پرەمەر-مينيستر ولجاس بەكتەنوۆ جاڭا يپوتەكالىق باعدارلامانى ىسكە قوسۋ جانە جىلجىمايتىن مۇلىككە سۇرانىستى ىنتالاندىرۋ ءۇشىن جالعا بەرىلەتىن تۇرعىن ءۇي تەتىگىن ىسكە اسىرۋ جونىندە شارالار قابىلداۋدى تاپسىردى.
بيىل مەملەكەت باسشىسى قاسىم-جومارت توقايەۆ ۇكىمەت الدىنا ەلىمىز بويىنشا 18 ملن شارشى مەتر تۇرعىن ءۇيدى پايدالانۋعا بەرۋدى قامتاماسىز ەتۋ مىندەتىن قويدى، دەپ حابارلايدى Almaty-akshamy.kz Primeminister.kz-كە سىلتەمە جاساپ.
پرەزيدەنت العا قويعان مىندەتتەردى ورىنداۋ اياسىندا بيىلعى 1 ناۋرىزدان باستاپ وتباسى بانكى «وتاۋ» باعدارلاماسىن ىسكە قوستى. شارتتارعا سايكەس، قازاقستاندىقتار استانا مەن الماتى قالالارى ءۇشىن 30 ملن، باسقا وڭىرلەر ءۇشىن 18 ملن جىلدىق 9%-بەن جانە حالىقتىڭ الەۋمەتتىك جاعىنان وسال توپتارى ءۇشىن 7%-بەن تۇرعىن ءۇي نەسيەسىن راسىمدەي الادى.
18 ساۋىردەگى جاعداي بويىنشا بانك باعدارلاماعا قاتىسۋعا 18 729 ءوتىنىم قابىلدادى. جىلجىمايتىن مۇلىك باعاسىنىڭ ءوسۋىن تەجەۋ ءۇشىن قۇرىلىس سالۋشىلاردى باسپانا ماركەت پلاتفورماسىندا ورنالاستىرۋ كەپىل قۇنى كەلىسىلگەننەن كەيىن عانا جۇزەگە اسىرىلاتىن بولادى.
جاڭا تۇرعىن ءۇي باعدارلامالارىن ىسكە قوسۋ جىلجىمايتىن مۇلىككە سۇرانىستى ارتتىرۋعا مۇمكىندىك بەرەدى. وسىعان بايلانىستى ونەركاسىپ جانە ساۋدا مينيسترلىكتەرىنە باسەكەلەستىكتى قورعاۋ اگەنتتىگىمەن بىرلەسىپ، ءبىر اي مەرزىمدە جىلجىمايتىن مۇلىك جانە قۇرىلىس ماتەريالدارى نارىعىندا دۇربەلەڭگە جول بەرمەۋ ءۇشىن قاجەتتى شارالاردى قابىلداۋ تاپسىرىلدى.
ولجاس بەكتەنوۆ نازار اۋدارعان ماڭىزدى ماسەلە – سالىنىپ جاتقان قۇرىلىستىڭ ساپاسى. جالعا بەرىلگەن تۇرعىن ۇيگە قونىستانعاننان كەيىن كەزدەسەتىن ماسەلەلەردى قۇرىلىس سالۋشىلار شەشۋى كەرەك.
«تاعى ءبىر ماڭىزدى ماسەلە – قۇرىلىستىڭ ساپاسى مەن ونىڭ زاڭناماعا سايكەس بولۋى. قۇرىلىس كومپانيالارى وزدەرىنە العان مىندەتتەمەنى تولىق ورىنداۋعا جانە قۇرىلىستىڭ ساپاسىن قامتاماسىز ەتۋگە مىندەتتى. قانداي دا ءبىر كەمشىلىكتەر انىقتالسا، ولاردى تەز ارادا جويىپ وتىرۋى كەرەك. ونەركاسىپ مينيسترلىگى مۇددەلى مەملەكەتتىك ورگاندارمەن بىرلەسىپ، ءبىر اي مەرزىمدە زاڭسىز قۇرىلىس جۇرگىزگەنى ءۇشىن قۇرىلىس كومپانيالارى مەن لاۋازىمدى تۇلعالارعا ىقپال ەتۋ شارالارىن قاتاڭداتۋ جونىندە زاڭنامالىق تۇزەتۋلەر ازىرلەسىن. ولاردى قۇرىلىس كودەكسىنىڭ جوباسىنا ەنگىزۋ قاجەت»، — دەپ اتاپ ءوتتى ولجاس بەكتەنوۆ.