قازاقستاندا پوليسەيلەر قوعامدىق ورىنداردا بەت-الپەتتى جاسىراتىن كيىم كيۋگە تىيىم سالاتىن جاڭا زاڭناماعا ەنگىزىلگەن تۇزەتۋلەر بويىنشا ءتۇسىندىرۋ جۇمىستارىن باستادى، - دەپ حابارلايدى اqshamnews.kz Polisia.kz سايتىنا سىلتەمە جاساپ.
پوليسيا مالىمەتىنشە، بۇل وزگەرىستەردىڭ ماقساتى — قوعامدىق قاۋىپسىزدىكتى كۇشەيتۋ، تۇلعانى انىقتاۋدى جەڭىلدەتۋ جانە قوعامدىق ءتارتىپتى ساقتاۋ. سونداي-اق، جاڭا ەرەجەلەر ازاماتتاردىڭ قۇقىعى مەن بوستاندىعىن، سونىڭ ىشىندە ءدىني سەنىمىن بۇزبايتىنى اتاپ ءوتىلدى.
ۋچاسكەلىك ينسپەكتورلاردىڭ ايتۋىنشا، تىيىم بەت-الپەتتى تولىقتاي جاۋىپ، تانۋعا كەدەرگى كەلتىرەتىن كيىمدەرگە – مىسالى، ماسكا مەن نيكابقا قاتىستى. ال حيدجاب، شەيلا، حيمار، ال-اميرا جانە بەتتى جاپپايتىن وزگە دە كيىمدەرگە بۇل شەكتەۋ قولدانىلمايدى.
اۋا رايىنىڭ جاعدايلارىنا، مەديسينالىق قاجەتتىلىككە، زاڭ تالاپتارىن ورىنداۋعا، قىزمەتتىك مىندەتتەرگە، سونداي-اق سپورتتىق نەمەسە مادەني ءىس-شارالارعا قاتىسۋ مەن ازاماتتىق قورعانىس قىزمەتكەرلەرىنىڭ جۇمىسىنا بايلانىستى جاعدايلاردا بۇل تىيىمنان ەرەكشەلىكتەر قاراستىرىلعان.
ءتۇسىندىرۋ جۇمىستارى اياسىندا پوليسەيلەر ازاماتتارعا قۇقىقبۇزۋشىلىقتاردىڭ الدىن الۋ شارالارى تۋرالى دا ەسكە سالدى.
ەسكە سالايىق، بەت-الپەتتى جاسىراتىن كيىم كيۋگە تىيىم سالۋ تۋرالى نورما قازاقستان رەسپۋبليكاسىنىڭ "قۇقىق قورعاۋ قىزمەتىن، قۇقىق قورعاۋ جانە ارناۋلى مەملەكەتتىك ورگاندار، ازاماتتىق قورعاۋ ورگاندارى مەن اسكەري قىزمەتشىلەردىڭ تۇرعىن ۇيمەن قامتاماسىز ەتىلۋى مەن الەۋمەتتىك قورعالۋىن جەتىلدىرۋ، سونداي-اق ىشكى ىستەر ورگاندارى قىزمەتىندەگى ارتىق زاڭنامالىق رەتتەۋدى الىپ تاستاۋ ماسەلەلەرى بويىنشا كەيبىر زاڭنامالىق اكتىلەرگە وزگەرىستەر مەن تولىقتىرۋلار ەنگىزۋ تۋرالى" زاڭىنا ەنگىزىلگەن بولاتىن.
بۇل زاڭعا 30 ماۋسىمدا پرەزيدەنت قاسىم-جومارت توقايەۆ قول قويدى.