرلەردە تاقىرىپتىق جوسپارلار قۇرىلعان. ونىڭ اياسىندا لاگەرلەردەگى باعدارلامالاردان بولەك، تانىمدىق شارالار دا قاراستىرىلعان بولاتىن. وسى رەتتە بالالاردى تاسىمالداۋ كەزىندەگى قاۋىپسىزدىك ماسەلەسى تۋىندايدى. وسىعان بايلانىستى ىشكى ىستەر ءمينيسترىنىڭ ورىنباسارى يگور لەپەحا بۇعان قاتىستى اقپاراتتى پوليسيا بولىمدەرىنە الدىن الا حابارلاۋ قاجەتتىگىن ەسكە سالدى. مۇنداي جاعدايدا پاترۋلدىك ماشينالار بىرگە شىعىپ، جولداعى قاۋىپسىزدىكتى قامتاماسىز ەتەتىن بولادى.
«بالالاردىڭ جازعى بەلسەندى دەمالىسى ماسەلەسى تۇراقتى باقىلاۋدا بولۋى قاجەت. دەمالىس كەزەڭى مەيىلىنشە پايدالى ءوتۋى ءۇشىن وقۋشىلارعا بارلىق جاعداي جاسالۋى كەرەك. بۇل رەتتە مۇددەلى مەملەكەتتىك ورگانداردىڭ بىرلەسە قىزمەت اتقارۋى ماڭىزدى. اتالعان جۇمىستى ۇيلەستىرۋ وقۋ-اعارتۋ مينيسترلىگىنىڭ قولىندا»، — دەپ اتاپ ءوتتى تامارا دۇيسەنوۆا.