قازاقستان ۇلتتىق وليمپيادالىق كوميتەتى 63،5 كەلى سالماقتا جۇدىرىقتاسقان مۇحاممەدسابىر بازارباي ۇلى مەن گرۋزيالىق لاشا گۋرۋلي اراسىنداعى جەكپە-جەك ناتيجەسىن ءتۇسىندىرۋدى تالاپ ەتىپ، رەسمي تۇردە PBU-عا (Paris boxing Unit) شاعىم ءتۇسىردى، دەپ حابارلايدى aqshamnews.kz ۇوك-نە سىلتەمە جاساپ.
«قازاقستان ۇوك مۇحاممەدسابىر بازارباي ۇلىنىڭ جەكپە-جەگىنە قاتىستى شاعىم ءتۇسىردى. ءبىز بۇل ناتيجەمەن كەلىسپەيمىز جانە PBU-دان تۇسىنىكتىمە تالاپ ەتتىك. بۇدان حوك تا حاباردار.
ءبىزدىڭ ويىمىزشا، قازاقستاندىق بوكسشى 2024 جىلعى وليمپيادانىڭ جارتىلاي فينالىنا جولداما بەرەتىن ماڭىزدى كەزدەسۋدە جەڭىسكە جەتتى. وتكەن جەكپە-جەكتىڭ ناتيجەسىن قايتا قاراۋ مۇمكىن ەمەستىگىن دە تۇسىنەمىز.
الايدا، ءبىز ءىرى حالىقارالىق جارىستاعى تورەلىك ءادىل ءارى تازا بولعانىن قالايمىز»، - دەدى قازاقستان ۇوك باس حاتشىسى جانار ۋتەشيەۆا.
ايتا كەتەيىك، وسىعان دەيىن قازاقستان ۇوك قازاقستاندىق بوكسشىلاردىڭ جەكپە-جەگىندە تورەلىك ەتكەن جەكەلەگەن تورەشىلەرگە قاتىستى PBU-عا ەسكەرتۋ جاساعانىن حابارلاعان بولاتىنبىز. ەسكەرتۋ قابىلدانىپ، قازىرگى تاڭدا زەرتتەۋ جۇرگىزىلىپ جاتىر.