قازاقستان ۇلتتىق قۇراماسى 10-15 قىركۇيەك ارالىعىندا فرانسيانىڭ ليون قالاسىندا وتەتىن 47ء-شى حالىقارالىق WorldSkills چەمپيوناتىنا قاتىسادى.
WorldSkills چەمپيوناتى جۇمىسشى ماماندىقتارىنىڭ بەدەلىن ارتتىرۋعا جانە جاستار اراسىندا كاسىبي داعدىلاردى دامىتۋعا باعىتتالعان. بيىلعى جىلى حالىقارالىق چەمپيوناتقا 65-تەن استام ەل مەن ايماقتان 1500 ستۋدەنت قاتىسادى دەپ كۇتىلۋدە، ولار 62 قۇزىرەتتىلىك بويىنشا سايىسقا تۇسەدى. قازاقستان قۇراماسىنا 32 قاتىسۋشى، 30 ساراپشى، سونداي-اق رەسمي جانە تەحنيكالىق دەلەگاتتار ەندى.
وقۋ-اعارتۋ ءبىرىنشى ۆيسە-مينيسترى ناتاليا جۇمادىلدايەۆا قازاقستاندىق قۇرامامەن - 2023 جىلى WorldSkills Kazakhstan رەسپۋبليكالىق كاسىبي شەبەرلىك چەمپيوناتىندا جەڭىسكە جەتكەن قاتىسۋشىلارمەن كەزدەسىپ، ولارعا ءسات ساپار تىلەدى.
«مەملەكەت باسشىسى 2025 جىلدى جۇمىسشى ماماندىقتار جىلى دەپ جاريالادى. بيىلعى جىلى قوعامدا ەڭبەكقورلىق پەن كاسىپقويلىق قۇندىلىقتارىن ىلگەرىلەتۋگە ەرەكشە نازار اۋدارىلاتىن بولادى. WorldSkills حالىقارالىق چەمپيوناتتارىنا قاتىسۋ جۇمىسشى ماماندىقتارىنىڭ بەدەلىن ارتتىرۋعا، وقۋ پروسەسىنە زاماناۋي قۇرالداردى ەنگىزۋگە جانە جاڭا قۇزىرەتتەردى دامىتۋعا ىقپال ەتەدى. بۇل ءوز كەزەگىندە ەلدىڭ ەكونوميكالىق وسۋىنە جانە ونىڭ باسەكەگە قابىلەتتىلىگىن ارتتىرۋعا سەپتىگىن تيگىزەدى»، — دەپ اتاپ ءوتتى وقۋ-اعارتۋ ءبىرىنشى ۆيسە-مينيسترى ناتاليا جۇمادىلدايەۆا.
ايتا كەتەيىك، 2023 جىلى قازاقستان قۇراماسى العاش رەت گدانسكىدەگى Euroskills چەمپيوناتىندا 2 مەدال جانە 4 مەدالون جەڭىپ العان بولاتىن.